قريت النهاردة على اليوم السابع خبر انتحار شاب (30 سنة)، عاطل و فشل في إنه يلاقي شغل فاصابه اليأس و الاكتئاب و انتحر بإنه رمى نفسه من الدور الخامس في البيت اللي بيسكن فيه مع والده في مدينة الشيخ زايد (ده غير الشاب اللي انتحر أول امبارح و شنق نفسه على كوبري قصر النيل)

هو فعلا يا جماعة مافيش شغل في البلد؟ ممكن حد يفضل عاطل سنين و بعدين يوصل لدرجة إنه ينتحر يأسا من الحياة و من إنه يلاقي شغل؟

طيب هل العاطل ده بيبقى دور على شغل في كل حتة و دور على أي شغلانة و مالقاش حاجة خالص يشتغلها فبقى عاطل؟ و لا عاطل عشان عايز وظيفة معينة بمرتب ما يقلش عن كذا و تكون قريبة من البيت؟؟

مش عارفة ليه مش باسمع حد بيقول لي إن فلان بقاله كام سنة في البيت بعد التخرج عشان مش لاقي شغل مش باتعاطف معاه و شايفة ان مع احترامي للجميع البلد فيها شغل كتير. طبعا احنا بنتكلم عن أي شغل، مش وظيفة معينة بالتحديد.

أقصد ان اللي عايز فعلا يشتغل بالتأكيد هيلاقي شغل و ربنا هايرزقه و يكرمه طول ما هو بيسعى، إنما اللي قاعد في البيت يتشرط و يتنك ع الوظايف و بعدين يقول مش لاقي شغل، ده ربنا يرزقه ازاي و هو قاعد في بيتهم؟

و بعدين مين فينا اتخرج و اشتغل الحاجة اللي هو بيحبها أول ما اتخرج أو الحاجة اللي هو عايزها؟ مين فينا ما اتمرمطش في وظايف هو مش حاببها و لا عايز يستمر فيها يوم واحد، انما عشان قاصدين وجه كريم و عايزين فعلا نشتغل ربنا كرمنا بعد كده من وسع.

دي كانت خاطرة بس كده ع الماشي.