مش عاااايز اخش الجييش (قرفاااااان)

**wael3m** · 24-05-2010 11:14 AM

بص يازعيم الموضوع مش موضوع جيش ومش وقته ومش طالبه
أضيع 3 سنين أو سنة من عمري .... الموضوع انك تحول كل نقطة
انت شايفها سلبية في حياتك الي حاجة إيجابية ...... يعني إيه اللي أنا بقوله دا
هحكيلك حاجة صغيرة ..لما كنت في الكلية كان لازم أخد التربية العسكرية
والناس أصحابي قعدوا يقولولي دي حاجة مقرفة وصحيان بدري والخ الخ
بس أقسم بالله كانوا أحلي أسبوعين في حياتي علشان عرفت فيهم معلومات
كتير عن العدو مكنتش اعرفها ومنها انهم ولاد وبنات بيدخلوا جيش اجباري 3 سنين لما يتموا 18 سنة
وقابلت فيهم ناس اكتر .... وبرده وأنا شغال في شرم عرفت غطاس
اتعلم المهنة دي من الجيش رغم انه عمره مانزل ميه في حياته قبل الجيش
يعني حط في دماغك انك ممكن تتلطع من الجيش بحاجة ( ود طبعا مهمة أوي )
طيب لو جالك تعيين في احدي قري الصعيد او الدلتا اللي مواصلاتها عربيات
نص نقل او ساعات من غير مواصلات اساسا هتعمل إيه ؟ في التوقيع بتاعي
حاول تقرا قصة حياتي وهتشوف أنا إد إيه اتبهدلت بس كان عندي دائما طاقة إيجابية .

**shouk_1987** · 24-05-2010 11:21 AM

الحال من بعضه يا باشا
أنا برده بكالوريوس و كلها كام شهر و أشوفك هناك
أنا والدى و أخويا إعفاء نهائى نظر و أخويا التانى خرج إرجاء و خد تأجيل فاعفاء
أنا نظرى -4 و عند فلاتفوت عظم و متعشم فى حاجة فيهم تطلعنى
بس برده خليك عارف إن اللى ربنا كاتبهولك هيكون فامتزعلش أوى ياعنى

**mohamed9999** · 24-05-2010 11:24 AM

المشاركة الأصلية كتبت بواسطة newhansol

هييييييييييييييييييييييية دونيا غرورة مالهاش امان

لا تخلى الماشى ماشى ولا القاعد قاعد

يا عم ماتوجعش دماغك اية الى هايحصل يعنى ماحصلناش حاجة اهة دخلنا وخلصنا وزى الفل اهة بالعكس دة خلى الواحد يتعامل مع بشر وشخصيات عمرك ما كنت تحلم تتعامل معاها

وبعدين مش جايز تاخد تأجيل

ماتقدرش البلاء قبل وقوعة

كلمة اهمس بيها فى ودنك من اخوك العسكرى السابق دة لو رسيت على عسكرى يعنى الجيش ما هوة الا (مركز التدريب )
عديتة يا بطل من غير ماتتعقد وتعيطلك مرةولا اتنين يبقى انت كدة جدع قوى وجيشك عدى على خير والباقى كلة كلام فاضى

ربنا معاك ويسهلك الحال وتاخد تأجيل

جاااااااااااااااامد

**heshamzaky** · 24-05-2010 11:47 AM

يا باشا اخوك خلص جيشة سنة 91 و على فكرة انا كنت فى الحرس الجمهورى و قبل الجيش كنت بأقفز بالمظلات كهواية و اخذت فرقة الصاعقة لمدة 3 شهور و طوال عمرى كنت امارس الرياضات العنيفة و كنت واخد بطولة الجمهورية فى الكونج فو يعنى طوال عمرى خشن الطباع شوية بس لما دخلت الجيش لقيت الموضوع مختلف عن الراضة فى النادى و انا بروحن نوادى من عمر 5 سنوات بس طبعا الجيش مش النادى و حتى فى حلقات الاشتباك مش زى ماتش لعبة بطولة بس صدقنى و الله ستتعلم فى الجيش ما لم تتعلمة فى حياتك وانت عندك 21 سنة مثلا طبعا ممكن التجربة تكون قاسية بس انت شخصيا حا تتغير ودة مش حتعرفة الا لما تكون مسؤل عن اسرة او جماعة انا معاك انك بتلاقى سنة و 3 شهور ضاعو من عمرك بس النظام عندنا كدة خد النحية الايجابية علشان متحسش ان جيشك ظويل وتزعل على طول و ممكن تفكر تعمل هروب ويبقى يومك مش فايت احسن حاجة توكل على الله و اهى علقة و تعدى و بعد 25 سنة تحكى لاولادك حكاوى و تفتكرها و تضحك

**ahmed2y** · 24-05-2010 12:52 PM

يا عم سيبها على الله والى مكتوبلك هيكون

**M.Osman** · 24-05-2010 02:20 PM

معلش يا ابو حميد

احب ابشرك

انك حتى لو مدخلتش الجيش ...
هتشوف ايام ما يعلم بيها إلا ربنا ... في تحضير الإجراءات و المنطقة و الكشف الطبي و الهبل دا كله

انا مدخلتش الجيش الحمد لله
بس اتبهدلت بهدلة السنين اليومين بتوع الإجراءات و الكشف و القرف دا ...

حسبي الله و نعم الوكيل

**M.Zaher** · 24-05-2010 02:38 PM

ولا يهمك ياباشا اصبر و ان شاء الله تاخد تاجيل

الحمد لله انا اتفرجت عليه فيديو بس

**shaddadfalcon1** · 24-05-2010 03:02 PM

المشاركة الأصلية كتبت بواسطة m.osman

معلش يا ابو حميد

احب ابشرك

انك حتى لو مدخلتش الجيش ...
هتشوف ايام ما يعلم بيها إلا ربنا ... في تحضير الإجراءات و المنطقة و الكشف الطبي و الهبل دا كله

انا مدخلتش الجيش الحمد لله
بس اتبهدلت بهدلة السنين اليومين بتوع الإجراءات و الكشف و القرف دا ...

حسبي الله و نعم الوكيل

انا قدمت ورقي في شهر 10 2006 واخدت الأعفاء في شهر 7 2007
سنه كل يوم والتاني رايح علي المنطقه لما جيت في ايام كنت بقول ياريتني دخلت الجيش

شفت ايام والله العظيم يمكن اسود من دخول الجيش نفسه

**eng_ahmedryad** · 24-05-2010 03:15 PM

موضوع أنك تأخد خبرة والكلام ده موضوع نسبي جدا يرجع لشخصيتك وللمكان اللي هاتخدم فيه

لكن في الأول والأخر كله رزق من عند ربنا

يعني لو مكتوبلك رزق دلوقتي هاتخده ومش هاتدخل الجيش

ولو دخلت يبقا ماكنش ليك رزق دلوقتي

ولما تخرج هتلاقي رزقك مستنيك

**mohamed9999** · 24-05-2010 03:46 PM

المشاركة الأصلية كتبت بواسطة shaddadfalcon1

انا قدمت ورقي في شهر 10 2006 واخدت الأعفاء في شهر 7 2007
سنه كل يوم والتاني رايح علي المنطقه لما جيت في ايام كنت بقول ياريتني دخلت الجيش

شفت ايام والله العظيم يمكن اسود من دخول الجيش نفسه

وانا كمان بس خدت تاجيل وبعدين اعفاء والكلام دا فى 2002

وكله كوم ويم الكشف الطبى والقطره بتاعة العين دى كوم تانى تخليك متعرفش تقفل عنيك فى الشمس ولا تفتحها