كل شئ عن بيجو305

**aboomar22** · 10-08-2010 04:16 PM

هو حضرتك بتسال عن 305 ولا 405 خلينا فى ال305
طبعا الفرق بينهم كبير دى فئة ودى فئة اخرى واكيد 405 يكسب عربية محترمة جدا واحدث طبعا وفيها اوبشنز كتير
اما الجنط ال3 او الاربعة خرم نظرا لان الجنط الاسبور ال3 خرم نادر ومش موجود الا قليل فبيتم التعد يل الى 4 خرم لانه متوافر واشكاله كتيرة جدا
اما الكبالن طبعا لازم تتغير لما تستهلك زى اى جزء فى السيارة لازم يتغير لما يستهلك وكمان ممكن تتصلح لو انت استعمالك كويس هتعيش معاك كتير
اما السخونة لل 305 لان المروحة ديركت مع الموتور اى بتدور مع دوران الموتور بواسطة سير فهيا غالبا بتسخن فى الزحام والاشارات الطويلة لكن ممكن تركب مروحة كهرباء مع العادية بتساعد كتير قوى (هايلة ) بس مع العادية لان طلمبة المية والمروحة سير واحد
اما امكانية السفر هى واسعة ومريحة وبتجرى يعنى لو حالتها كويسة سافر ليه لا على فكرة الطرق الطوالى مبتتعبش العربية زى الزحمة بالعكس بتريحها اكتر

ممكن استعمال بنزين 80 او 90 طبعا مفيش اى مشكلة واستهلاكها حسب حالة الكربراتيور بتاع حضرتك يعنى نقول اكتر من 128 شويه
التكييف فيه موديلات ال ثمانينيات فيها تكييف وممكن تركيب تكييف لو الموتور حالته كويسة بس انا بفضل العربيات اللى بتيجى مكيفة اصلا

**dr_haitham79** · 11-08-2010 02:04 AM

كنت بسأل عن ال 305
انا جبت سيرة ال405 عشان الكلام كان عن استخدام الكبالن بتاعتها فى ال305

شكرا على الاهتمام و الرد

ممكن سؤال عن الموديلات من 305 اللى بدات تنزل بالتكييف

وسؤالى اللى فات وبكرره:
تمن كبالن ال405 دى فى حدود كام
وعن الفرق فى الاداء بين ال305 اللى دفعها امامى والعربيات اللى الدفع بتاعها خلفى

**fawzy_i_05** · 27-08-2010 02:06 PM

السلام عليكم
انا مقبل علي شراء سيارة 305 بس انا خائف من غلاء اسعار قطع الغيار خصوصا الكبالن سمعت انها 1500 جنيها كمان موضوع العمة ده قلقني وانا مش بفهم في المكانيكا خالص يدوب علي قدي
مواصفات العربيه اللي رحت شفتها
موديل 80
مرفوعه 3 سنوات
حالة الموتور 70 %
حالة الصالون الفرش جيد
2 زجاج كهرباء امامي
فتحة سقف
مطلوب 12500
اخلص فيها بس هو صوت المتور عالي شويه ده طبيعي ف 305 ولا لأ
برجاء الرد للافادة

**hithemsh** · 29-08-2010 12:50 PM

السلام عليكم اخوانى

انا بدور على واحده 305 للبيع ... حد يقدر يفيدنا ..؟؟

السلام عليكم

**seaman66** · 08-09-2010 06:11 AM

انا معى 305 موديل 80 استهلاك البنزين كويس 240 كيلو للصفيحة وده جميل جدا بالنسبة للموديل وتاريخ الصنع

**MEDO84EG** · 04-01-2011 09:38 AM

بصراحه متابع باهتمام و اتمني المشاركه من كل اصحاب ال 305

**temraz1981** · 08-01-2011 03:09 PM

السلام عليكم ورحمة الله وبركاته
انا ناوى إن شاء الله اشترى بيجو 305 موديل 82 العربيه حالتها ممتازه الموتور 70% ودواخل فابريقه الكبالن مش وحشه بس فى طقه خفيفه فى الكوبلن اليمين مع الملفات غير كده مافيش اى مشكله فيها.
العربيه دى تساوى كام لأنى محتار بالنسبه لقطع الغيار علشان ناس كتير قالتلى مش حتلاقيها وغاليه؟؟
ارجو الافاده فى سعر الاسد الفرنسى
وشكراً جزيلاً