الموضوع: العربيه مجنناني ( موبينه - إسبراتير - كربراتير - شكمان - ...... ) الله أعلم

في الأول أحب أحيي الناس الجامده اللي منورين القسم وأقولكم عل موضوع حصل معايا بقاله فتره بس أنا كنت مأجل إني أعمل الموضوع ده دلوقتي .. بصراحة كنت مستني أحله الأول وبعدين أحكيلكم ع اللي حصل حتي تعم الفائده .. ولكن الموضوع مازال قائم

المهم هدخل في الموضوع علي طول

.. من فتر كده حوالي شهرين أو أكتر العربيه مره واحده وبدون أي مقدمات كنت ماشي بيها عادي ومره واحده كنت راكنها وبعدين قولت أدور وأمشي ،، فجأه العربيه مش بتدور صوت مارش وخلاص والعربيه مش بتنطق .. قولت أجرب أرميلها وأدور
ولكن مفيش فايده ,, المهم كلمت الميكانيكي وقالي شوف في كهرباء واصله للإسباتير ولا لأ ..المهم عشان كنت مسافر وقتها جبت ميكانيكي غير اللي بتعامل معاه و بص علي الكهرباء زي ماقولتله وفعلا زي كلام الميكانيكي بتاعي ماقالي ( إحتمال كبير تكون موبينه - أو إسبراتير )

وفعلا أخدت الموبينه بالمشط اللي فيهاوكمان الإسبراتير وسافرت للميكانيكي بتاعي وجربتهم وطلع المشكله من المشط اللي بيركب في الموبينه .. المهم قولت نجيبه إستيراد ولكن للأسف مكانش موجود خالص لأنه عندي 6 رجل واللي كان متوفر 3 رجل

المهم أعمل إيه روحت أشتريه جديد لقيت نوعين الـ 2 تقريبا صيني بس كان في واحد( مشط فقط بـ 100 أو 120 في الحدود دي ) وفي بقي موبينه بمشطها حته واحده بــ 240 تقريبا ...

وفي بقي نوع تاني اللي هوه المفروض إنه النضيف موبينه بمشطها حته واحده بــ 470 .. والراجل قعد يشكر فيها أوي

المهم قولت لنفسي أشتري الغاليه وأريح نفسي ( أنا مش من النوع اللي بيستخصر وبالذات دي حاجة مهمه في الكهرباء )

المهم إشتريتها بــ 450 جنيه وتم التركيب ومشيت بالعربيه زي الفل

... وبعد فتره يجي شهر ونص كده ... إبتدي الإشتغالات


فجأه وأنا ماش لقيت العربيه علي سرعة 100 تقريبا بتقطع .. قولت يمكن بنزين مع إني بحط 92 من إمارات مصر

المهم كلمت الميكانيكي وقولت أغير فلت البنزين ومشيت وبعدها بفتره يجي إسبوعين الموضوع حصل تاني .. طب وبعين كنت هتجنن .. لأن كمان الموضوع مش بيحصل علي طول

المهم الموضوع إستمر فتره كده يحصل معايا مره كل أسبوع أو إتنين المهم أنا كنت هتجنن روحت للميكانيك وقولتله تعالا جرب يمكن تعملها معاك ( وبيني وبين نفسي كنت متأكد إنها هتكسفني وتمشي زي الفل ) .. وعلي غير العاده العربييه عملتها معاه

واللي بيحصل كالأتي لو إنت مثلا ماشي 120 أو 110 ومثبت السرعه شويه فجأه تلاقي العربيه ( مفيش بنزين كأن دواسة البنزين مش موجوده ) وبعد ما تشيل رجلك من ع البنزين والسرعه توصل لـ 70 أو 75 تبتدي العربيه تفوق تاني .. طبعا كل ده وأنا ع الخامس

المهم قالي الشكمان بيطلع منه صوت زي مايكون عطس كده قالي العلبه اللي ورا مش كويسه روح شوفها المهم خرمناها وجربت العربيه لقيتها فاقت وبقت طياره.. قلت الحمد لله و غيرناها والعربيه بقت فله وعدي يجي شهر والعربيه معايا زي الفل

وبعدها المهم ماشي في أمان الله والعربيه عملت تاني كنت هتجنن خلاص ... طيب إيه المشكله دلوقتي .. المهم نفك الكربراتير وننضفه يمكن يكون في حاجة .. فكينا ونضفنا وبردو الموضوع بعدها حصل تاني

طيب كده إيه الميكانيكي قالي المشكله يا أما في الموبينه أو الإسبراتير وطبعا هوه عمال يدورلي علي مشط إستيراد 6 رجل عشان نجربه بس للأسف مش لاقي غير الــ 3 رجل

المهم رحتله إمبارح وغيرت الإسبراتير بواحد من عنده وطلعت جربت بس الموضوع حصل تاني .. بس هوه كان قايلس إن ممكن السبراتير اللي بنجرب بيه يكون في مشكله عشان هوه كان عنده كذا واحد المهم وأنا مروح إميارح العربيه قطعت منني وأنا ماشي ،، فضلت أحايل فيها لحد ما دارت ورحتله النهارده غيرت الإسبراتير بواحد تاني المفروض إنه سليم

المهم وأنا ماشي بيها النهارده حاسس بفرق شويه في موضوع العزم ما بين سرعه 80 إلي 100 إتحسن شويه ومحصلش الموضوع بتاع التقطيع وهروب البنزين ده ولسه بجرب وربنا يسهل بقي ونشوف إيه اللي هيحصل

ياتري المشكله هتكون من الإسبراتير ولا الموبينه ؟؟؟؟؟؟؟؟؟ إدعولي إني أخلص المشكله دي لأني كنت بفكر أبيع العربيه اليومين دول و هغير ،، وبصراحه لازم أحل الموضوع ده الأول عشان ربنا يرزقنا بحاجة كويسه كده

أخر التطورات ... إمبارح وأنا مروح ع الدائري قولت أقرص شويه ومشيت علي ١٣٠ - ١٢٠ كده شويه ... وللأسف قطعت تاني وتكرر السيناريو البايخ

وهوه إن دواسة البنزين كأنها مش شغاله لحد مالسرعه وصلت لــ ٧٥ - ٨٠ وبعدين العربيه تفوق تاني