الموضوع: واخيرا تم تركيب كاست السيراتو الgps

السلام عليكم ، يا أحلي رجالة .. حبيت أبلغكم بآخر تطورات الموقف معاية ، أولا أنا كنت موصي واحد صحبي يروح يسألي عند المحل الي كلكم عارفينه و اللي ركب الـ دي في دي و الـ GPS لصاحب الموضوع الأصلي ، بخصوص الموديل الخاص بالهاي لاين أو الـ SX ، المهم يعني صاحبي راحله و كلمني من عنده و أنا كلمت الراجل شخصيا "إسمه أستاذ عمرو" و سألني "انت الـ سي دي بلاير عندك مطبوخ في صالون العربية و لا تحتيه علبة كده" ده كان سؤاله تقريبا !!

المهم قلتله شكل الـ Head Unit عندي إيه قالي ما تتعبش نفسك مش هتلاقي طلبك هنا و ما نزلش مصر لسه و ما تتعبش الناس معاك ..

المهم زي ما البعض منكم عارفين انا اصلا من قبلها كنت علي اتصال بكام شركة كده آخرهم شركة في الصين و قلت يعني اجمع كل الخيوط عشان لو سكة ما نفعتش إن شاء الله التانية ربنا يكرمنا فيها ، و الحمد لله رب العالمين كلمت الشركة و عملت يعني شوية بحث عنهم و تجارب الناس معاهم و لقيتهم الحمد لله رب العالمين لحد دلوقتي مطمئنين .. و رحت امبارح الحمد لله رب العالمين بعتلهم الفلوس علي ويسترن يونيون 450 دولار .. و ربنا يستر في اللي جاي إن شاء الله ..

بإذن الله هبقي أبلغكم بللي بيحصل معاية عشان لو حد حابب يخوض التجربة و ربنا يستر للنهاية إن شاء الله .. إدعولي ..

نسيت أقولكم علي تمن الـ جهاز عند المحل اللي في مصر 3250 من غير تركيب ، و طبعا اللي عنده ما ينفعش الهاي لاين خالص ، ده غير اني سمعت ان بتاع الهاي لاين إن شاء الله لما ينزل هيكون أغلي كمان في حدود 4000 و الله أعلم ..

يا رجالة أنا ليا سؤال مهم أوي أوي ، حد يعرف الفريم بيتفك إزاي .. يا ريت اللي يعرف يقولي بسرعة الله يكرمكم .. شكرااااا

جوز اللوز العنب ..

و أخيرا الحمد لله رب العالمين استلمت الجهاز و الحمد لله رب العالمين ركبته و كله تمام الحمد لله رب العالمين .. مفيش أي مصاريف إضافية و مفيش أي مشكلة مع أي جهة سواء وزارة الاتصالات أو أي جهة أخري بخصوص إن الجهاز جاي من بره .. و الموضوع زي ما انتو متابعين الحمد لله رب العالمين خد بالظبط 3 أيام (يوم تحويل الفلوس و يومين تانيين الشحن و الاستلام و الحمد لله رب العالمين التركيب) و انا زي ما قلتلكم كنت متابع الجهاز خطوة بخطوة علي الموقع بتاع الدي إتش إل بالتراكينج نمبر اللي ادوهوني في الشركة..

أنا عارف انكم مستنيين صور و إنا فعلا صورت حبة صور ، بس لسة إن شاء الله هرفعهم علي بلليل كده ..

التركيب رخم حبة و خاصة ان في حاجة حصلت دايقتني شوية و هي ان الفريم ما كانش فيه مكان لتثبيت الفلاشر اللي بيركب في قلب الفريم ، و عملنا حوار كده عشان نقدر بس نثبته وللأسف الفلاشر مش شغال عندي أنا كده كده ما بستعملوش كتير يعني لأني مثبته بالعافية في الفريم .. هي دي الحاجة الوحيدة اللي عكننت عليه بخصوص الموضوع ده بس إن شاء الله هروح بيها للتوكيل و ربنا يسهل إن شاء الله يشوفولي حل ..

أنا ما ركبتش الجهاز في التوكيل و الحمد لله اني ما عملتش كده عشان الجهاز كان متعب أوي و الصراحة في توصيلات كده بخصوص الدي في دي اللي مركبه في المساند و الكاميرا الريفيرس ، فرحت للراجل اللي عملي الحاجات دي و هو الحمد لله رب العالمين كان تمام و عارف كل التوصيلات رايحة فين و جاية منين عشان هو اللي عامل الشغل ، ولو كنت رحت للتوكيل أعتقد انه ما كانش هيعرف الحوار ده و كان هيرمي الجهاز في وشي ، لأنهم - زي ما انتم عارفين - بيتعاملوا طول الوقت مع حاجات استاندارد ، لكن الشغل و اللعب و الحركات كل الحاجات دي هما - و ده اعتقادي الشخصي - مش جامدين فيها ..

المهم شلت الشاشة اللي كنت مركبها للكاميرا الريفيرس (و كانت متعلقة في المراية) ووصلت الكاميرا علي الجهاز و الحمد لله رب العالمين كله جوز اللوز ..

إن شاء الله انتظروني انهارده بلليل بإذن الله رب العالمين هرفعلكم الصور ، انا بس حبيت ابلغكم بآخر تطورات الموقف معاية زي ما انا متعود .. و سلامي للجميع ..