طفل فى الخامسة والعشرين

**meza** · 13-07-2008 04:02 AM

انت قريت 3 صفحات بس من ال 9 صفحات؟؟؟ امال فين الباقي يا دكتور ميزا ؟ :)

أنا مزود عدد الردود فى كل صقحة من لوحة التحكم .... فالموضوع مقسم عندى على 3 صفحات.

المرمطة (آسف للفظ) هي اللي بتعمل الرجالة..

ما هو أنا عاوز المرمطة دى .... أنا عارف إنها هتفيدنى أكتر من إنى أكون متدلع و مستريح فى الشغل.

وكفاية إنك بترتب المواد عشان تحافظ على التقدير

لا إنتا فهمت غلط :D.... أنا التقدير وقع منى فى السنتين اللى فاتوا ... فمش بفكر فى تقدير على قد ما بفكر فى كيفية الإستفادة من سنين الدراسة على قد ما أقدر ... مش مجرد نجاح و بعد كده أنسى كل حاجة .... فالمادة اللى سيبتها تعتبر حاجة أساسية جداً فى الطب ....أنا كان ممكن أضغط على نفسى و أخش و أنجح و خلاص .... لكن عاوز أستفاد من المادة كلها أكبر إستفادة ممكنة.

لو تقدر تنزل تدريب في اي حتة (حتى لو مش هاتتعامل كدكتور) انزل
عشان لما تشتغل تبقى عارف اللي تحت إيدك بيعمل إيه وتبقى فاهم كل حاجة

فكرت أنزل المستشفى .. و أهو أفهم المواضيع ماشية إزاى ..... لكن طلع إنه مش هينفع ... لأن فى حاجات لازم أكون عارفها و دارسها الأول عشان أستفاد ... كده مش هتعلم حاجة .. أو هتعلم بس حاجات قليلة قوى.
كمان أنا عاوز حاجة بعيدة عن المجال شوية ...

يا ريت تشرح اكتر إيه الفرص المتاحة (حتى اللي في دماغك) لنشاط صيفي في مجال العمل.. ونفكر سوا.. دي أكبر فايدة للموضوع .. وأهم فايدة للأصدقاء في المنتدى

ممكن أشتغل فى صيدلية بس مش برجح قوى لأنى مش بحب وقفة الصيدلية ... أو مثلاً شغل تجميع كمبيوترات (ده بقى بحبه جداً) . لأنى أعرف كتير فى موضوع الهارد وير ده .... أو ممكن صيانة كمبيوتر .. أنا كنت بفك الكميونر الأولانى حتة حتة كل شوية ... حتى أى أجهزة عندنا لازم أفكها و أعرف إيه جواها ... لدرجة إنى كنت هتجنن و أفتح عداد الكهربا :D.. لكن لحقونى على أخر لحظة.

عامة لو عاوز تعرف أنا مغرم بإيه .. هقولك أى حاجة فيها مسامير بتتفك .. بحس إنى بفتح كنز و أنا بفتح الجهاز ..... أو ممكن أى إقتراحات تانية عادى ...

شكراً على تشجيعك أستاذ محمد :)

**Goodle** · 13-07-2008 09:56 AM

وتقوللي مش عارف... مش عارف مين يا عم انت ؟؟ :) :) :)

انت حطيت إيدك أهو على اللي انت بتحبه وممكن تغوص فيه

المشاركة الأصلية كتبت بواسطة meza

عامة لو عاوز تعرف أنا مغرم بإيه .. هقولك أى حاجة فيها مسامير بتتفك .. بحس إنى بفتح كنز و أنا بفتح الجهاز ..... أو ممكن أى إقتراحات تانية عادى ...

شكراً على تشجيعك أستاذ محمد :)

يتبقى سؤال.. مسامير إيه اللي تحب تشتغل في فكها (كمهنة صيفية).. يعني مثلا سيارات.. ولا أجهزة كهربائية (تليفزيونات.. ريسيفر دش..) ولا إيه ؟؟؟

أنا بحاول احطك على الباب اللي يناسبك.. اتمنى إن باكون باساعدك فعلا بالتفكير بصوت عالي.. وياريت بقية الإخوة هنا يشاركوا معانا بآراؤهم (تقدر تدعو الناس عن طريق الرسائل الخاصة إذا حبيت)

بانتظار الرد

**Dr Ahmed** · 28-11-2008 06:55 AM

عامة لو عاوز تعرف أنا مغرم بإيه .. هقولك أى حاجة فيها مسامير بتتفك .. بحس إنى بفتح كنز و أنا بفتح الجهاز .....

أنا ملاحظ إن دى بالفعل أكثر الهوايات إنتشارا بين الأطباء
وأبشرك أنك هتكون جراح وتمارس هوايتك فى فتح وتركيب وإصلاح الأجزاء الآدمية المعطوبة

**meza** · 28-11-2008 08:52 AM

المشاركة الأصلية كتبت بواسطة Dr Ahmed

أنا ملاحظ إن دى بالفعل أكثر الهوايات إنتشارا بين الأطباء
وأبشرك أنك هتكون جراح وتمارس هوايتك فى فتح وتركيب وإصلاح الأجزاء الآدمية المعطوبة

يااااااااه ... رد بعد 4 شهور

... أحمدك يا رب ..... بس رسم على وجهى الإبتسامة فى بداية اليوم

.... ربنا يكرمك يا دكتور أحمد ..

**meza** · 28-11-2008 08:54 AM

أحب أبشركم بخصوص الموضوع ده .. إنى مبقتش عاطل anymore

شكراً جزيلاً على مساعدتكم خاصة الأستاذ محمد عبد الجواد

**Dr Ahmed** · 28-11-2008 08:56 AM

المشاركة الأصلية كتبت بواسطة meza

أحب أبشركم بخصوص الموضوع ده .. إنى مبقتش عاطل anymore

إيه الجديد....... إحكى لنا وفرحنا معاك

**meza** · 28-11-2008 09:06 AM

المشاركة الأصلية كتبت بواسطة Dr Ahmed

إيه الجديد....... إحكى لنا وفرحنا معاك

إحم ...
الحمد لله الأول دورت على حد يدلنى على حاجة أشتغلها .... معظم أصحابى فى الكلية اللى بنفس حالتى إقترحوا صيدلية ... بالفعل نزلت أسبوعين و إتعلمت حاجات كتير ... بس زهقت بصراحة بعديها ... حسيت إنها مش شغلتى.

بعديها كان فيه كورس للفوركس ... و إبتديت فى الموضوع ... بس لسه قدامى كتير قوى عشان أتعلم كل حاجة ... لسه الموضوع طويل يعنى ... بس ماشيين فيه.

فى الوقت الحالى بشتغل شغل كمبيوتر ... Graphics و Designing و كده ... و الحمد لله الواحد مستمتع جداً بوقته بدل ما يضيع فى حاجات فاضية.

الشغل ده فكرته إنه هيعطلنى عن المذاكرة و الكلية .... لكن العكس هو اللى حصل .. بقيت أذاكر من غير ما يكون فيه إمتحانات .... سبحان الله ...

**Dr Ahmed** · 28-11-2008 09:12 AM

أحييك طبعا على الخطوة الجميلة دى وفعلا الشغل مش بيعطل عن المذاكرة بالعكس فى معظم الأحيان بيدفعك لتنظيم وقتم بأفضل الطرق فاعلية

ربنا يوفقك

**dr.nemo** · 28-11-2008 06:28 PM

اولا انا بشكر اخويا محمد عبد الجواااد ( Goodle ) على دعوتي هناااا ..
ثانيا .. انا ناوي ان شاااء الله اني اجنب ابني كل المعاناة اللي قابلتها انا في بداية حياااتي لحد ما ربنا كرمني وبقيت مليونير ..( بجيبلكم من الآخر ) .. :)

حتقولولي طيب ده لازم يتعلم الاعتماد على النفس ويتعب شويه عشان يقدر يكافح في الدنيا لوحده لما يتخرج من غير مساعدة ابوه .. حقول كل ده جميل .. بس السؤال هنا هو ليه لازم لما يتخرج يشتغل و يكااافح ويشقى .. ليه ما اعملوش زي الدول ما بتعمل للمبدعين ما يسمى ب ( منحة تفرغ ) .. يعني الدوله بتوفر للمبدع كل متطلبااااته الحياتية ودعم مادي قوي عشان يتفرغ هو لفنه او ابحاثه كل حسب تخصصه

انا كمان ان شاااء الله حخليه يكمل في مسيرته الاكاديميه من ماجستير ثم الدكتوراه ويركز تماما في المسار ده وما يشيلش هم الشقه والعربيه ومصاريف الجواز وحتى الدخل الشهري كمان .. وحيفضل عنده وقت اهم .. ممكن يوظفه لخدمة دينه .. او تثقيف نفسه .. او حتى يلف العالم ياسيدي هو حراااام يعني .. :)
اتمنى لو اعرف رأيكم في تصوري المختلف ده ..ولكم كل الحب والتقدير ..

انا والدي نفس تفكيرك ده بالضبط
انا نفسي اشتغل موت
بس دايما والدي بيمنعي ويقولي ركز في دراستك
واحنا مش محتاجين لشغلك والحمد لله
واحيانا يقولي لو فضيت ابقى اشتغل في حاجة تفيد تخصصك
جربت اروح للمستشف هما اسبوعين والسلام لاني اكتشفت اني معنديش base كافيه لذلك
والعمال اللي عندنا عاوزين حد يشرف عليهم

آه انا نسيت اقولكم ان
احنا وللاسف مصابين بلعنة جامدة قوي :k28:

اسمها لعنة العمال

صيف (ودا اساسي) وشتا
صدقوني مبيخلصوش(بتسكين الخاء وبفتحها ايضا)
و لان والدي مبيثقش في المقاولين
فكل اجازة نقضيها مع العمال
ولما من ساعة مادخلتالطب كنت كل سنه بأجل مادة او اتنين علشان اجيب فيه تقدير عالي
فبقيت مشغول بالدراسة علطول والسنه الوحيدة الي قررت اني اخد فيها اجازة علشان نفسي اشتغل بجد ... الجماعة قاللي اشتغل عندنا مقاول !!!

بس بصراحة الشغل مع العمال ده مقرف ومتعب جدا جدا:K15: (ربنا يكون في عون المهندسين) فرضيت..... مهو انا كده كده حشتغل معاهم .. فاشتغل بمقابل احسن
صحيح الواحد بقى عنده خبرة كبيرة في التعامل مع مختلف انواع العمال والسماسرة
وفي بيع وشراء الأراضي وتأجير الشقق
بس حاسس ان كل ده علشان ده عندنا فكده كده كنت لازم حتعلمه
انا عاوز شغل اشتغلي فيه بنفسي لوحدي واكون نفسي بنفسي
مش اعتمد على مساعدات خارجية

انا اشتغلت فترة في الكمبيوترات الاوريجينال المستوردة (used)
وكونت منها مبلغ اشتريت بيه حاجات كنت عاوزها منها اللاب توب اللي بكتب منه دلوقتي
بصراحة مفيش طعم للفلوس اللي متعبتش في مجايبها...
وكالعادة
والدي ضغط عليَ لحد مبطلت.:k30:.(الناس حتقول ايه .. انت محتاج... اقف مع العمال..)
بس اعمل ايه انا بحب الشغل تحتى
انا فاكر ان وانا في ابتدائي كان نفسي اشتغل برده فكان بعض زملائي بيجيبوا عسلية من المصنع اللي جنب المدرسة ويبيعوها للفصل
فقلت اما اعمل كده انا كمان
لماعملت كده اتمسكت قبل ما ابيع حاجة اصل بطمن على البضاعة في الشنطة

والمدرس قعدوا يقولي انته مش محتاج يابني انته انته....الخ
فقررت اني معملش حاجة في المدرسة تاني
انما بقى اشتركت في الكشافة لأني حسيت فيه بنفسي :k46:

على فكرة انا والدي ووالدتي واخويا الكبير دكاترة وعلشان كده هم عوزيني ابقى احسن منهم بس انا شايف ان ده مش مبرر لعدم الشغل :k26:
طبعا بيقولولي احنا حنعمل مستشفى وابقى اشتغل فيه
انا رأيي ان في الشغل الانسان بيحس بنفسه وبكيانه ....
واي راجل بيبقى حيموت لو مشتغلش
.... انا بحب الادارة والمحاسبة وناوي آخذ دبلوم ادارة مستشفيات من كية التجارة بعد مخلص تكليف
طبعا انا مسستم نفسي على اني مليش قعاد هنا غير علشان آخد خبرة بس واسافر على برة...... تحتى التخصص اللي ناوي آخده مش ماشي في مصر
لكن مطلوب جدا بره (طب الطؤارىء)بس ده طبعا بعد عمر طويل
ودي الحاجة الوحيدة اللي والدي بيشجعني فيها

وبعدين انا اصحابي اللي في قد سني بس في كليات تانية اتخرجوا واشتغلوا وفيه منهم اللي حيتجوز قريب جدا

انتو ايه رأيكوا .... يبقى انا غلطان
معلش الموضوع مش مرتب بس انا كنت كل ما افتكر حاجة اكتبها
:k10: وتحياتي للجميع:k10:

**AboELsoud** · 18-09-2011 05:37 PM

يا جماعه الموضوع ده بجد جميل جدااااا و مفيد جدااااااا و فيه كميه قصص كفاح روووووعه و تستحق القراءه اكتر من مره
و كمان فيه اعضاء قدام محدش بقى بيشوفهم
تحيه لكل اللي اشتغل من بدري انتوا فتحتوا نفسي للشغل
تحيه للدكتور احمد عبد الغني على الموضوع

انا عارف ان الموضوع قديم بس قلت ارفعه عشان نستفيد منه كلنا :)

الموضوع: طفل فى الخامسة والعشرين

LinkBack

أدوات الموضوع

عرض

-

-

-

-

-

-

المواضيع المتشابهه

الصدقة الجارية في القرن الواحد والعشرين ...!!!

تغير الضفيرة وصيانة الخامسة والعشرين باوتو ايجيبت

النقلة الخامسة

الطريق الي صفط اللبن والعشرين

يحدث في القرن الواحد والعشرين ... ( منقول )

الكلمات الدلالية لهذا الموضوع

المفضلات

المفضلات

ضوابط المشاركة