متى سينتهى مسلسل حوادث كورنيش الاسكندرية

**adhamsabry51** · 06-06-2010 07:36 PM

والله يا جماعه اصل لنا شايف انها مجموعة مشاكل بصراحه يعني واحده مره بتعدي من عند جليم فوق النفق و شايله بنتها و جره التانيه و بتعدي غباوه و جره بنتها التانيه في ايدها طبعا يعني كمية فرامل مش حاقولك
واحد تاني جارر واحد في ايده و علشان يعمل برم ييجي يعدي من قدام عربيتك و هو بيبصلك و انت و مزاجك يتنزل تروقه يا تكبر حصلت معايا من فتره في شارع جمال عبد الناصر و احده ست و بتعدي و رميه نفسها طبعا مش قادر لقف ورايا واحد لازق فيا و جنبي عربية طالعه من الشارع ما كان مني ال اني خدت سنه شمال و رميت شويه علي اللي طالع و هو اخد باله فوقف و طبعا هي شتمت حتعمل ايه بقي طبعا تبلع و تسكت
و طبعا مجموعه من السائقين عديمي الذوق اللي ممكن يستني يعدي حد و مالوش مزاج يعمل كده و دي بتحصل كتير يعني الأسبوع اللي فات و احده ست كبيره اوي و محنيه جدا بتعدي من عند سينما ريو عندنا انا بصراحه مكنتش شايفها بس لقيت واحد سواق تاكسي وقف و طله ايده من الشباك بيشاورلي اقف فوقفت قلت اكيد في حاجه انا مش شايفها لقيت الست دي بتعدي لما جيت عملت زيه و شاورت للعربيات و لا كانك عملت حاجه و كله طاير منتهي قلة الذوق
فانا بصراحه شايف ان الموضوع عاوز شوية ذوق و يرجعوا علي الأقل الأشارات مش حاقول انفاق تاني و اعتقد ده ممكن يساعد كتير

**misoalex** · 07-06-2010 01:58 AM

المشاركة الأصلية كتبت بواسطة بحري

اتصورت قبل مدخل ٤٥ مش كده؟

كنت طالع من مدخل 45 وداخل على الدولى فى اتجاه كارفور

**hany_mohamed** · 07-06-2010 08:59 AM

المشاركة الأصلية كتبت بواسطة adhamsabry51

والله يا جماعه اصل لنا شايف انها مجموعة مشاكل بصراحه يعني واحده مره بتعدي من عند جليم فوق النفق و شايله بنتها و جره التانيه و بتعدي غباوه و جره بنتها التانيه في ايدها طبعا يعني كمية فرامل مش حاقولك

لا ملكش حق يا أدهم بك صبرى الشكاوى دى للناس العادية اللى زينا كده
انما انت مش عاوز تتعب نفسك و تطلع من العربية وهى ماشية بسرعة وتعدى الست وبناتها و بعدين ترجع تنط تانى فى العربية وكل دة مش هياخد منك ثانيتين ... أنت عجزت والا أيه يا أدهم بيه عن ايام ما كنا بنقرا لك

**goge** · 07-06-2010 11:13 AM

بصراحة احنا حكايتنا مع الكورنيش مفيهاش عمار لان اصابة زوجى كان سببها عربية بسرعة 120 كم على الكورنبش و الكلام ده كان سنة 90 قبل التوسعات و الانفاق و الكلام ده
احنا اول مرة ننزل بعربية زوجى اسكندرية الايام ده و كنا بنطلع بيها ع الكورنيش و احنا بنتشاهد بس الحمد لله ربنا بيسترها بس بصراحة انا شخصيا بارفض انى اسوق على الكورنيش لان فعلا الالتزام بالحارات المرورية منعدم و كمان اماكن اليوترينات غير واضحة الا بالاسهم اللى على الحارة يعنى لو ماخدتش بالى هاجبر انى اللف و ادور فى حلقات مفرغة
اما بالليل فعلا لما اكون راكبة فى تاكسى باحس ان السواق داخل سباق سيارات غبي بجد اعصابى بتوجعنى خاصة لو اجبرت انى اقعد جنب السواق
لما بكون قاعدة ورا بحاول انى ابص على اى حاجة و لا انى ابص ع الطريق بس مش بقدر لانى بطبيعتى بحب اتفرج ع الطريق من الزجاج الامامى علشان اشوف الطريق كله طبع زفت اتعودت عليه من صغرى و بادفع تمنه فى اسكندرية من سباق السيارات و العبور الانتحارى

**adhamsabry51** · 07-06-2010 05:10 PM

المشاركة الأصلية كتبت بواسطة hany_mohamed

لا ملكش حق يا أدهم بك صبرى الشكاوى دى للناس العادية اللى زينا كده
انما انت مش عاوز تتعب نفسك و تطلع من العربية وهى ماشية بسرعة وتعدى الست وبناتها و بعدين ترجع تنط تانى فى العربية وكل دة مش هياخد منك ثانيتين ... أنت عجزت والا أيه يا أدهم بيه عن ايام ما كنا بنقرا لك

اي و الله السن له احكام بقي

**mirageman** · 07-06-2010 05:49 PM

خد مني الزبدة بقى
بص ياسيدي المشكلة في الكورنيش مش في التصميم خالص بالعكس الكورنيش معمول بشكل رائع جدا ونظام اليوتيرن فيه هوا دا النظام العالمي المروري الصح وهتلاقي ان اي طريق على البحر بتبقى في ملفات كدا يعني دا طبيعي جدا
امال ايه بقى الي مش طبيعي
الي مش طبيعي الشعب السكندراني نفسو ( انا اسكندراني قبل محد يشتم )
لما تبقى ماشي في طريق متحدد في الحارات بعين القطة الي لو لومستها بترج العربيه والي جواها
ومع كدا تحس انا العربية الي قدامك تحس انها بتتزحلق على الطريق بالتصوير البطيء
تبقى انت اكيد في اسكندرية
لما تفلب نور للعربية دي وتهريه كلكسات وكانك بتزمر لحد تاني وممكن بعد متعديه يبصلك نظرة اشمئزاز ( على اساس ان العربيه كانت بتتزحلق هيعملك ايه يعني )
يبقى انت اكيد في اسكندرية
لما تبقى ماشي على الطريق الدولي وتلاقي التريلات ماشيه اسرع من العربيات وهي الي بتاخد الغرز هي والميكروباصات والعربيت مغلوبة على امرها مش بتعدي ال80 ومتعرفش اختراع اسمو التجاوز ماشيين برضو على نظام الزحلقة
يبقى انت اكيد اكيد اكيد في اسكندرية
لما تلاقي التمنات في شوارع العجمي تتعامل على اساس ان كل تمناية مفيش حد غيرها في الشارع يقف مطرح مهوا عايز يمشي عكس يمشي بالعرض يقف بالعرض تحس انك وسط مباني عشوائية من عشواقيات السيدة زينب في القاهرة
يبقى انت اكيد في alexxxxxxxxxxxxxxxxxx

**hany_mohamed** · 07-06-2010 07:18 PM

المشاركة الأصلية كتبت بواسطة goge

بصراحة احنا حكايتنا مع الكورنيش مفيهاش عمار لان اصابة زوجى كان سببها عربية بسرعة 120 كم على الكورنبش و الكلام ده كان سنة 90 قبل التوسعات و الانفاق و الكلام ده
احنا اول مرة ننزل بعربية زوجى اسكندرية الايام ده و كنا بنطلع بيها ع الكورنيش و احنا بنتشاهد بس الحمد لله ربنا بيسترها بس بصراحة انا شخصيا بارفض انى اسوق على الكورنيش لان فعلا الالتزام بالحارات المرورية منعدم و كمان اماكن اليوترينات غير واضحة الا بالاسهم اللى على الحارة يعنى لو ماخدتش بالى هاجبر انى اللف و ادور فى حلقات مفرغة
اما بالليل فعلا لما اكون راكبة فى تاكسى باحس ان السواق داخل سباق سيارات غبي بجد اعصابى بتوجعنى خاصة لو اجبرت انى اقعد جنب السواق
لما بكون قاعدة ورا بحاول انى ابص على اى حاجة و لا انى ابص ع الطريق بس مش بقدر لانى بطبيعتى بحب اتفرج ع الطريق من الزجاج الامامى علشان اشوف الطريق كله طبع زفت اتعودت عليه من صغرى و بادفع تمنه فى اسكندرية من سباق السيارات و العبور الانتحارى

لان ابسط قواعد المرور محدش عارفها وكل اللى اتعلمناه فى العربيات هو ازاى نتحرك بيها اما القيادة بشكل أمن لى ولغيرى فهذا غير موجود بالمرة
أسف للحادث الخاص بزوج حضرتك وأرجو الا يكون ترك اصابة مستديمة

**hany_mohamed** · 07-06-2010 07:29 PM

المشاركة الأصلية كتبت بواسطة mirageman

لما تبقى ماشي على الطريق الدولي وتلاقي التريلات ماشيه اسرع من العربيات وهي الي بتاخد الغرز هي والميكروباصات والعربيت مغلوبة على امرها مش بتعدي ال80 ومتعرفش اختراع اسمو التجاوز ماشيين برضو على نظام الزحلقة

الدولى ...الدولى .... مش الطريق ده بيدوا فيه تذكار برضه على العربية يعنى خشبة أو زلطة متغدية كويس تلبس فى الازاز
ولا قصدك الطريق نفسة اللى داخل فيه مفقود والخارج منه مولود

باشا من واقع انى لفيت معظم محافظات المحروسة الاسكندرنية اهدى ناس فى السواقة
اطلع بس اى كوبرى او الدائرى فى القاهرة بس يكون فى وقت مش زحمة
أو شارع صلاح سالم و قولى رأيك