الموضوع: رايكم ايه فى شراء و تصليح سيارات الحوادث

شوف يا سيدى الفاضل:

الموضوع ده كانت فكرته كبرت فى دماغى زمان و لما حاولت اجربها تراجعت عنها تماما .. ليه ؟؟؟

أولا : لازم حد متخصص فى الموضوع ده لتقييم سيارة الحوادث قبل اى شئ ... فيه عربيات ممكن تتصلح و فيه عربيات بيكون تصليحها خسارة و بالتالى بتتقطع و تتاخد الأجزاء السليمة قطع غيار ، و هنا لازم التخصص و الخبرة و الا تبقى خسارة كبيرة.

ثانيا : لازم يكون اللى بياخد العربية عنده (او على الأقل متفق مع) ورشة سمكرة و دوكو تمام ، لأنه هايحتاج شغل نار علشان يصلح العربية أو يقطعها ، و لو هايصلحها لازم يكون اتصالاته ببتوع قطع الغيار تمام علشان ياخد الحاجة بسعر ناسب ، و لازم يكون ورشة سمكرة محترفة علشان لو فيه مشاكل فى شاسيه العربية.

ثالثا : بتاع الدوكو اللى عند الناس دى بيكون اغلى شوية من العادى و لكن لأن له طريقته اللى تخلى العربية مايبانش انها راشة دواخل و مغيرة حتت منها ، او اضعف الأيمان ما تقولش ان اللى حصل فيها كان حادثة مدمرة و تفتكر انها حاجة بسيطة (و طبعا ده لزوم غش الزبون و ايهامه انها كويسة ، و ده حرام طبعا ، و لكن التجار دول بيقولوا دى شطارة و يقبلوا الحرام بقى دى بينهم و بين نفسهم).

رابعا : لو كل النقط اللى فاتت دى متوفرة لديك يبقى اعمل حسابك انك تكون واخد العربية دى بدون نية بيع ، يعنى لنفسك ، لأن لما تيجى تبيعها زى ما الزملاء الأفاضل قالوا ، لو مش هاتقول على الحادثة يبقى غش و حرام ، و لو هاتقول هايتخسف بسعرها الأرض ، و يمكن حتى ما تتباعش... فلازم تكون عامل حسابك على كده.

خامسا : اللى شفتهم عملوا الحركة دى بيكون واحد مثلا نفسه يركب مرسيدس او بى ام و مش قادر على تمنها فيعمل كده ، بس طبعا بيصرف تمام ، و اعرف واحد صاحبى اشترى مرسيدس معجونة ف حادثة و خلاها عند سمكرى جاره معرفته ، و كل ما يجى له قرشين يشترى حاجة يركبها فيها و يصلح فيها ، و دلوقت ما شاء الله راكب عربية الناس بتحسده عليه و هما مش عارفين اصلها ايه.

سادسا : لازم تتأكد ان ورقها كله مستوفى علشان لما تصلحها و تروح ترخصها باسمك ما تلاقيش مقلب فى الورق و تبقى شربتها ... لا منك تقدر ترخصها .. و لا منك تقدر تبيعها ... و لا تقدر ترجع فلوسك ..

و ربنا يستر.

و تحياتى