الموضوع: حوادث و نصائح ( تجارب حقيقية )

المشاركة الأصلية كتبت بواسطة yasso77

السياره - زستافا فلوريدا
الركاب - انا لوحدي
التاريخ - 12-4-2008
اللي حصل اني كنت مسافر من اسيوط الي المنيا علي طريق مصر اسوان الزراعي وكانت الساعه 11 مساءا تقريبا وكنت لسه واخد اول الطريق يعني كنت مشيت كده حوالي 10 كيلو وكنت لسه ماحطتش حزام الامان وكنت ماشي حوالي 120 -130 المهم افتكرت الحزام روحت جيت اركبه وكنت ماسك طرفه بايدي وسانده من النص باسناني لاني كنت ماسك الطاره بايدي التانيه ولسه هاركب الحزام وسمعت صوت فرقعه فاكتشفت ان الاطار الخلفي انفجر المهم مارضيتش اضرب فرامل وسيبت العربيه لغايه ماتوقف لوحدها وفجائه يامعلم لقيت قدامي عربيه ربع نقل ماشي قدامي وطافي النور رحت دايس فرامل وعينك ماتشوف الا النور العربيه انحرفت يمين جامد خالص ناحيه الترعه رحت لميت الدركسيون وطلعت العربيه من الطبان بس طلعت ماشيه علي جنبها وواخده ناحيه الشمال وفي اتجاه عمود كهربه ودخلت العربيه في العمود وبعدها حسيت اني اضربت في الخلاط وسمعت دوشه جامده جدا وبعد كده حسيت بهدوء وماكنتش عارف انا فين بره العربيه ولا جوه لغايه لما اكتشفت اني في الكنبه الخلفيه وسنعت صوت الناس بيقولو فين السواق ده مش في العربيه وانا عمال اقول انا هنا ازاي مش جوه العربيه وبرده محادش سامعني لغايه لما ضربت الباب برجلي لانه ماكانش راضي يفتح ونزلت لقيت العربيه مقلوبه علي ضهرها وعباره عن حته صفيحه معجونه في بعضها باستثناء الحته اللي انا كنت فيها والحمد لله اني ما حطيتش حزام الامان لان كان زماني ميت المهم لما نزلت قعدت ابص في نفسي واطمن لاقيت نفسي والحمد لله سليم تماما ومفيش غير جرح بسيط في ركبتي اليمين
وقولت الحمد لله اللي نجاني وقعدت اضحك والناس كانت مستغربه مني خالص بس انا كنت بضحك لاني كل ما ابص علي العربيه مصدقش اني سليم وخصوصا ان جسمي مليان ولكن ربك لما يريد تحدث المعجزات واخيرا بعت العربيه حوادث وجبت عربيه تانيه النترا 2008 وبقيت اشيك علي الكاوتش ولما غيرت الكاوتش جبت ميشلان بالرغم من ارتفاع سعره ب 600 واي نوع تاني ب350 الي 400 جنيه بس الغالي تمنه فيه والعمر والصحه اغلي من اي شيء لان كنت مركب كاوتش اسمه لاسه تركي معفن في العربيه الاولنيه بس حرمت خلاص

اولا حمد الله عالسلامة وقدر الله وماشاء فعل وفعلا لو حاجة بسيطة في الجسم راحت ( ولو عقلة من الصباع الصغير ) مش هتقدر تعوضها بالف عربية ) فاحمد ربنا. ثانيا من ناحية حوار انك اشتريت كاوتش غالي عشان الاولاني كان رخيص ده قدر ومقدر انه ينفجر ويحصل كدة ملوش دعوة بقي غالي او رخيص نوعه كويس او رديء. واخيرا الحمد لله اللي طلعك منها سليم وربنا يعوض عليك في العربية اللي راحت. وتقبل مروري

موضوع جميل جزاكم الله خيرا
انا عملت كذا حادثه بس فيه واحده اللي هي الأخيرة من سنه بالظبط بس سبحان الله ظروف كتير اجمعت مع بعض علشان يحصل اللي حصل كنت ماشي مابين ميدان جهينه وطريق الواحات وعند الحته بتاعة الياسمين العجلة اللي ورا انفجرت كنت ماشي 150 فمدسش فرامل وماشي زي الفل اذ ربما الطريق منزل فالسرعه مش راضيه تقل قمت واخد مطب هوا قام العجله المفرقعه (الجنط ) خبطه في الأرض فالمقص انكسر قمت العجله بقت عمودي العربيه بس وعينك متشوف الا النور العربيه انحرفت جدا لفت شمال بقت ماشيه بعرضها حاولت ارجعها مفيش خلاص لقيت نفسي هدخل في العمود والشجره بسرعتي كسرت الدريكسيون يمين مش جايب اي حاجه وطبعا مش نافع ادوس فرامل اما لقيت العمود والشجر قرب أوي قمت لفيتها العكس شمال قمت داخل باجنب اليمين في الرصيف وقامت مقلوبه علي السقف ومشيت بتاع 500 متر علي السقف بس وقامت و اقفة لقيت الدنيا ضلمت والدنيا بقت ضيقه جدا كانت الساعه تقريبا 11 الصبح العربيه اتقلبت في الحاره الشمال
اول مالعربية وقفت لقيت الحزام فك لوحده قمت واقع بعدين فقت من الصدمه ببص شمالي لقيت الرصيف عرفت اني فنص الحارة الشمال بقيت مستني العربيات الجايه علشان تكمل بس الحمد لله سمعت صوت الفرمله بس عرفوا يعدوا مني مفيش ثواني الشعب المصري خدوام لقيت هيله هوب هيله هوب الناس بتعدل في العربيه احنا كنا اربعه الإتنين اللي ورا طلعوا من الشباك الباب اللي ورا قبل العربيه متعدل احنا اللي كنا قدام السقف كان بسوي الكبوت منفعش نطلع الا من قدام الحمد لله برضه الناس وهيه بتعدل العربيه وكانوا هينزلوا القايم علي رجلي فلت بالعافيه الحمد الله محدش حصله حاجه غير اللي جانبي علشان مكنش رابط الحزام جاله بعض الكدمات والجروح معظمها بعد العربيه ما وقفت لانه جاله زي تشوك بقي عايز يخرج من العربيه بأي طريقه فجرح نفسه كتير من الزجاج اللي متكسر انا الحمد لله ولا الهوا كل اللي يشوفني ميصدقش اني كنت في العربيه دي
النتيجه العربيه كانت ريجاتا منفعتش تاني اللي فاضل منها الماتور والكراسي اللي كانت اتكسرت والكنبه بس الباقي كله راح في الحادثه العربيه اتكلف تصليحها تمنها بالظبط المشكله اني بحبها فمقدرتش ابيعها بس الحمد لله كانت مشكلتي ان حد يحصله حاجه بسببي ده اللي كان تعبني ساعتها لان اللي يشوف العربيه ميصدقش ان فيها حد عايش بس كل شئ نصيب في حد من اللي كان معايا في الحادثه توفي من 5 شهور من غير اي حاجه وهو في بيته الله يرحمه الحمد لله
نصيحه
محدش يمشي وهوا شاكك في العجل انا كنت رايح بالليل قبل الحدثه اغير العجله اللي انفجرت بس لقيت المحل قافل فقلت خليها بكره تاني حاجه بلاش جري لان لوكنت ماشي بسرعه أقل كان كان الموضوع ممكن والله اعلم يكون اخف من كده
الحمد لله

السرعة الزيادة لحد دلوقتي هي العامل المشترك في كل الحوادث !!!

السلام عليكم
انا الحمد لله مفيش حوادث جامدة قوى بس اخر حادثة وانا على اخر طريق الاوتوستراد عند مساكن شيراتون . فى دخلة كده قبل

البنزينة مش عارف الصراحة فيها ايه زى نادى كده تبع الطيران المهم الشارع كان واقف وانا كان قدامى عربية وكنت سايب مسافة

كويسة (وأكنى حاسس باللى هيحصل) وكانت فى عربية على شمال العربية اللى قدامى وفى مسافة بينهم وهى دى المسافة

اللى انقذتنى وانقذت العربية ....

فجأة سمعت صوت فرامل كبيرررررر و طاخخخخخخخخ مفيش ثانيتين لاقيت العربية اللى ورايا خبطتنى جامد رحت لفيت الدركسيون

ودخلت بين العربيتين اللى قدامى يدوب جرحت الرفرف اليمين حاجة بسيطة قوى والحمد لله انقذنا وش العربية انا نزلت قولت

هلاقى الشنطة دخلت فى الكنبة وكانت المفاجأة الحمد لله الخبطة جت فى الكامرة بتاعة الشنطة واتردت على البارد والاكصدام

محصلوش حاجة بس لسه فى نقرة ضغيرة كده تحت النمرة ودى سبتها بقه

سبب الحادثة بقه كان فى مينى باص من الاخضر بتاع النقل العام جاى سريع ودخل فى العربيات وانا كنت رابع عربية والاخيرة

عشان انا دخلت بين العربيتين اللى قدامى (هتلاقى الراجل بتاع العربية اللى قدامى عمال يدعيلى) والله يكون فى عون اصحاب

العربيات اللى ورايا ادمرت من قدام ومن ورا

المهم كل واحد ياخد باله ويسيب مسافة كويسة لو على طريق سريع ووقف يعمل حسابه ان فى ناس جاية بسرعة وممكن متلحقش تقف وكمان ماترفعش فرامل اليد واستخدم الفرامل العادية ياأما تكسر يمين او شمال حسب الموقف او تقف قبل ماتدخل فى العربية اللى قدامك...الحمد لله

المشاركة الأصلية كتبت بواسطة c500

نقدر نجمع من تجارب الاعضاء التى سبق ذكرها بعض النصائح المهمة جدا جدا والتى كانت العامل المشترك فى اغلب التجارب السابقة
ثانيا : حزام الامان

2- بلاش تحط الحزام فى الاماكن المزدحمة علشان ماتتضايقش

بعد اذنك ياباشا
كل كلامك مظبوط 100x 100 ماعدا الحتة دي
كنت واقف في اشارة وقربت على دقيقة وقوف يعني بقالي حوالي دقيقة واقف ومفيش حد واقف ورايا
وفجأة واحد بعربية لادا جه دخل فيامن ورا رقبتي اتنطرت لورا الأول وبعدين اتنطرت لقدام واتخبطت خبطة خفيفة في الدريكسيون
لو الخبطة كانت جامدة شوية - الحمد لله - كنت اتخبطت في الدريكسيون جامد ويمكن دماغي كانت وصلت للبرابريز لاني وصلت للعربية اللي قدامي وخبطتها خبطة خفيفة



وعموما الموضوع تعود !!!!! لو اتعودت عليه مش هتحس انه بيخنق بعد كدة

الموضوعات شيقة و جميلة احفظنا جميعا يا رب و استرها معانا جميعا