الموضوع: طفل فى الخامسة والعشرين

أنا اول مره أدخل على الموضوع ده...

أنا قاعد بقالي حوالي تلات ساعات ونصف قراءه كل المشاركات اللي في الموضوع ده و ساعه زياده لكتابة ردي عليه

بجد الموضوع ده هايل هايل هايل يا دكتور احمد.. ولازم إسم الموضوع يتغير علشان الناس تعرف محتوى الموضوع الصح..

الخبرات وقصص الكفاح ديه بتبقى مؤثره جدا جدا وبتدي معنى للحياه.....كمان انا فاكر مره من زمان كان هاني أدم كتب برده قصته في موضوع كان فاتحه هاني عطيه ياريت لو نقدر ننقله هنا يبقى هايل قوي.

المشاركة الأصلية كتبت بواسطة karim_monir

يوووه فكرتوني بالذي مضى
من اعدادي وانا بشتغل واعتمدت على نفسي اعتماد تام وانا في ثانوي
اعدادي كنت بربي عصافير وحمام غية وبنزل ابيعهم وكانو بيكسبوا مكسب جامد قوي
وكنت عايز اعمل مفرخة سمك زينة بس المساحة بتاعتها لانها كانت عايزة تكلفة في الاول وانا من يومي مسرف
في ثانوي نشاطى توسع ليشمل الكلاب بس لما عرفت حرمتها وكدة خلعت منها مع انها بتكسب قوي واشتغلت تقريا في كل حاجة ومع ثانوي ظهر حبي الشديد للكمبيوتر وكنت من اوئل اللي فتحوا نشاط صيانة الكمبيوترات في مصر (طبعا انا بتكلم ايام ويندوز 311 و95 دي ايام الاحتراف لكن من قبل كدة هواية بس
في الجامعة كنت بعمل كل سكاشن العملي اللي بيطلبها المعيدين لزمايلي والدفع مقدم عشان الحمرئه
ها ها ها
حتى كان عندنا دكاترة مش بيعملوا كتاب وكانوا بيقولونا ارجعوا لكتاب كذا وكتاب كذا
وبما اني دودة كتب قديم كنت اسقط على مكتبة الجامعة واجيب الكتب اصور الفصول واخدها اصورها وابيعها للزملاء على انها ملازم وتعبت في تصويرها من الكتب الاصلية وكدة
وبما ان كل طلبة الدفعة مش غاويين تعب حطيت مكسب 5 جنية في كل ملزمة(في 500 طالب) وابيعها بعد المحاضرة على طول(ماهم لو تعبوا نفسهم ووصلوا مكتبة الجامعة كانوا قروها بنفسهم )
بس بعد الطلبة لخبثاء كانوا بياخدوها يصورها من بعض
قمت روحت مركز طباعة وطبعتها بخط ملون ما ينفعش يتصور وررق خفيف يشف اللي تحتة(حماية حقوق ملكية بقى)
بقوا يجوا يتحايلوا عليا اديهالهم
ماهو اصعب حاجة في الكلية الدكتور اللي من غير كتاب ده

وغيرة وغيرة يوووة ده انا كنت مصيبة

واضح إن موضوع السمك ده ماجاش من فراغ .. وكمبيوترات وويندوز 311 .. أنا أول ويندوز اتعاملت معاها كان 95 .. بس عاجبتني اوي حتة الورق الخفيف ده ..

واضح يا كيمو إنك كنت مصيبه من صغرك

المشاركة الأصلية كتبت بواسطة karim_monir

عارفة يا نهي

المشاركة الأصلية كتبت بواسطة karim_monir

مرة كنت اعرف واحد متخرج من جامعة بدون ذكر الكلية والدنيا ضاقت بيه قوي قوي

ومالوش اي حد ممكن يستلف منه فلوس ومش لاقي شغل نهائي
قولتلة انت عايز تشحت ولا عايز تشتغل وكانت نفسة عزيزة قوي بس شكلة مش حلو خالص واسمر ومصاب بجرح طولي في وشه بيخلي اي حد ينفر انه يشغلة حتى لما حب يشتغل في كذا بنزينة ما رضيوش
وهو خريج جامعي
المهم كنت انا لسه متخرج وبدات اشتغل في ABB وجيت قولتلة طب انا هاديلك نص اول مرتب ليا تعمل بيه اي شغلانة ومرتبي كان قليل قوي لاني كنت لسه تدريب
نزلنا انا وهو الموسكي لانه ماكنش عارف هايعمل بيهم ايه وكنت واثق انه هايصرفهم
اشترينا بيهم لعب اطفال جملة ووقف بيهم في ميدان العتبة يبعهم وكان مكسوف قوي قوي
خدت على ايده ووقفت معاه اول ساعتين لحد ما جالة كذا زيون
شوية شوية بدا يبيع وباع نص البضاعة في يوم واحد
جاللي بعد شهر واحد رجعللي فلوسي ودلوقتي عندة محل ايجار بيبيع في خردوات وموقف فيه واحدة وبينزل هو يسترزق ويشتغل
اصلي نسيت اقولك انه خريج كلية لغة عربية
المهم ان الواحد يبقي عندة نية انه يشتغل وعايز حتى ولو فاعل
مش المتواكلين اللي بيمدوا ايدهم ليل ونهار بدون حياء ولا دم
انا اعرف ناس من حيائها بتدور في الزبالة مع القطط والكلاب على اكل ولا انها تمد ايدها لمخلوق

دايما كده في الخير سباق... ربنا يكرمك ويرزقك يا كريم على قد ما إنت بتساعد غيرك وبتقف جنبهم في محنتهم قبل فرحتهم.. وإسمحلي أضم صوتي لصوت نهى وأقول ذي ما قلتلك كده

المشاركة الأصلية كتبت بواسطة onna

ماشاء الله يا كريم و نعم الصحاب انت والله

بس شفت سبحان الله ربنا كرمه ازاى لأ و كمان رجعلك المبلغ اللى استلفوا منك

بجد ربنا يكرمك و يديك على فد نيتك و هو كمان لو مكانش طيب و ابن حلال ربنا مكانش وقفله ناس طيبة زييك في سكته

بما انك بقيت كسيب بأة و بقالك فترة شغال سلفني ااجيب الهدية و هردوهملك حين ميسرة

يانهارك أبيض يا نهى... إييه النق ده .. مش كده

وعلى فكره بلاش حين ميسره ده :)

المشاركة الأصلية كتبت بواسطة Dr Ahmed

والله يا أخى الفاضل إحنا فاهمين كلية الطب غلط شوية..
وكلنا واحنا طلبة كنا عايشين دور المزنوق دايما وكده رغم إن الوقت فيه بركة لكل حاجة: مذاكرة ونشاط طلابى وأسرة ونت وشغل كمان..
ولا أدّعى أن ذلك سهل ، لكن فعلا يحتاج لشخصية منظمة من الطراز الأول لإدارة كل هذه المهام الغير مستحيلة..

والله يا دكتور معاك حق في موضوع الوقت ده.. ربنا أكرمنا ب 24 ساعه في اليوم.. لو الإنسان قدر يقييم هو عمل أيه في كل ساعه من دوووول .. هايكتشف إن وقت كتير إتهدر في كلام فارغ للأسف...

الشخصيه المنظمه في إدارة وقتها هي شخصيه مدركة قيمة الوقت صح وبتنجح إنها تستغل كل دقيقه في عمل شئ مفيد..

المشاركة الأصلية كتبت بواسطة Goodle

المهم لما اتخرجت قعدت ادور على شغل لمدة شهر أو اكتر

ما كنتش لاقي خالص.. ساعتها كنت هاتجنن بجد.

واحد هايقوللي طيب ماكملتش مع خالك ليه.. الحقيقة أنا حسيت إن هناك وصلت لسقف التعلم بالنسبة لواحد مش متخصص.. لا أنا مهندس ولا حاجة.. أنا مترجم خريج آداب انجليزي.. والرابع على دفعتي.. ومع ذلك لم يتم تعييني (والحمد لله على نعمه.. زمايلي اللي اتعينوا بيشدوا في شعرهم).

المهم قعدت اقول لكل الناس عاوز اشتغل.. لغاية ما ربنا اكرمني بشغلانة مدير مكتب (قصدي مرمطون) لواحد مقاول كان عاوز يدخل في موضوع الاستيراد والتصدير جديد..

كنت باعمل كل حاجة ليه: فاكسات، إيملات (ما يعرف انجليزي) ومقابلة عملاء، وادفع فاتورة الموبايل (ساعتها كان لازم تروح للشركة عشان تدفع)، وممكن شاي وقهوة لما يكون الوقت متأخر والسفرجي روح.

المهم قعدت معاه حوالي 9 شهور اتعملت فيها مهارات شخصية قيمتها أكتر بكتير عندي من المرتب اللي كان بيماطلني كل شهر قبل ما يديهوني متأخر 5 أو 7 أيام

سبت القاهرة ورحت اشتغلت في الغردقة في السوق الحرة (قطاع خاص) هناك.. كان في قسم المصنوعات الجلدية وبالصدفة كان القسم مفتوح على قس العطور ومستحضرات التجميل.. وانا طول عمري باعشق العطور..وكنت باعرفها كويس مع إني ساعتها كنت بس باحلم يكون عندي إزازة أصلي..

المهم الحمد لله كنت باعمل مبيعات وانا واقف في المصنوعات الجلدية لفتت نظر المدير (وكان بقالي يومين بالعدد.. فضل من ربنا) ولما جالي قلتله هو انا ممكن اشتغل في قسم العطور افتكر إني باترسم وشايف نفسي.. فلما سألني اعرف إيه عنها ورصيتله شوية اسامي للعطور قاللي تقدر تشتغل في القسمين في نفس الوقت؟ قلتله طبعا لأ..

فبصلي بصه فكرتني ببصة خالي.. وقاللي وليه لأ.. قلتله عشان انا ماعرفش اركز مه عميل وفيه واحد تاني محتاج اجاوب على أسألته.. ساعتها لما سمعت اللي انا بقوله حسيت أد إيه إن كل اللي اتعلمته من معاملة الناس له قيمة.

المهم عملت مبيعات في العطور الحمد لله.. المدير ياسر نفسه قاللي يا محمد أنت بتعرف تسمع الكلام من الزبون وتجيبله ماركة البرفان تفصيل ودي فعلا كانت حقيقة.. كان بيجيلي ناس تقوللي عاوز حاجة شبه البرفان الفلاني بس تكون فيها شويه على ريحة كذا.. وانا ارد اقله طلبك عندي واجيبه إزازة من ماركة ثالثة مايكونش رده على رائحتها غير كلمتين.. هي دي !!!

لكن سبت الشغل ده بعد شهر تقريبا عشان العائد المادي اللي وعدوني بيه طلع كلام ما اتحققش.

لما رجعت وقعدت اسبوع في البيت.. حسيت إني على المعاش وكنت عمال ألف في الشقة لغاية ما أمي كانت هاترميني من الشباك

لغاية ما ربنا اكرمني بشغلانة في مجال الترجمة بطريقة غريبة جدا

فاصل إعلاني وسنعود.. ابقوا معنا

أرجوكم ما تبخلوش عليا بالدعوة دي: ربنا يصلح حالي... يلا بقى قولوا آمين

السلام عليكم

والله قصة حضرتك يا أستاذ محمد قصه مؤثره جدا وفيها معاني وعبر كتير...

وربنا يكرمك ويوفقك في حياتك القادمه وتكون في حال أفضل

المشاركة الأصلية كتبت بواسطة tutankhamoun

بعض الناس تعيش قصص كفاح بسبب تربية أولياء أمورهم و أقصد بالكفاح هنا هو تعليم الأولاد الإعتماد على النفس

بدأت و أنا صغير منذ سن التاسعة الادخار حيث أنني عشقت الزهور و الحدائق و بما أن منزل والدي كان بع حديقة كبيرة فكانت مكان تمضية وقتي و ممارسة هوايتي في متابعة الزرع و النباتات .... و بدأت أشتري من مصروفي الصغير زهور و نباتات حتى أعطاني أبي جزء من الحديقة لنباتاتي الخاصة
و من هنا تعلمت كيفية الادخار و أهميته
أنا بدأت أحترف الشغل من سنة أولى ثانوي و كان في محل تجاري تابع لخالي حيث أني أحببت أن أعتمد على نفسي و في نفس الوقت أن أن أحصل على مبلغ مالي من عملي الخاص .... و خالي هذا أحب عملي جدا حيث أنني أحب النظام قوي قوي و أحب إذا بدأت عمل أن أنهيه كما يجب .
المهم .... عملت معه في فترة الصيف كاملا و طبعا حوشت قرشين كويسين و الحمد لله و الأفضل من المال هو الخبرة الحياتية عندما تتعامل مع ناس مختلفة بعقول مختلفة و تدرك أن الناس مختلفون كثيرا عن بعضهم البعض و ليس الكل طيب و أيضا ليس الكل شرير .
المهم جاء ثاني مرة أعمل و كان في شركة تجارية تعمل في أجهزة الحاسب الآلي و الترجمة و بما أنني كنت أعشق اللغة الإنجليزية فكنت أقوم بترجمة بعض الكتالوجات و المستندات لصالح الشركة و طبعا بما أنني كنت طالب في الجامعة فكان الأجر بسيط جدا و ده كان أيام الدوس و اللوجو و بعدين ويندوز 311
المهم أكثر استفادة هي خبرة العمل و ليس المال .
و بعدين جاء عالم الويندوز 95 و الذي كان نقلة كبيرة جدا في موضوع الحواسب الآلية و بما أنني كانت لدي بعض الخبرة في هذا المجال فقمت بالعمل في صيانة و تصليح أجهزة الحاسب الآلي و أيضا نسخ الأسطوانات حيث أن أجهزة نسخ الأسطوانات هذه الأيام كانت مرتفعة الثمن و أيضا ثمن الاسطوانات ... المهم كونت مبلغ مالي كويس جدا من هذا العمل لمدة لا تقل عن 6 سنوات ...
و بعدين أنتشر الموضوع و أصبح كل من هب و دب و كل اللي مش فاهمين اي حاجة في البطيخ يشتغلوا في الموضوع ده .فلم يعجبني الحال و تركته
و بعدين ربنا كرمني و سافرت بره مصر في دول عدة منها فرنسا و أسبانيا و أنجلترا و أيرلندا .... و لكن أستقرت في انجلترا و كانت أفضل فترات حياتي على الاطلاق ....... حيث العمل و أحترام قيمته و أيضا أحترام الذات .
..........
أنا شكلي رغيت كتتتــــــــــــــير قوي

موضوع النسخ ده كان حكايه بمعنى الكلمه.. كان أيامها الواحد بيطلع عينه علشان ينسخ أي حاجه والمشكله إن كان فيه ناس بتستغل الموضوع ده أسوء إستغلال للأسف

بس تربية الأهل من البدايه لأبنائهم على المسؤليه ليها الأثر الأكبر في حياتهم المستقبليه

المشاركة الأصلية كتبت بواسطة Xpert

انا يا سيدي ... مولود و عشت اول نص عمري في سويسرا .. منت يومياُ مع ابويا في الشغل .. و كان عندنا ورشه بتاعه فك و تجزئه العربيات بجميع انواعها .. و ده علشان تنزل قطع غيار (شغل علي مياه بيضاء .. حاجه استيراد سويسرا حاله نمره واحد و العربيه كلها كانت ماشيه و متحركه و عارفين حالات المكن و العربيات بتاعتنا .. حاجه مضمونه يعني) .. يبقي اكتسبت الخبره بتاع العربيات .. (دماغ متكلفه بقي بتاعه الهامبرجر و الايس تي و الجاتوه .. و في نفس الوقت مخ شغال في العربيات ..) .. جيت مصر .. قبل ما نيجي خززننا (من تخزين) شويه بضاعه و كده .. و قلنا يا هادي .. نفتح قطع غيار و نشتغل .. المكان : بورسعيد .. الزمان : احنا بلا فخر ابويا و عمامي كانو من اوائل اللي اشتغلوا في بورسعيد .. بعد ما قفلوا جمارك السيارات و كده .. و نقلوا علي قطع الغيار ...

رحت اشتغلت هناك شويه (بنك الاسكان هماره 46 محل رقم 5 .. قدام الجنينه .. و لسه مفتوح و شغال برضه بس عمي اللي مشغله حالياً لانه اصلاً بتاعه هععع) .. و جبت البضاعه و قعدت في بني سويف .. اتعاملت مع الشعب من اول الزبال (نو اوفينس يا جدعان) لحد الوزير (بلا فخر) .. و اشتغلت .. و اتعاملت .. و المشكله بقي ..
البلد مافهاش ثقه ! محدش بيثق في حد .. و بالتالي .. كله عاوز ينهب و يجري ! ..
اتعاملت مع الرتب جميعاً .. و مع الشعب .. شويه شويه .. جالي مامور الضرايب دخل علي طمع .. و انا ماشي بنظام البكاء علي راس الميت .. و انتو طبعاً عارفين الليله .. هب هب راح جايبني تحت ضرسه .. و قفلت البيبان و قعدت في البيت .. علماً بان انا حالياً بادرس تجاره .. 21 سنه .. و الكلام ده كله حصل في خلال ال 10 سنوات الماضيه .. يعني جيت مصر و انا عندي 11 سنه .. و اتعاملت مع الشعب من و انا صغير .. و كان الله في عون المحسنين ..
حالياً انا اتحايلت علي المعلم الكبير عشان افتح الدكان باسمي انا المره دي .. رفض المعلم ...
و اهه .. اديني قاعد لما نشوف ايه الحكايه ...

واضح يا بيشو إنك خبره كبيره في المجال ده ... كمان الوالد والعمام ومجال عملهم ذات نفسه كان ليهم الأثر الأكبر والعميق في تكوين حياتك من الصغر.. يعني إنت لو بتتكلم إن كل اللي حصل ده حصل في 10 سنين بس .. تخيل بقى بعد 30 او أربعين سنه... هاتبقى أييييه.. هاتبقى professional في مجالك ده

الخبره في السن الصغير ده ممتازه جدا جدا في الحياه العمليه المستقبليه

ربنا يكرمك يا باشا في موضوع الدكان ده ..

المشاركة الأصلية كتبت بواسطة CryptonX

انا مش متابع الموضوع من الاول
اسف جدا

بس انا فعلا كنت بعمل وانا طالب في ثانوية عامة
بس من المنزل عن طريق الانترنت .
18 سنة .
كنت بصمم مواقع و اشتغلت في شركة هولندية ( تصميم برامج ) www.daansystems.com
و فعلا في برنامج مشهور حاليا بس قدم شوية
اسمه 1337Player
انا قمت بالاشراف علييه و تصميم شكله و تجربته
ميزته انه بيشغل كل انواع الفيديو و حجمه لا يزيد عن 250 كيلوبايت
www.daansystesm.com/1337player
( الموقع ايضا من تصميمي )

بس الكلام ده من 4 - 5 سنين
وانا حاليا توقفت عن العمل كمصصم واجهات برامج و مواقع .
لانشغالي بشغلي حاليا ( مهندس معماري )

وللأسف كنت ماديا باخد فلوس اكتر و انا قاعد في البيت عن مابشتغل كمهندس معماري حاليا

و بفكر ارجع تاني لهوايتي الرئيسية
وهي تصميم واجهات مالتيميديا
حتى اني شاركات في تصميم و عمل بعد الالعاب ثلاثية الابعاد مع بعض اصدقائي الاوروبيين بس للاسف المجال ده مقفول في مصر وملوش اي مستقبل .

ارجوا اني اكون افدتكم و مطولتش عليكم .

إنت ممكن تقسم وقتك بين شغلك وبين هوايتك اللي بتحبها .. لغاية ماتوصل لل optimum في واحده فيهم وتحس ساعتها إن ده هو اللي هاتكمل فيه بقيت حياتك

المشاركة الأصلية كتبت بواسطة onna

بجد ما شاء الله بهرتوني

انا مكنتش فاكرة كدة خالص .. و بجد طمنتوني ان على الاقل حتي لو مفيش شغل و البلد واقفة بس مال شاء الله محدش قاعد حاطط ايدو على خدو

انا عندي 22 سنة و بعتبر لسه ماليش تجارب و خبرات في الموضوع دة عشان لسة متخرجة من هندسة قسم كيمياء و لسة كمان مشتغلتش في مجالى بس مخنوقة جدا من موضوع انى لسة باخد مصروفي من مامتى و مش عارفة حتى استقل بعيد عنها بس مقعدتش حاطة ايدي على خدي

و رحت اشتغلت فترة في Berlitz و كنت english instructor مامتي مكانتش موافقة بس قاعدة البيت خنقتني و بغض النظر عن العائد المادى انا حسيت انه على الاقل اتعرفت على ناس و شفت التعامل و ان شاء الله لما تجيلى فرصة الشغل في مجالى هبقي داخلة على الاقل هايبة الموقف

بعدين وقفت شغل في Berlitz و رحت اشتغلت في مدرسة جوز اختي و كانت international و كنت بدرس برضه math و chemistry بس بجد فلوسها كانت مغرية جدااااااا و رحت دبى و دلعت نفسي و بجد احلى الحاجات اللى الواحد بيشتريها بفلوسه اللى تعبان فيها

ان كمان معرفش ازاى يبقي واحد شحط كبير و لسه بياخد مصروفه ان كان متقدملى واحد اهله ما شاء الله اغنيا جدا و هو محترم و من بره مظهره بيقول انه شخص كويس و كان معاه نيو شيروكي و ان كان عندة 20 سنة و فرحانة بالعربية ههههههههه

و عندهم فيلا في الشيخ زايد و هو عنده فيلته هناك برضه .... ساعة لما مامتى قالتلى عليه كنت عارفه انه شغال مع والده في شركتهم و كدة ..سألتها طيب خريج ايه قالتلى اداب تاريخ و لسة متخرج !!!

المهم في اول قاعدة سابونا نتكلم شوية فبسأله انت شغال مع والدك في ايه بظبط ؟

قالى انا مش دايما بروح !!!!!!!! يعني ايه حضرتك مش دايما بروح ؟ بروح لما بابا بيكون تعبان و مش قادر يروح !!!! طيب بتعمل ايه حضرتك غير انك بتروح بدل بابا ؟؟ ولااا حاجة !!!!!!!!!!!!

واحد عنده 28 سنة و كل وظيفته في الحياة انه استبن لوالده !!!

ان صدعتكو بقا كفاية المهم بجد ادعولى بقا انا كمان ربنا يوفقنى في فرصة شغل حلوة و في مجاالى يا رب ان شاء الله

الحمد لله إن ربنا كرمك بالشغل اللي في تخصصك

بس حلوه إستبن ده... جايه في المكان الصح

المشاركة الأصلية كتبت بواسطة OlaOsman

موضوع قيم جدددددددددددا.. مش عارفة ازاي أول مرة أقراه.. بس جزاه الله خيرا Goodle على دعوته الكريمة

قصة كفاحي في الحياة العملية بدأت من 10 سنين.. من ساعة ما اتخرجت و عشان القصة طويلة حبتين فمش هاينفع احكيها هنا.. هتناموا مني هتناموا مافيهاش كلام

هتلاقوا القصة كلها في المدونة بتاعتي القديمة على شكل حلقات في اللينكات دي:

الحلقة الأولى

الحلقة الثانية

الحلقة الثالثة

الحلقة الرابعة

الحلقة الخامسة

الحلقة السادسة

الحلقة السابعة

الحلقة الثامنة

الحلقة التاسعة

الحلقة العاشرة

الحلقة الحادية عشر

الحلقة الثانية عشر

الحلقة الثالثة عشر

الحلقة الأخيرة و تعقيب

معلش يا جماعة انا عارفة ان كده كتير اوي و الموضوع كده تعدى مجرد قصة كفاح.. انما هي انا حاطاها في شكل قصة بتفاصيلها الدقيقة.. كنت فاضية بأه أيام ما كتبتها

أما بقى موضوعك يا علا .. فده حكايته حكااااااااااااااااااااااا ااااااااايه

الحمد لله إني قدرت أقرأ كل ال 14 حلقه

الحلقه الرابعه ..فيها مقطع إنت إستخدمتيه في موضوع من الموضوعات هنا ... حتى انا إستغربت أوي .. يعني الوقت اللي فتحت فيه المدونه ودخلتي على الحلقه الرابعه وعملتي كوبي بيست للمقطع ده في الموضوع العلاني اللي مفتوح هنا .. كنتي إنتي وفرتي الوقت ده وكتبت جمله ولا إتنين في الرد ويوصلوا نفس المعنى برده... أنا وجهة نظري هنا في موضوع الوقت بس

الحلقه الثامنه ... موضوع دادا سلوى ده ..مؤثر قوي.... يارب إكرم كل بنات المسلمين يارب

الحلقه الثالثه عشر ... كويس أوي إنك حافظتي على المبدأ ومتأثرتيش بكلام شوشو اللعين ... لأن الإنسان في الدنيا ديه عايش وبيتعامل معاها بناءا على المبادئ اللي إتربى عليها ..

بس 14 حلقه فيهم معاني كتير وقصص مؤثره

المشاركة الأصلية كتبت بواسطة asdasdasd

يعني الدوله بتوفر للمبدع كل متطلبااااته الحياتية ودعم مادي قوي عشان يتفرغ هو لفنه او ابحاثه كل حسب تخصصه

..

لو مصر عملت الموضوع ده ... حايطلع من عندنا عباقره كتير زي زويل وأحسن كمان

والله الشعب المصري ده .. لو إتوظف صح .. هايبقى احسن شعوب الأرض

[quote=abdelaziz-waleed;240763]

الدول بتدي منحة تفرغ لما تلاقي الشخص مبدع وهايفيد الدولة ويستاهل هذه المنحة

[/quote]

والله في ناس كتير عباقره ومبدعين في كليات مصر ومافيش حد لا بيبصلهم ولا بيعبرهم .. شئ حزين جدا

المشاركة الأصلية كتبت بواسطة OlaOsman

الموضوع ده فيه عصير خبرات كثير من الناس في المنتدى في الحياة.. يا ريت باقي الناس يفيدونا بخبراتهم عشان نفيد بعض و نستفيد :)

ياااااه يا علا... أنا لما شوفت الموضوع ده أول مرة وقرأت القصص دي.. عرفت أد إيه الواحد لسه بيتعلم من العمالقة اللي في الموضوع

المشاركة الأصلية كتبت بواسطة meza

:(:(:(

*ترتسم على وجهى علامات الندم ..... كمن فاته القطار الذى لم يأتى للمحطة بعد .

:(

ندمان على إيه يا meza ؟؟
وإيه القطار اللي فاتك ؟؟