الموضوع: مع منصور انت تحت رجلينا

السلام عليكم....
الموضوع ده مخصص لكل من يفكر فى شراء سياره وكليها هو منصور الذى هو شعاره (مع منصور انت تحت رجلينا)

المهم...

نظرا لخبرتى مع هذا الوكيل
و الخبره دى من خلال 7 عربيات اوبل
بدات من فيكترا موديل 1994 وصولا الى فيكترا 2008 مرورا بالاسترا 2006
و البعض هيستغرب و يقول انت جيبت العربيات دى امتى ده انت كلك على بعضك 19 سنه
فعلا انا لم امتلك كل هذه العربيات
بس والدى امتلكهم كلهم
و الاسترا و الفيكترا الحاليه كانو من نصيبى انا و انا الى بتعامل مع منصور بشكل شخصى و ليس الوالد
اما باقى الاوبل الى امتلكناه كان والدى هو الى بيتعامل معاه و حقيقه لم يكن الوكيل بهذا السوء لانه كان "فاضى"
اوبل و بس

ندخل فى صلب الموضوع و هو توضيح الطريقه الى بيتعامل بيها منصور مع العميل

اولا العميل ده عباره عن كيس فلوس كبير
..اهبل و عبيط
و قبل ما يركب اوبل او شيفروليه كان يمتلك فيل او عربيه كارو و ليس له اى خبره فى طرق السواقه ولا يستطيع هذا العميل المليان فلوس انه يحس بعيب عربيته

اولا المبيعات:

اولا مندوب مبيعات منصور يتميز بعده اشياء اولها الكدب و ياتى من بعد الكدب الصياعه و الفتى و الاستهبال

مثلا اذا سالته عن بلد تقفيل السياره
يقولك المانى و تكتشف بعد كده ان السياره تقفيل بولندى او اسبانى
كما حد فى سياره اوبل استرا هاتش باك و استرا سيدان و الاسترا الجديده الى كانت متواجده فى معرض اوتوماك

تانى حاجه اذا واجهته بعيب معروف عن السياره تجده مستغرب من هذا العيب اللعين
و يدعى ان هذا العيب مستحيل يحدث فى السياره...
و يسترسل فى الكلام عن مدى جوده سيارات اوبل...
و عن مدى امانه المنصور للسيارات...
و ان اى مشكله تحدث لا قدر الله المنصور للسيارات بيحلها فى اسرع وقت و ببراعه لا مثيل لها


فثلا اذا قلت للمندوب هل فعلا يوجد نتشه او تقصيره فى نقله الفتيس الايزى ترونيك (و ده اصلا مش عيب ده نظام سواقه يعنى عادى مفيش مشاكل)
تلاقى المندوب يبصلك مندهش
و يرد بعكس كلامك


ان الفتيس ده مصمم لانه ينقل بسرعه و سلاسه شديده و محدش اشتكى منه ابدا
طبعا الكدب بتاع المندوب هيكون مستمر معاك فى معاد التسليم بتاع عربيتك
و قد يصل الى كماليات العربيه

كما حدث معى و مع كل مالكى اوبل فيكترا 2008 توب لاين حين قال منصور
انها تحتوى على برنامج اتزان اليكترونى و كان يفتخر انها الوحيده فى فئتها و لكن كانت هذه كذبه حقيره من الوكيل

طبعا الى هقوله ده قد يكون مفاجاه و لكن لازم اقول
مبدئيا كده مش معنى انك اشتريت عربيه عليها الورق الابيض و لسه معلقتش نمر من منصور انه العربيه دى زيرو
ايوه بورقها الابيض و مش مترخصه
بس قد تكون اى سياره مستعمله افضل منها
لان ببساطه سياره سيادتك من منصور عادى جدا انها تكون عامله حادثه
اضف الى ذلك الغباء فى تصليح السياره

مثال بسيط
عربيتى الفيكترا الى انا شاريها من منصور وواخد عربيتى من المخزن بتاعهم
اكتشتف انها راشه جزئين فى الكبوت
عرفت منين ؟؟

بكل بساطه احب اقولك انها لون الجزء المرشوش مختلف عن باقى الكبوت

المفاجاه كمان ان الرفرف طلع مرشوش و السقف مشكوك فيه
فياريت حضرتك تعرف ان مش كل الى عند منصور زيرو

و عشان محدش يقول ان عربيتى هى الوحيده الى منصور رشها و حظى طلع وحش
احب اقوله لا مش انا الوحيد
انا اعرف واحد جاب فيكترا و فى صيانه ال 5000 منصور قالوله دى واخده خبطه جامده مسمعه فى الشاسيه !!و هو برده شارى العربيه من منصور
ده غير انى بشوف بعنيا عربيات كتير جدا زيرو فى فروع منصور بتترش
و شفت بعنيا عربيه فيكترا فى معرض من معارض منصور فيها قلم بويه فى الاكصدام هههه دى مسخره والله....




ده كان الجزء المخصوص بالمبيعات



ما بعد الشراء :


فاكرين جزئيه الفتيس الى اتكلمت عليها و موضوع النتشه ؟؟
ده حصلى شخصيا
المهم بعد ما استلمت لقيت الفتيس بيتاخر فى النقله و كده
فروحت للمندوب الى كان قالى لا مفيهوش حاجه
كان رده اه يا باشا دى معروف عن الفتيس ده كده و دى ميزه مش عيب
روح الصيانه يظبتهولك

كلامه اتقلب العكس تماما
يعنى الاول كان عاوز يبيع و خلاص
دلوقتى باع و خلاص و انت اخبط راسك فى الحيطه


الصيانه :
اولا صيانه العربيه بتتم بنظام جديد بيوفر الوقت و الجهد و هو نظام "شقلب و اقلب"
يعنى مثلا حضرتك بتقول فى صوت من العفشه يبقى الحل هو تربيط العفشه ولا يوجد اى احتمالات اخرى ليه ؟؟
لانه كده كده هيربط عفشه

طيب حضرتك بتشتكى من ضعف السحب يبقى الحل ايه ؟؟تغيير الفلاتر لانها كده كده هتتغير

و من العادى عند منصور انه يغير قطعه غيار لا تحتاج للتغير

هو بس بيغيرها عشان يدارى على حاجه تانيه
مثال على كده
عربيتى عند 15 الف كم الطنابير الخلفيه باظت
بقى فيها عالى وواطى ريجه يعنى
و انا مش واخد بالى
فى الصيانه طبعا شافوها

لو قالولى الطنابير بايظه كده هقولهم غيروها فى الضمان
لكن منصور اذكى من كده
جم قالولى التيل الخلفى خلصان تماما و انت مشيت عليه كده كتير
و بالتالى الطنابير باظت

كده منصور استفاد انه خد منى 450 جنيه تمن التيل الجديد مع ان القديم سليم
و خلع من عيب صناعه فى طنابير العربيه

ملخص الكلام ان مش كل الى يقولو هنغيره يبقى فعلا محتاج يتغير.



كمان خلى بالكو ان مش كل القطع اصليه
التيل مثلا فى تيل صينى و مصرى و هندى و اسبانى و المانى
و الاسعار تبدا من 150 جنيه و انت طالع لحد 600 جنيه
يعنى تبقى فى التوكيل و تركب تيل مضروب

و عادى انك تقوله ركب المانى و هو يركب هندى و انت تدفع تمن الالمانى

اثبات عيب فى سيارتك



دى فعلا نقطه صعبه جدا و بتفكرنى بنفسى لما كنت بحاول اقنع الوالد انى مذاكر لما شيلت ماده فى اولى ثانوى
المعوقات الى بتواجهك هى غباء و تناحه و استهبال المهندسين الا من رحم ربى
يعنى تقول للمهندس اهو صوت التزييق اهوووووووووو
يقولك لا انا مش سامع حاجه

او لو الصوت عالى اوى بيتحرج يقول مش سامع
فبيقولك اه طبيعى يا باشا متقلقش
زى مره بقول للمهندس المساعدين بتزيق حاول ينكر الصوت معرفش
اضطر انه يعترف بوجوده

و الحل كان ايه ؟؟


قالى خد رقمى لو الصوت زاد كلمنى هههه

و فى الصيانه الى بعدها كان الحل بتاع نفس الصوت انهم رشو سبراى من الى بيرشوه فى الابواب على العفشه
اول مره اسمع عن عفشه بيترش عليها سبراى

نستنتج من الكلام ده ايه
؟
ان لما انت تجيب عربيه من منصور و يظهر فيها عيب
سواء كان عيب صناعه او عيب استخدام منك
مفيش حل
ايوه مفيش حل


اانا بقالى 30 الف كم عندى تزييق فى الابواب و العفشه و السقف مفيش حل ليهم


فما بالك بمشكله كبيره فى سياره هيعملو فيها ايه ؟؟



حادثه لعربيتك


لو لا قدر الله حصل حصل حادثه لعربيتك و وديتها منصور تتصلح
اولا
لو الاكصدام مخبوط
بس مثلا فيه هوايه سليمه او اى جزء يمكن يتفك من الاكصدام
الجزء ده بيتسرق من عربيه سيادتك
و بيتباع لوحده
و تمنه بيدخل جيب المهندس او الفنى الى "لحق"وسرقه


و اتعرض عليا هوايه فوج من فنى فى منصور

كمان لما حضرتك تحاسب على عربيتك بعد الاصلاح

مش كل المبلغ قطع غيار و مصنعيات لعربيتك

لا

ده انت بتحاسب على حاجات لعربيات تانيه
مثال
عربيتى كانو بيعملو مشكله فى فتحه السقف
استخدمو فيها 3 علب سبراى من انواع مختلفه
و انا رفضت انى ادفع لان العيب كان عيب صناعه
لقيت المهندس بكل بساطه قال للفنى
حط ال 3 علب دول على اى عربيه عامله حادثه
قلتله لا
لو كده يبقى ادفع تمنهم
قالى لالا خلاص هنحطهم على عربيتك و نحسبها فى الضمان
اه بالمناسبه مشكله فتحه السقف متحلتش دى زادت



السمكره و الدوكو



اولا بيتم استخدام ارخص انواع البويات و ارخص المكونات
تانى حاجه مستوى الشغل سىء جدا جدا

لك ان تتخيل ان لما رشيت اكصدام عربيتى هناك

طلع مفارق لون بشكل رهيب عن باقى العربيه
و فيه حته معملوله بقلم بويه
هههه

و بأكد كلامى دى مرشوشه فى التوكيل


توافر قطع الغيار



انا مش هتكلم كتير بس هقول مثال بسيط
فى يوم من الايام عملت حادثه و كنت محتاج
اكصدام و رداتير و سربنتينه تكييف و فوج شمال و هوايه فوج و بخاخه فانوس

الكلام ده فى سنه 2009 و العربيه موجوده فى السوق من سنه 2007

الى كان متوفر لدى منصور هو الفوج و بخاخه الفانوس و الباقى
ادامه شويه

فرع قالى 10 ايام

فرع اخر
قالى
20 يوم

فرع تالت قالى اجيبهملك بكره الصبح بس تدفع 8000 جنيه شحن جوى !!!

و الاسترا انتظرت 6 شهور كامله عشان احصل على فانوسين و بقالى 3 سنين منتظر وصول ايرباج سيارتى الاسترا الى انا اصلا بعتها


سعر قطع الغيار


لك ان تتخيل ان فانوس عربيه سعرها يبدا من 150 الف و يصل الى 175
يكون 7000 جنيه
و اكصدامها ب 4000 جنيه
و الرداتير ب 4000 جنيه

فى حين ان المنافسين
اسعار قطع غيارهم النص !!
و مش قصدى على عربيه معينه فقط ..انا قصدى ان طبيعه منصور هى المغالاه فى اسعار قطع الغيار





ازاى المهندس بيسوق عربيتك ؟

المهندس بيركب عربيتك
و بيشغل المحرك النفاث بتاع عربيتك

و لو فى سبورت مود فى العربيه بيشغله

و ينطلق انطلاقه تعادل انطلاقه مايكل شوماخر فى حلبات السباق

و رجل الباشا قربت تطلع من كبوت العربيه من كتر ما هو كابس بنزين

و السرعات تصل الى 160 كم فى الساعه

و انت اصلا ممكن تكون بتشتكى من ضعف التكييف و الموضوع لا علاقه له بالسرعه
ويا ريت متستغربش لما تلاقى المهندس بيشد مع حد

او بياكل الطريق كله من التراب

او بياخد غرز ثلاثيه و رباعيه بين العربيات

و نظره الانتصار مرسومه على وجهه
و كل هذا يفعله المهندس لانه شايف انك اولا فلوسك كتير و عبيط و مش تعبان فيها

و كمان انت مش فاهم حاجه و يمكن مفكر انك مش بتعرف تسوق و بيعلمك درس فى السواقه و بيعلمك كيفيه عمل الغرز
و هو لا يدرى ان مالك السياره الذى يجلس معه فى السياره بيعرف ياخد بيها 20 غرزه ورا بعض و بيعرف يعمل كل شىء





وصلنا لنهايه الموضوع و هختم الموضوع ببعض مقتطفات سريعه عن منصور حدثت معى شخصيا و متنوعه:
1-فى صيانه ال 5000 المهندس بيفتخر بان تكييف الفيكترا لا يؤثر نهائيا على السحب
فى صيانه ال 25

نفس المهندس بيقول ان التكييف طبيعى ياثر على الموتور و يسحب من قوته 200 سى سى ههههه عشان انا اشتكيت من ضعف السحب مع التكييف

2
-العربيه على الغيار الاولانى الار بى ام بيطلع و ينزل بشكل غير طبيعى كان رد المهندس عادى يا باشا طبيعى طبيعى

3-الفتيس بيعمل صوت خبطه و هو بينقل و رد المهندس لا تقلق مش هيبوظ

4-صوت تزييق عند فتح و قفل فتحه السقف و رد المهندس استخدمها كتير عشان تلين مع انى بفتحها كل يوم ميقلش عن 6 مرات

5-لما العربيه تحدف مع الفرامل رد المهندس ان امسك التاره كويس و سوق على مهلك

6-رعشه فى العربيه عند 160 الرد كان السرعه خطر يا باشا و عموما العربيه انا كشفت عليها مفيهاش حاجه يمكن بيتهيالك بس

7-ايرباج العربيه وصل من المانيا
و واقف فى الجمرك و هتستلم خلال اسبوع ...و اصلا الايرباج صناعه برازيلى جه من المانيا ازاى ؟؟؟؟؟؟؟؟؟؟؟؟؟؟؟؟؟؟؟؟؟؟؟

8-كنت بشتكى من ان ريشه هوايه التكييف اتكسرت لوحدها
كان رد المهندس فعلا ده عيب صناعه مشهور فى الموديل ده و فعلا بتتكسر لوحدها بس احنا مش بنغيرها فى الضمان

9-كنت بشتكى من خروج بخار من فتحات التكييف كان رد المهندس ان عربيتى راكبها عفريت

10-لما كسرو مسمار العجل و مش عارفين يطلعوه
قالولى روح مخرطه كويسه يعملوه

11-لما روحت اعمل مفتاح ريموت لعربيتى فى التوكيل ادولى المفتاح و قالولى روح لعباس بتاع المفاتيح خليه يخرطه

كده انا خلصت كلام



ملاحظه بسيطه:
كلامى عن الفتيس الايزى ترونيك مش معناه وجود عيب فى الفتيس ..انا كان كلامى كله عن طريقه قياده الفتيس و انا شخصيا معجب بالفتيس
العيوب الى ذكرتها من خلال الموضوع ليست عيوب معروفه فى الاوبل و لكنها عيوب فرديه فقط عيب هوايه التكييف هو المعروف
كلامى ده ينطبق على منصور بنسبه 95%
يعنى عادى ان يبقى عندك مشكله و تتحل
او يغيرولك حاجه فى الضمان
او ميضحكش عليك
بس ده بيحصل بنسبه لا تزيد عن 5% فقط
و بنسبه 95% النصب و الاحتيال و الكذب و التضليل

احب اقول كمان ان كلامى ده انا قلته عشان انصح االاعضاء هنا ...انا مش هستفيد حاجه لو حد جاب منه او مجابش ..و عشان محدش يقول انا شغال فى توكيل تانى مثلا ..
انا الحمد لله طالب فى كليه الادب و شغال مع والدى فى مجال الصناعه و السيارات بالنسبه لى هوايه و ليست طريقه للربح

انا مستعد لاى استفسارت
مستعد اسمع اى آراء
مناقشات
اختلاف وجهات نظر
والسلام عليكم و رحمه الله و بركاته