نار الحر مع الm11 ... موجود في التقرير الكامل

**hemaa_82** · 21-06-2010 12:09 PM

امبارح 20-6-2010 .... طبعا ربنا يرحمنا من حره و يظلنا بظله يوم لا ظل الا ظله امين ان شاء الله .....

طلعت من الدقي الساعة 4 و ربع و مستحملتش استني العربية تسخن قبل ما اشغل التكييف ..... دورت العربية و قبل ما اقفل الباب كنت مشغل التكييف .....

عادي بعملها علي طول برغم من ان المفروض ان العربية تسخن علشان دورة الزيت تكون كاملة قبل ما نشغل التكييف ......بس عمرها ما اشتكت ...... مش موضوعنا ....

بدأت اتحرك و العربية بدأت تسقع ... بس حسيت بصوت غريب ... كأن في بلية خشنة او حاجة بتحشرج في صوت المتور ..... قمت مضحي بشوية الهوا الساقع و فتحت الازاز .... فعلا لما اعدي ال 3 rpm الاقي صوت خشن غير معتاد .....

قلت اجرب ايه اللي بيحصل ....

طفيت التكييف بقت العربية حلاوة و مفيش حاجة غريبة ...
اقيده يطلع الصوت .....

قمت مشغل المروحة بس من غير الكمبريسور ...مفيش صوت
مجرد ما اقيده يعمل الخشونة و الصوت ......

ركنت علي جنب... فتحت الكبوت علشان بس اتأكد ان مفيش حاجة بترف"فيها رفة في الدوران" او مفكوكة ... مفيش .... كله تمام

قمت متوكل علي الله و اديها بقي ... صوت صوت ... مهو لو حاجة باظت لا قدر الله هروح اطلع ابو ابوهم ....

المهم ...كل ما امشي اكتر الدنيا تظبط و الصوت يقل .... لحد ما وانا عند البيت كان خلاص بيروح .....

طلعت بيتي و اعدت و خلاص ....

جيت وانا نازل اصلي العشا قام الشك شاككني ..... دورت العربية و زودت بنزين مفيش حاجة ..... شغلت التكييف ؟؟؟؟!!!!؟؟؟؟؟

برضه مفيش حاجة ........

الاستنتاج المنطقي الوحيد اللي دماغي مستريحاله ان اكيد الفريون الساقع لما دخل علي الكمبرسور و هوة ملهلب من نار الظهر خلاه مكلبش اكتر من الطبيعي علي ما الدنيا هديت و الكمبرسور برد و الفريون سخن فالدنيا ظبطت......

ان شاء الله هنكرر التجربة النهاردة بس هسخن العربية قبل ما اشغل التكييف .......

لو حد عنده تفسير اخر يا ريت يفيدنا ..... و ان شاء الله اوافيكم بكل جديد .....

مراسلكم من ال m11 ....
اسبيرانزا

**emad7759** · 21-06-2010 02:18 PM

ياحبيب قلبى ياغالى احنا من سعات ملعربيات جبنها واحنا بنقول ان فيه مشاكل فى الكهرباء والبور

وحجات كتير احنا اكلانتا عتها

ومنها التكيف

يعنى فيه ناس عندهم التكيف ده بيشتغل مع نفسه وناس تانيه التكيف فصل خالص

فايريت تروح ليهم وزى منتا قلت كده اطلع ابو ابوهم

لان ياباشا كده التكيف بدء يهبل معاك

وبعدين عمليه العربيه برده او سخنه ملاهاش اىدعوه

انا عن نفسى بدور العربيه على التكييف يعنى عندى التكييف مابفصلوش خالص فى الصيف

وعمره ماعمل اى شىء

الفرنا اللى الكل بيبقول عليها مش عارف ايه ولله العطيم المسمار منها بكل انواع الاسبرنزا كلها

عندى من 2006 التكيف لم يتم فصله الا كل شتاء فقط وبرده العربيه تدور التكييف يشتغل على طول طالما المتور دار

فانتا ياهيما روح ليهم وخليم يكشفو عليه

وربنا يستر ويكون خير

**augast** · 21-06-2010 10:29 PM

هيما باشا
انا استلمت العربية النهاردة (الحمد لله بعد ما كفرونى )
العربية اخدتها من غير ما ابوص على اى حاجة كان عندى مشكلة كبيرة ولازم امشى بسرعة
استلمت العربية وانت عارف الجو واقعدو يقولولى متشغلش التكييف و بتاع
انا اخت العربية وهى باردة (الماتور اما العربية من جوة كانت نار) ورحت مشغل التكيف وعليت المروحة على الاخر
فجأه حسيت انى بتبستر من نار وغليان الى تلج رحت مهدى المروحة شوية
على فكرة انا كنت بنقل على ار بى ام 2 والسرعة القصوى كانت 80 على الرابع وهديت بعديها لانى خفت على الماتور
اما العربية حدث ولا حرج انا سقت كتير وقليل اما ديه ليها رهبا خاصة كدة اكنى لسة بتعلم السواقة
فى البداية صوت الماتور كان عالى شوية يادوب مشيت سخنت كله بقا تمام

وانشاء الله هعمل تقرير على العربية بس اخلص امتحانات
وعلى فكرة انا احب اشكرك على صدقك فى هذة العربية فى تقريرك المبدع (اللى اكد فكرة ال m عندى)

**augast** · 21-06-2010 10:34 PM

انا كنت عايز استفسر
فى ناس قالولى انت كده هتتعب الماتور علشان ار بى ام 2 و 2.5
قالولى لاذم تدوش شويه انا اقول مرة املك سيارة زيرو
وبعدين انا كان عندى سفر كمان اسبوعين
اعمل ايه ناس قالولى متعديش المية وريح كل ساعة ومتشغلش التكييف (رزلة دى اوى)
وبالنسبة قولتلهم ادورها كل يوم لمدة ربع ساعة على الواقف ناس وافقة وناس لأ
بأذن الله هروح ارخص يوم الاربع الصبح علشان عندى امتحان بكرة
وعايز اعرف اعمل ايه علشان احافظ على النعمة ديه(انا مبمشيش كتيير)

**ehabpopo** · 22-06-2010 12:17 AM

المشاركة الأصلية كتبت بواسطة augast

هيما باشا
انا استلمت العربية النهاردة (الحمد لله بعد ما كفرونى )
العربية اخدتها من غير ما ابوص على اى حاجة كان عندى مشكلة كبيرة ولازم امشى بسرعة
استلمت العربية وانت عارف الجو واقعدو يقولولى متشغلش التكييف و بتاع
انا اخت العربية وهى باردة (الماتور اما العربية من جوة كانت نار) ورحت مشغل التكيف وعليت المروحة على الاخر
فجأه حسيت انى بتبستر من نار وغليان الى تلج رحت مهدى المروحة شوية
على فكرة انا كنت بنقل على ار بى ام 2 والسرعة القصوى كانت 80 على الرابع وهديت بعديها لانى خفت على الماتور
اما العربية حدث ولا حرج انا سقت كتير وقليل اما ديه ليها رهبا خاصة كدة اكنى لسة بتعلم السواقة
فى البداية صوت الماتور كان عالى شوية يادوب مشيت سخنت كله بقا تمام

وانشاء الله هعمل تقرير على العربية بس اخلص امتحانات
وعلى فكرة انا احب اشكرك على صدقك فى هذة العربية فى تقريرك المبدع (اللى اكد فكرة ال m عندى)

الف الف مبروك العربية ... وربنا يباركلك فيها ويكفيك شرها ويعطيك خيرها ... وما تنساش التقرير وتطمنا عليك بردة

**msobhy** · 22-06-2010 01:13 AM

انا عارف اننا بنتكلم هنا على التكييف لكن اسمحوا لى اضيف شوية كلام لزميلنا الفاضل اللى ربنا كرمة ب ال M11
النهاردة رحت عملت test drive فى ابوالفتوح على ال M11 وال 516 وبصراحة ال M11 وهميييييييييييييييية
العربية ناعمة جدا - راحة غير عادية اثناء القيادة - مفيش تصقيف من الموتور - عيبها انى لازم انقل على RPM عالى والا العربية تتخنق منى
العربية ديه لو كانت اوسع شوية من ورا كانت بقت اسطووووووووووووورة

ال 516 طبعا كلكم حافظينها عن ظهر قلب - بصراحة العربية حلوة مش وحشة - بس مش عارف ليه فكرتنى بالعربيات اللادا وهيه لسه جاية زيرو

للأسف رجعت لنفس المشكلة تانى بعد ما كنت قررت خلاص انى اجيب 516 - بدأت ارجع فى كلامى وأفكر فى ال M11

أدعوا لى يا جماعة ربنا يوفقنى للى فيه الخير

**msobhy** · 22-06-2010 02:19 AM

سؤال لو سمحتم هل ال m11 برضو بتتجمع عندنا هنا ولا بتيجى من الصيييييييين
من الواضح ان العربية اللى عندنا هنا شوربة والعربية اللى بتتعمل فى الصين اسطورية
اتفرجوا على الاعلانات بتاعت ال m11 بره وانتوا تعرفوا الفارق الرهيب بينها وبين اللى هنا