النوبيرا و مشكلة الميكانيكية عديمي الضمير

**M.Zaher** · 21-06-2010 08:42 PM

جربت تزيت البطاحات ؟؟
و بالنسبه للحدفة دي الكاوتش بتاع العربيه حالته ايه و اعمل زوايا تاني

**samirayad** · 21-06-2010 09:55 PM

المشاركة الأصلية كتبت بواسطة wsamy

السلام عليكم و رحمة الله و بركاته,
انا روحت لميكانيكي تانى و حكيتله اللي حصل معايه, المهم ظبطلي المساعدين الخلفيين و حط فرشة كاوتش بين السوست و المساعد علشان كنت بسمع صوت خبط في المطبات و برده فضل يدور على الطقة اللي في الدركسيون صوتها جاي منين, واخر لما غلب قالي دى علبة الدركسيون. و قالي متقلقش امشي بيها كدة بس انا شغلي بعيد و لسة قلقان بصراحة خايف يكون فيه حاجة تانية هي السبب في صوت الطقة اللي في الدركسيون دي و خايف اصرف حاجة تاني و تكون العربية مش محتاجاها. انا ضبط الزوايا مرتين لحد دلوقتي بس برضه العربية بتحدف مني شوية على السرعات العالية و صوت الطقة اللي في الدركسيون دي مش بحس بيها و انا ماشى بالعربية, بسمعها بس و انا واقف و حاولت اجيب الدركسيون شمال, انصحوني ارجوكم. اعمل ايه؟

طيب بأقولك أيه

متروح تعمل ترصيص للعجل الأمامى فى مكان كويس

لأننى شاكك أن بلية الفرده اليمين مش مظبوطه معاك

ولو هى بتلعب معاك وأنت بتكسر الدركسيون يمين

حتعملك الطقه وأنت واقف وتخللى العربيه تحدف منك يمين مع السرعات

________________________________

بالمناسبه فيه عندك طقه فى الجنب الشمال وأنت بنكسر الدركسيون شمال ولالا

وهل فيه حدفه شمال وأنت ماشى على سرعه ولا لا ..........؟

و حاولت اجيب الدركسيون شمال

وتقصد أيه بالعباره دى بالضبط ...........؟

**wsamy** · 22-06-2010 07:42 AM

شكرا على الرد, هي الطقة دى بسمعها لما بجسب الدركسيون سنه شمال بسرعة و العربية واقفة و فعلا فيه حدفه شمال وانا ماشى بسرعة حتى و انا ماشى سلانسيه و ضابط الدركسيون العربية نتيجي ناحية الشمال. ايه رايكم اعمل ايه؟

**samirayad** · 22-06-2010 02:59 PM

طيب بأقولك أيه

متروح تعمل ترصيص للعجل الأمامى فى مكان كويس

لأننى شاكك أن بلية الفرده اليمين مش مظبوطه معاك

ولو هى بتلعب معاك وأنت بتكسر الدركسيون يمين

حتعملك الطقه وأنت واقف وتخللى العربيه تحدف منك يمين مع السرعات

أعتبر الكلام ده للجنب الشمال برضه

وشيك على الجنبين

**wsamy** · 04-07-2010 11:38 AM

شكرا جزيلا على ردودكم,

طبعا مشكلة الطقة اللي في الدركسيون لسه موجودة, انا قولت اركب بطاحات و كوبايات جديدة و كنت خايف برده من المقصات الاستيراد اللي جبتها قبل كدة فقلت اغيرها بمقصات اسباني و كمان بيض دركسيون جديد, و فعلا روحت عند العفشجي و غيرت البطاحات و الكوبايات و المقصات و بيض الدركسيون و كله جديد و المقصات اسباني, و بعد مامشيت من عند العفشجي كان كله تمام بس تاني يوم لقيت فيه صوت تزييق في المطبات و لما بفرمل.. هوا ده عادي علشان المقص لسه جديد ولا ايه؟ و برده مشكلة طقة الدركسيون لسة موجودة و شاكك في علبة الدركسيون او الاسكترا .. بس اعرف منين انها من الاسكترا ولا من علبة الدركسيون؟ ارجوا المساعدة مع جزيل الشكر.

**wsamy** · 04-07-2010 04:18 PM

محدش قابله الموضوع دة قبل كدة؟

**samirayad** · 04-07-2010 04:42 PM

بس اعرف منين انها من الاسكترا ولا من علبة الدركسيون؟ ارجوا المساعدة

أعتقد بعد المصاريف اللى أتكلفتها دى كلها

مفيش قدامك غير تغيير علبة الدركسيون كاملة بالبلف الدوار

اللى بياخد حركه زاويه من قطمة الدركسيون

فهاتلك واحد كامله أستيراد بالبلف بتاعها

وأمرك لله

أنا سائل عليها عندنا كامله بالأسماعيليه

بتعمل من 250 الى 300 ج بكتيره

أكتر من كده ما تدفعش

وخللى عفشجى كويس يركبهالك وخلاص

وشوف أيه الجديد

طالما أنت مطمن لكل مكونات العفشه وبلى العجل

**wsamy** · 04-07-2010 05:10 PM

مهندس سمير كتر خيرك على الرد... طيب و حكاية صوت تزييق في المطبات و لما بفرمل.. هوا ده عادي علشان المقص لسه جديد ولا ايه؟ انا اسف زهقتك معايا

**samirayad** · 04-07-2010 08:47 PM

بصراحه أنا مش مقتنع أن التزييق ممكن يحصل من مقصات لسه متركبه جديد

فقد يكون هناك عيوب متداخله عندك فى العفشه الأماميه

بسبب عيب الأسكترا مثلا

وعيوب العفشه والتزييق والقصص دى بتبقى عيوب معقربه الصراحه

وبدوخ أى عفشجى وهو بيجرب العربيه على الطبيعه كمان

فبعد ماتغير الأسكترا

وتراجع كويس تانى على كاوتشات الميزان

وصوابع كالبرات الفرامل بالمره

ممكن تلاقى بقدرة الله

كل أمورك بأت فى السليم

**wsamy** · 06-07-2010 11:22 AM

حاجة غريبة قوي, انا معملتش حاجة جديدة, بس صوت التزييق ده راح خالص امبارح بالليل بس و رجع تاني النهاردة الصبح.. سبحان الله.. و طبعا لسة مشكلة الدركسيون موجودة