الموضوع: 3 اسئله عن byd f3 من فضلكم

السلام عليكم

أولا أهلا وسهلا بحضرتك معنا في قسم الـ BYD ومن الواضح حضرتك من الأعضاء القدامي بالمنتدي وده شرف كبير لينا

بخصوص الأسئلة:
س1- فيه موديل موجود gi استلام فورى بحوالى 62 الف جنيه (فيه منه 8 الوان) و موديل تانى بالحجز gli ازيد حوالى 3000 جنيه و الاستلام بعد 3 شهور فإيه هو الفارق بالتفصيل بين الموديلين و هل الفارق يستاهل تنتظر و تدفع أكثر ؟!

....ج1 الفارق بالتفصيل 3 أشياء
أولا : فرامل ABS + EBD
ثانيا : عدد 2 إيرباج للركاب الأماميين
ثالثا : جهاز إنذار بالريموت
والتقييم يرجع للمشتري إذا كان بيشترط هذه الكماليات أم لا
وعلي فكرة بدأ التسليم للحاجزين للموديل GL-i اليوم والمدة للحاجزين أعتقد حتكون أقل من 3 شهورمع العلم إن الفارق في السعر يستحق إذا كان رغبة المشتري في الموديل الأعلي

س2- توكيل الأمل هو نفسه توكيل لادا فى مصر و كل من اشترى لادا جديده اشتكى من التوكيل فهل خدمه و صيانه byd منفصلة عن لادا و اللا الاثنين مع بعض ؟!

....ج2 حاليا خدمة BYD مخصص لها جزء صغير بمركز صيانة الأمل في فرعي الخدمة بالقاهرة والإسكندرية وفرع القاهرة مشكلته كمية اللادا خاصة التاكسي ولكن الإدارة تنبهت لذلك وأنشأت مركز مخصص للـ BYD بالقطامية والإفتتاح قريبا أما فرع الإسكندرية فالضغط عليه من اللادا خفيف ولذلك الإهتمام بالـ BYD أفضل هناك

س3- اخبار قطع الغيار و الصيانات الدورية ايه كأسعار و خدمات (على الاقل لغايه صيانه 40 الف كيلو نعرف هنروح كل قد ايه كل خمسه او عشره الاف و ايه اللى بيتعمل فى كل صيانه و التوكيل بياخد كام) ؟!

....ج3 أولا قطع الغيار
أسعارها رخيصة مقارنة بمثيلاتها مثلا فانوس أمامي 250 جم إكصدام 200 جم مرآة كهرباء كاملة 150 جم فلتر بنزين 45 جم فلتر هواء 65 جم مع مراعاة أن هذه أسعار القطع الأصلية من التوكيل فما بالك بمحلات قطع الغيار التي إنتشرت
ثانيا الخدمات
الصيانات كل 5000 كم وأسعارها معتدلة ولسة عامل صيانة ال 25000 كم كانت القيمة 55 جنيه للمصنعيات والصيانات الزوجية أعلي حاجة بسيطة تقريبا 65 جنيه ما عدا الصيانات التي يتمك تغيير فيها أشياء كثيرة ودي كانت في 20000 كم ب 125 جنيه
واللي بتم في كل صيانة هو فحص شامل وظبط لمعظم أجزاء السيارة والكشف علي جميع مكوناتها بجهاز الكمبيوتر المخصص لها من المصنع ليحلل أدائها

أرجو أن أكون قد أفدت


دمت بخير

الاستاذ sv065

مش عارف اشكرك ازاى على سرعه الرد و الاجابات الوافيه

فعلاً واضح ان العربيه تستاهل الراجل يفكر فيها بمقاييس هتدفع كام و تأخذ ايه فى مقابل اللى انت دفعته

اعتقد ان 3 الاف جنيه فى مقابل الايرباج ( لو كان آمن و مش بينفجر مع اى خبطه فى الاكصدام زى البريليانس جالينا ) و الفرامل abs (لو كانت فعلاً abs اصليه مش خزنه زيت و السلام زى بتاعت الشيرى كيو كيو و الجيلى ) يستاهلوا الانتظار

لكن موضوع الانذار و الريموت ده سهل جداً تركيبه مع وحدات رفع للزجاج الكهرباء بثمن اقل من 300 جنيه فى اى محل اكسسوارات محترم (ده لو التوكيل مقالش ان العربيه تخرج من الضمان لو عملت فيها حاجه بره التوكيل زى رينو و غبور او منصور)

موضوع الصيانه الواحد مقلق منه لانى لم اسمع خيراً عن توكيل لادا اللى فى العباسيه .. مره ركبت مع سواق تاكسى لادا من العربيات البيضاء الجديده و حكالى ان عندهم شرط فى موضوع الاستبدال انك لازم تعمل الصيانه الدورية فى التوكيل و طالع عينه معاهم لانهم مجموعة من الفنيين عديمى الخبره و التفكير و الذوق و الاخلاق كمان بيبوظوا العربيه اكثر كل ما يروحلهم مش بيصلحوها و دى اسمها لادا يعنى من ناحيه التكنولوجيا مش محتاجه مخ ذرى يعمل لها صيانه و من ناحيه قوة الاحتمال فهى اقوى بمراحل من كل العربيات الصينى

لكن اكيد هننتظر نشوف ايه نظام المركز الجديد اللى هيعملوه ده لان اكيد مش هنروح اسكندريه (450 كيلو رايح جاى و يوم كامل عطله) علشان نعمل صيانه مخصوص للعربيه

أسعار قطع الغيار كويسه جداً و قرأت كمان ان بعض قطع غيار اللانسر و التويوتا كورولا تركب عليها و بالتالى ممكن لو مش عاجبك الصينى و طلع مش كويس ممكن تغيره باليابانى (التيل و الطنابير و العفشه و السيور تحديداً)

اخيراً :
مع انها عربيه صينى و انا عندى حساسيه من اى عربيه صينى لكن حاسس ان هيكون لينا نصيب فى العربيه دى لما يبدأ الموديل المجمع محلياً فى الانتشار و نسمع اراء الناس عنه و نشوف هل هيحصل مشاكل مع التوكيل ام لا

و ربنا يقدم ما فيه الخير ...

اكرر شكرى لحضرتك مره تانيه و ثالثه و مليون ..........

المشاركة الأصلية كتبت بواسطة مواطن مصرى

الأخ الفاضل العفو يافندم لا شكر علي واجب


وإذا سمحت لي حضرتك لي تعقيب بسيط بخصوص :
1- الإيرباج مش زي ما حضرتك متصور إنه بيفتح مع أي خبطة بسيطة لأن السيارة مثيت فيها من الأمام بالشاسيه حساسات لهذا الأمر بالذات بحيث لا يعمل إل عند إصطدام بقوة معينة محسوبة الشدة

2- أجهزة الإنذارإنتشرت جدا ويمكن شراءها وسعرها وصل لأقل من 150 جنيه كمان ولكن مما لا شك فيه وبصفة عامة أي كمالية إضافية عمرها ما تكون بالجودة المطلوبة مثل التي تكون في السيارة من المصنع أصلا ولقد شاهدت بنفسي مشاكل أجهزة الإنذار بعد فترة حتي لو ماركات غالية

3- بخصوص الصيانة موضوع شرط الصيانة الدورية للسيارات ده مش مطبق علي اللادا بس ده شرط الدولة نفسها علي كل السيارت المشاركة في المشروع للحفاظ علي مستوي أداء السيارات وإن كان هناك الكثير من التعليقات إلا أن هذا الأمر لا يعيب السيارة أو التوكيل في شيء بل لمواجهة إستخسار الكثير من السائقين في عمل أي صيانة للسياراة حتي تقف تماما وهنا يبحث وقتها عن إيه العطل ويحاول يصلحه

مشكور

المشاركة الأصلية كتبت بواسطة ehabpopo

كلامكم مفيد جدا وانا سعيد بمشاركاتى فى هذا المنتدى الجميل ... ممكن اسأل سؤال ؟
سعر الbyd f3 ال G L كام بالظبط ........* وسعر ال GL-i كام بالظبط ومدت الانتظار حتى الاستلام ... 62000 جم وو 65000 جم زى ماهو مكتوب ولا كام بالظبط ....؟؟؟؟؟ يا ريت حد يقولنا .... وشكرا

الـ BYD F3 G-i سعرها 61900 جم والتسليم فوري إن شاء الله باستثناء أعضاء نايل موتورز الكرام لهم عرض خاص

والـ BYD F3 GL-i سعرها تقريبا حيكون 65000 جم ولكن حتي الآن غير مؤكد والإنتظار غير محدد أيضا وإن كان قريبا