الموضوع: مولد كهرباء أحتياطي للمنزل

المشاركة الأصلية كتبت بواسطة hh

بص يا أستاذ ايهاب هو المولد ال 5 كيلو ده يعني الخرج بتاعه تقريبا 20 أمبير. الموتور ال2 حصان ده بيحتاج حوالي 7 أمبير لوحده عشان يشتغل, و طبعا المراوح عشان مواتير برضه بتستهلك أمبير عالي ده غير ان لو اللمبات صفرا مش بيضا تبقى برضه بتستهلك كتير, و ده السبب ان المولد مش قادر يشغل كل حاجة مرة واحدة عشان الأحمال أعي من خرج الأمبير بتاع المولد. لكن لو حاولت تشغل نفس المولد ده لمنزل عادي حتلاقيه يستحمل مثلا تشغل تكييف قدرته متوسطة (1.5 الى 2 حصان) + التلاجة + اضاءة تلات أو أربع غرف + الأجهزة الأاكترونية البسيطة (تليفزيون, ريسيفر, كمبيوتر....الخ)

ببساطة اللي عايز يحسب هو محتاج مولد كام كيلو يقدر يحسبها كدة:

أستهلاك الاضاءة بتاعت البيت لو لمض صفرا يبقى الوات بتاعها = الفولت أمبير اللي محتاجاه أوتوماتيك, بمعني لو بتستخدم لمبة 100 وات لكل غرفة و عندك 5 غرف يبقى بتستهلك 500 وات = 500 فولت أمبير = نص كيلو فولت أمبير لاضاءة البيت كله. طبعا لو اللمبات بيضا أو موفرة حتستهلك أقل من كدة بكتير.

بالنسبة للتكييف , 1 حصان = 750 وات = 750 فولت أمبير = 0.75 كيلو فولت أمبير. يعني عشان أشغل تكييف 2 حصان محتاج كيلو و نص فولت أمبير و هكذا.

بالنسبة للأجهزة الالكترونية استهلاكها مش كبير, يعني مثلا التليفزيزن ال lcd استهلاكه في حدود 130 - 150 فولت أمبير, الكمبيوتر في حدود 60 - 70 فولت أمبير, حتى التلاجات و المراوح و الحاجات الي بمواتير مش حيكون استهلاكها عالي قوي. عموما اي جهاز في الدنيا لازم حتلاقي علية ستيكر مكتوب عليه الelectric requirements بتاعته سواء مكتوب الpower consumption و ده بالوات علي طول, يا اما مكتوب الفولت و الأمبير و في الحالة دي نضرب الرقمين في بعض عشان نعرف محتاج كام فولت أمبير.

و عموما عشان متدوش نفسك بالحسابات دي كلها, في بيوت كتير جدا العداد بتاعها 10 أمبير يعني 2.5 كيلو فولت أمبير بالكتير, و بيبقوا مشغلين كل الأجهزة عادي و منورين البيت كله مفيش زيادة تحميل و لا حاجة, فباختصار ممكن نحسب ان البيت كله بالاضاءة بالاجهزة مش حيحتاج اكتر من مولد 2.5 كيلو و لو حتشغل تكيييف يبقى تزود 0.75 كيلو لكل حصان و في الأخر ممكن تزود 0.5 كيلو تحسبا لأي زيادة في الأحمال.

يا ريت بقى تقول لنا المولد حضرتك كنت جايبه منين؟؟؟؟؟؟؟؟؟؟؟؟؟؟؟؟

يا أفندم انا فاهم اللي حضرتك تقصده انا بفضل الله عارفه لأنه من صميم شغلي ودراستي ولكن أحب أوضحلك ان المنتشر من المولدات الصيني لو حسبتلها صح هتلاقيها واقعيا بتديك أقل من القدرة المكتوبة عليها وبعدين المشكلة في انه مش بيقوم الموتور ال 2 حصان بسبب ان الموتور وهو بيقوم بيسحب تيار لحظي عالي في بداية التشغيل مش بيقدر المولد انه يوفره للموتور لكن بعد ما الموتور بيقوم مش بيسحب نفس تيار التقويم .
وهي دي نفس مشكلتك في بداية تشغيل اي موتور علي المولد وهي نفس مشكلة التكييف لذلك بيحتاج مولد قدرة أعلي بكتير عشان توفر التيار اللحظي اللازم لبداية التشغيل

بالنسبة للمكان اللي انا اشتريت منه المولد فهو في المنصورة مش في القاهرة لأني اساسا من المنصورة وكنت شاريه لهناك

أعتقد والله اعلم ان القاهرة لو نزلت منطقة وسط البلد في العتبة وشارع كلوت بيك وشاع نجيب الريحاني بالتأكيد هتلاقي كتير هناك بيبيعو المولدات دي وبالأكثر في نجيب الريحاني .