الموضوع: افتكاسه فى تعدديل اسلوب التبريد

المشاركة الأصلية كتبت بواسطة khaled_sabry

ممممممممممممممم
هو انا اقتنعت برأئ sigmaa اللى قال تركيب المروحه ال 8 ريشه مش حتفرق اوى على السلانسيه لأنه كده كده سرعه تدويرها بطيئه ...و بالتالى مش حتفرق فى الزحمه هى حتفرق اوى فى السرعات العاليه و حتبقى مفيده للمواتير اللى بتسخن فى السرعات العاليه زى 132 و البيجو 504
بس انا عربيتي 1200 cc وهى الطبيعي بتاعها انها مش بتسخن و بالتالى على السرعات العاليه مش محتاج مراوح اصلا بيبقى كفايه عليا اوى اندفاع الهواء

و بالتالى الحلول اللى مقترحه قدامى
1- اركب مروحه صغيره تانيه فوق المروحه الصغيره بتاعت سربنتينه التكييف : و كان السؤال هل حتعمل فرق ملحوظ على السلانسيه
2-اشيل المروحه الصغيره بتاعت التكييف و اركب مكانها مروحه قويه بتاعت ريداتير :: و كان سؤالى هل المسافيه بين السربنتينه و الشبكه (20 سم تقريبا ) لتركيب المروحه دى .. ولو تكفى فتبقى مروحه بتاعت انهو عربيه ؟
3- انى اشيل المروحه بتاعت الموتور و اركب واحده تانيه كهرباء زى العربيات الحديثه: بس انا مستحرم اشيل المروحه اللى موجوده خاصه ان المروحه الكهرباء ممكن تبوظ لأى سبب و خاصه لو فى سفر ساعتها مش حعرف اعمل حاجه و لو الاتنين اشتغلو مع بعض يعملو شغل جامد

يعنى من الاخر انا عاوز ازود مروحه كهرباء على مروحه الموتور اللى عندى
فازاى و اعملها ازاى و اجيب انهو مروحه بالظبط ؟؟

بالنسبه لللادا اللى بتقول عليها هو كان مركب تكييف .ولا المروحتين دول علشان تبريد العربيه و بس ... علشان انا بالنسبه للتبريد العادى بدون تكييف ممتاز انا مشكلتى مع التكييف فى الزحمه بس

لا ياباشا من غير تكييف دى للتبريد العادى عشان لو ماشى فى زحمة ولا حاجة خرج المروحة اللى فى الطنبورة الى حد ما ضعيف شوية برضو مش زى عربياتنا طبعا اقوى منها بس برضو تقريبا مش بيقضى الغرض فعشان كدة عملو موضوع المراوح دة على العموم انا ناوى ان شاء الله اعمل الموضوع دة بس مش فاضى والله اليومين دوول وان شاء الله اول ما اعملها حقولك اية الاخبار

الف شكر لكل الاعضاء اللى تعبو نفسهم و جاوبونى
انا دلوقتى استقريت انى حعمل الحاجتين ...
- حغير المروحه ال 4 رشه بواحده تانيه 7 ريشه لاقيتها امبارح اخيرا و انا مروح من الشغل و ناوى اركبها الناهرده (حركبها بنفسى علشان مش بثق فى الميكانيكيه )
- حشترى مروحه كهرباء صغيره تانى زى مروحة السربنتينه بتاعت التكييف و اركبها مع المروحه اللى موجوده بالفعل دلوقتى ... بس دى حجيبها كمان شويه علشان مش معايا تمنها لدلوقتى

بس كان فيه سؤال كنت عاوز استشيركم فيه ... انا من النوع اللى بيحب يعمل الحجات فى العربيه بايديه و بالتالى قررت انى اركب المروحه 7 ريشه اللى لاقيتها دى بنفسى بس فكرت فى حاجه ليه ما اركبشى المروحه 7 ريشه دى فوق المروحه ال 4 ريشه الموجوده بالفعل ؟؟ هل فيها خطوره ولا ايه ؟؟ طبعا ده حيتطلب انى اشترى مسامير اطول علشان المسامير دى حتمسك مروحتين فوق بعض مش مروحه واحده ... المهم امبارح باليل عديت على الميكانيكي اللى جنبنا و سألته هل ينفع اركب مروحتين فوق بعض هو قالى لا ماينفعشى و اصر على الكلمه ده بس ماعرفشى يقولى ليه ؟؟ فهل ده لأنى لما استخدم مسامير اطول و مع عدد اللفات الرهيب بتاع الموتور على السرعات العاليه ممكن الماسمير دى تنكسر نتيجه لقوه القصور الذاتى ( لما ابقى عامل 4000 rpm و انزل للسلانسيه مثلا او اطفى الموتور مره واحده ) بالنسبه للطول الزياده اللى انضاف ؟؟
انا حنزل اركبها فى البريك بتاع الشغل و محتار هل الركب مروحه واحده و لا الاتنين فوق بعض

المشاركة الأصلية كتبت بواسطة m_mekkawy

احسن حاجه تخليها على اصلها وتغيرها 8 ريشه وتشوف الكلتش بتاع المروحه سليم ولا لا وتشوف الترموستات اللى بيقفل ع الميه ان كان لسه موجود.

ايه هو الكلتش ده اصلاا ؟؟؟؟؟؟؟؟
انا لفيت كتير على مروحه 8 ريشه و مالقيتهاش و مش فاضى انزل وسط البلد .. ب 7 ريشه من 8 ريشه مش فارقه كتير ... اهه حتبقى افضل من 4 ريشه اللى عندى
بالنسبه للثرموستات اللى بتقفل على الميه يتهيالى ان موديل عربيتي مش نازله بيه اساسا وكده كده انا مش بحتاجه

المشاركة الأصلية كتبت بواسطة m_mekkawy

عادى كده هى الدنيه فاضيه عندك فى الكبود للدرجه دى
لا اوعى تعمل كده لان لو مركبتش صح وقرط عليها هتبقى عامله زى طبق زينه اللى كان بيطير رقبة الناس
واهم حاجه يكون القميص بتاع المروحه راكب ع الريداتير عشان قوة سحب الهوا تكون من الريداتير ومش تتشتت

اه الموديلات القديمه تلاقى فيها مساحات كبيره فى الكبود فانا عندى مساحه تكفى انى اركب المروحتين فوق بعض عادى على العموم انا حاخد بالاحوط و حركب المروحه ل 7 ريشه بس


انتا عارف انا عاوز اركبها عشان ابقى متأكد من التقريط بتاعها لأن الميكانيكيه دلوقتى همهم الفلوس و ايديهم بقيت رقيقه اوى
و القميص بتاع المروحه موجود لا تقلق

موضوع طبق زينه ده دحكنى كتير لأن ستر ربنا كان حتطير رقبتى فيه بجد قبل كده
لأان من شهر تقريبا كان فيه واحد ربنا يكرمه كان كاتب ان فيه مراوح بلاستيك خفيفه بتركب من غير مسامسير فوق مروحه الريداتير و بتطربط بيها عن طريق احزمه بلاستيك .. بصراحه انا معرفش الكلام ده حقيقى و لا لاء بس الفكره نفسها عجبتنى فانا كان عندى مروحه كهرباء قديمه و محروقه بتاعت سربنتينه التكييف و ففكيت الريش بتاعتها و بالفعل ركبتها فوق مروحه الريداتير و ربطها ب 6 احزمه بلاستيك و دورت العربيه و فضلت ازود بنزين علشان اختبر قوه الاحزمه دى
و هوب مره واحده سمعت صوت خبطه جامده و اكتشفت ان مروحه السربنتينه مش معموله علشان تستحمل عدد اللفات العاليه و بالتالى لما وصلت ل 4000 RPM المروحه اتكسرت بسبب قوه الطرد المركزى بتاعت الريش نفسها و طلعت كل رشه فى اتجاه و الاحزمه البلاستيك اللى كنت خايف منها فضلت سليمه
بس الحمد لله ماحصشى خساير لأن القميص منع شظايا المروحه من الانتشار ماعدا شظيه لا قيتها مغروسه فى الريداتير بس الحمد لله حظى انها مادبحتهوش