الموضوع: بتشرب مياه من الحنفيه ؟؟!!

انا عن نفسي بستخدم الفلتر ابو 6 مراحل ده والمهندس الي بيجي يعمل الصيانه كل 3 شهور لما جيه ركبه اول مره عمل تحليل للماء من الفلتر وقارنه بالماء من الحنفيه وجد فرق رهييييييييييييييييييييييب وساشع فقررت اني عمري ما هشرب ماء من الحنفيه ابدا حتى لدرجه بتوصل اني مثلا لما ازور حد وعارف ان لا عنده فلتر ولا بيشتري ماء معدني مش بشرب نهائيا , انا الحقيقه مش عارف الناس الي بتشرب ماء حنفيه مستغنيه عن عمرها ولا ايه النظام ولما اجي اقولهم ان كده غلط واضعف الايمان ركبه فلتر , يقولولي ما احنا كويسين اهو وزي الفل ومش جرلنا حاجة !!!!!!!!!!! مش عارفين ان التأثير بيبقى على المدى البعيد

من الحنفية طبعا
بقى يبقى عندنا أحد انهار الجنة و اشرب من الابار
وكما انا اخاف من المياة المعدنية والاملاح الزائدة اللى فيها
و كمان ركودها زى ما الدكتور أحمد قال بيسبب تعفنها
و ربنا يسترها معانا

المشاركة الأصلية كتبت بواسطة hamadamdph

حضرتك لو عايز خلاصة الكلام ويكون كلام دكاتره

وتاخدها من واحد في دبلومة مكافحة العدوى ومسئول عن تأمين المنشآت الصحية وما بها من مرضى مناعتهم في الارض

تعالى نحط كذا قاعدة عشان نتكلم عليها
1. لا يوجد شيء اسمه تعقيم للمياه : كلمة تعقيم معناها القضاء على كافة اشكال الحياة الميكروبية بما فيها حويصلات البكتيريا وهذا مستحيل

2. ابنك الصغير لو شرب ميا معقمة (جدلا) في بقه الميا باظت تعقيمها (يعني فم ابنك هو اللي بوظ تعقيم الميا لان بق اي بني ادم فيه ملايين البكتيريات)

3. المياه المعدنية كارثة من كوارث الزمن
- مياه راكدة غير جارية : ومن ايام المقريزي عارفين ان الماء الجاري اذا وقف اصبح ماء آسن (معفن يعني)

- مياه تحتوي على املاح اعلى من المسموح (الحد الآمن)

لسه النهارده في معهد التدريب التابع لوزارة الصحة كنا بنجري تجربة على ملوحة الميا , وجبنا ميا معدنية بيعبيها الجيش (اللي بيتقال عليها انضف ميا) وعملنا لها اختبار ملوحة عن طريق وضع كام نقطة من محلول معين ونشوف لون الميا حيتغير بعد اد ايه

الدكتور ادامنا قعد يحط نقطة نقطة لحاد ما حاط الازازة كلها وقال لنا معلش يا دكاتره واضح ان الميا دي مفيش حاجه تغلبها

حضرتك متخيل يعني ايه
كمية من الاملاح المعدنة تعمل حمل على اي كلية بني آدم

4. في فرق بين كلمتين potable & palatable
الاولى معناها ان الميا طعمها حلو يعني طعم الميا اللي احنا متعودين عليه (اللي هو المفروض تكون بلا طعم)

الثانية معناها مياه صالحة للشرب بغض النظر عن طعمها

العلاقة اللي بينهم : لا توجد علاقة
يعني ممكن ميا تكون طعمها مقبول وحلو عشان نسبة الحمضيات مثلا تساوي نسبة القلويات انما هما الاثنين نسبتهم عاليا والميا دي كده تبقى مضرة وغير صالحة للشرب


5. الطرق التي تستخدم (لمعالجة المياه) مش تعقيمها
* الكلور : افضل طريقة للقضاء على الميكروبات في المياه يعني من الآخر الميا جايه اصلا من المواسير بالكلور بتاعها ......

* الفلتره : ودي طريقة جيدة مع مراعاة الفلاتر الجيدة
من احسن الفلاتر اللي في مصر الفلتر الكربوني باناسونيك سيبك من الفلاتر بتاعة الخيط والشمعة البيضا

* استخدام التأين والاوزون (الموضة اللي طالعين لنا فيها) العيب الكبير لها لا توجد مفعول ممتد بمعنى لو مليت ازازة ميا من الفلتر وحطيتها في التلاجة بعد نص ساعة الميا بقت ملوثة ثاني

* استخدام الاشعة فوق البنفسجية (ثاني موضة) نفس العيب الكبير
+ عيب ثاني ان الاشعة دي كتر استخدامها مسرطن
+ عيب ثالث البكتيريا ممكن يتعمل لها reactivation

6. خلاصة الكلام

اشتري فلتر باناسونيك كربوني ب 300 جنيه
تغيره كل 3 شهور
انا بغير فلاتر الميا كل اول 3 شهور : اول يناير, ابريل, يوليو, أكتوبر
ازارة الميا تبقى قاعدة في التلاجة مش اكتر من 24 ساعة بلاش حكاية المصريين ان الازازة اللي عليها الدور او الاسقع هي التي تشتغل النبطشية دي والثانية تستنى
ازازة الميا متقعدش برا التلاجة اكتر من ساعتين تلاتة وبعد كده تترمي

وعيش حياتك

سلام

كلامك ميه ميه يا دكتور

وفعلا الفلتر الكربوني ده جامد جدا و احسن بكتير من الميه المعدنيه

انا على حسب الظروف لو فى الموقع يبقى من الحنفية واوقات باخد معايا زجاجة بها ماء فى البيت مياه من الفلتر ومش بشرب مياه اساسا فى الشارع

عندي جهاز تقطير
من بعد ما أتعودت عليه
بقيت أي ميه بشربها بحس بأملاحها وطحالبها
كان جاي مع الجهاز بتاع التقطير جهاز تاني بيحلل الميه
لما حللت مية الحنفية طلع ملح أصفر في قاع الكباية وطحالب زرقا علي الوش
ولما جربتها مع الميا المقطرة ... الميه غليت ومطلعش حاجة
ولما جربتها مع المياه المعدنية ..... الطحالب كانت كتييييير والأملاح زي الحنفية
للأسف مش لاقي جهاز التحليل دلوقتي
كنت بحب أجرب في كل منطقة أروحها
علي فكرة بتختلف من حتة لحتة