الموضوع: أسعار الشقق في مدينتي ...... شئ مستفز للغاية

بصراحة اللى بيحصل في المدن الجديدة وخاصة في مشروع مدينتي ... حرام ... حرام ... وشئ مستفز للشباب والمطحونين ....
المهم أنا اتصلت انهاردة علشان أسال عن اسعار الشقق في مدينتي ... ويا ريتني ما سألت ... اليكم التفاصيل:

إجمالى سعر الشقة 82 متر ( صافي 60 متر تقريبا) بدون تشطيب 530 الف جنية في حالة السداد على 10 سنوات، والأقساط كما يلي:

دفعة مقدمة 21000
دفعة تعاقد بعد 3 شهور 21000
قسط سنوى 21000
قسط شهري 2150
الدفعة المستحقة بعد 45 شهر21000
الصيانة31000
الاجمالي : 530000
يعني تقريبا سعر المتر الصافي حوالى 9000 جنية يا بلاش. وحتى بعد خصم الفوائد بسسب التقسيط بيطلع سعر المتر حوالى 5000 جنية وهي على الطوب يعني بدون تشطيب

تعالى نحسبها الشقة اتكلفت كام على الأخ هشام طلعت مصطفي:

أولا : الخرسانة:
80 متر مربع تقريبا يحتاج من 20 الى 25 متر مكعب خرسانة ، وده تكلفته تقريبا 500 جنية ( بالنسبة للشخص العادي يعني في المشروعات الكبيرة بيكون أقل بكتير بسبب الانتاج الكبير والخصومات) ،
يعني تكلفة الخراسانات تقريبا من 10000 الى 12500 تقريبا ، قول 15000 على أكثر تقدير.

ثانيا :تكلفة المباني ( الطوب والاسمنت والرملة):
قول مثلا لشقة مساحتها 80 متر حوالى 8000 جنية ، نقول 10000

ثالثا: المحارة والحلوق الخشب:
تقريبا من 7000 الى 10000

رابعا : نصيب الشقة من المرافق والخدمات العامة:
10000

خامسا: ثمن الأرض:
وعلى الرغم من أنه واخدها ببلاش طبعا ، نقول نصيب الشقة 5000 جنية

إذا الاجمالى : 15000 + 10000 + 10000 + 10000 + 5000= 50000 جنية ، وبتتباع بنصف مليون جنية ، يا بلاش ولا تجارة المخدرات.

وطبعا الفكرة كلها من دقنه وافتله .... لماذا؟ .... لأن الاستلام بعد 5 سنوات ، يعني بعد ما يكون المشتري سدد ما يقرب من ربع مليون (250 الف جنية) ،

وهنا هتلاحظ إن عائد استثمار هذا المبلغ لوحده لمدة سنتين فقط يغطي تكاليف الشقة بالكامل .

وقبل ما أنسى المشروع مبني على 50 كليو متر مربع ، على حسب الكلام المباني على 30 % يعني المبني 10 كيلو متر مربع ... أحسبها أنت وشوف كام شقة وكام فلة وكام متر ، وبالمرة كام مليار ... واللهم لا حسد.

بصراحة أنا مش لاقي كلام أقوله .... بس حاسس بنوع من القرف والاستفزاز من جشع وطمع الناس دي.

ممكن حد يقولي هو في ايه بالظبط وايه اللى بيحصل ده ....