ربنا اكرمني بشغلانة في مجال الترجمة بطريقة غريبة جدا
أنا الحمد لله كانت سمعتي في الكلية وفي الجامعة عامة معروفة.. ودا عشان أنشطتي.. يعني اتحاد طلاب (في أول سنة بس.. وندمت لما عرفت الفساد اللي بيحصل أحيانا) وانشطة طلابية وكدة.
المهم كل الدكاترة بتوع قسم انجليزي كانوا يعرفوني شخصيا (ما كانش في واسطة) :)
المهم لقيت دكتورة من أيام الكلية بتكلمني وتقولي تحب تشتغل في الشركة الفلانية اللي فيها قسم ترجمة.. قلتها يا ريت. المهم ادتني رقم الراجل لكن سألتها حضرتك وصلتيلي إزاي قالتلي دا أنا بأشرف على رسالة واحد وهو مدير قسم الترجمة هناك وهو عاوز ناس ولما كلمت زميلتلك فلانة اللي اتعينت معانا وبقولها قالتلي عليك وادتني رقمك (شوف ربك بيرزق من حيث لا تحتسب).
المهم اشتغلت في الشركة دي سنة ونص.. ومشيت لأنهم بيعاملوا المصريين انهم كلاب فلوس (الكلمة دي سمعتها بودني.. وأرجو عدم حذفها من الرد أو استبدالها بكلمة "عبيد" إذا حبيتوا) :) :)
المهم مشيت للسبب ده على الرغم من انهم كانوا متمسكين بيا وحاولوا يغروني إن استنى وامسك ناس تحتي.
لكن انا الحمد لله كانت خبرتي بالترجمة (بطلت بقالي 7 سنين) وعلى الرغم من كده كل زمايلي اللي مازالوا في الترجمة أحيانا بيتصلوا يسألوني أو ياخدوا رأيي على الرغم إني حاليا خارج المجال.
المهم من ساعة ما قررت اسيب الشركة دي وانا ابتديت ادور على شغل.. ولقيت شخصين ما يعرفوش بعض (في نفس اليوم والله العظيم) بيقولولي على شركة اسمها مش كبير كانت عايزة ناس.
حسيت إنها إشارة من ربنا.. استقلت من الشركة الأولى بعد ما كنت اتفقت مع الشركة الجديدة.. وخليت بين الاستقالة وبداية الشغل الجديد 3 اسابيع اجازة اتجوزت فيها وقضيت احلى شهر عسل :)
المهم الشركة اللي رحتها كانت مملوكة لمصري عايش في امريكا.. كانت في صناعة البرمجيات.. وكان معمل تطوير البرامج في القاهرة.. أما التسويق والمبيعات في أمريكا.
المهم اتعلمت شغلانتي الحالية (كاتب تقني) أو (Technical Writer) واشتغلت فيها من 2001.
المهم الشركة بتاعتنا كان اسمها زي الدهب في امريكا لدرجة إن شركة كبيرة زي آي بي إم اشترتنا سنة 2002.
والجرايد المصرية كتبت عننا "الكوادر المصرية التي خرجت للعالمية" وكلام كبير أوي في صفحة الكمبيوتر بتاعة الأهرام.
المهم من ده كله عاوز اقول حاجة واحدة.
الواحد مش بينجح غير لما يعتمد على الله ثم على نفسه
والراجل الحقيقي هو اللي كل ما الظروف تقسى عليه، هو اللي يقسى عليها ويطوعها بمعونة الله
ادعولي ربنا يصلح حالي.. قولوا آمين
أرجوكم ما تبخلوش عليا بالدعوة دي: ربنا يصلح حالي... يلا بقى قولوا آمين :)
السلام عليكم :)
المفضلات