احترس من النصابين في السوق

**mohamedhfz** · 15-07-2010 03:35 PM

معلش يا رجاله انا بتاسف تاني علي التأخير بس فعلا غصب عني و الله

المهم نكمل الحكايه

تاني يوم كلمتوا الصبح علشان اطمن و نتفق علي الميعاد و اتفقنا علي الساعه عشره عند البنك الأهلي في حلوان و كان عمال يحاول معايا اني انا اللي اروحله او نتقابل في حته اقرب من كده و قولتلوا مش هينفع امشي بالفلوس من غير عربيه و اركب بيهم المواصلات

المهم لقيتوا كلمني الساعه 9 و نص و قالي انا في الطريق و قالي كمان (خالي بالكوا معايا من الحته دي) احنا رحنا الشهر العقاري و عمي عملك (عقد مسجل في الشهر العقاري باسمك ) علشان منضيعش وقت و تلحق المرور و علشان هو مش قادر يقابل حد بعد موضوع بنته. طبعا انا قفلت معاه و انا جوايا 100 سؤال و الشك عندي زاد قوي .

ازاي حد يكتب لواحد عقد مسجل بعربيه قيمتها 85 الف و هو واخد 500 جنيه بس . و بعدين يعرفني منين علشان يثق فيا الثقه دي . مش ممكن اطلع نصاب و ابلغ عن العربيه و اخدها من غير مادفع باقي الفلوس . مليون سؤال في دماغي و مش لاقي اجابه . رحت مكلمه و قولتلوا هات معاك بطاقه عمك . انا قولت اكيد لو العربيه فيها حاجه مش قانونيه صاحبها عمره ما هيديلوا البطاقه . المهم قالي اوك

و اتقابلنا في حلوان و كان معاه عمه التاني اللي كان معاه في السوق و قالي انا مردتش اسيب محمد يرجع لوحده بالفلوس فاخدت اذن من الشغل علشان اجي معاه

و صلنا عند البنك و قولتيلوا وريني الورق و العقد و الرخصه

و هنا كانت المفاجأه الأولي . الرخصه باسم واحد اسمه (بدوي ) و اللي ماضي بايع في العقد واحد اسمه (كمال) و العقد الأبتدائي انا كتبه مع (محمد) و لقيت كمان فيها توكيل معمول من (بدوي) ل (كمال) مع انه قال ان مفيهاش توكيلات

و كمان رخصه العربيه تبع مرور الجيزه و التوكيل معمول في الشهر العقاري بتاع نادي الجزيره يعني القاهره

يعني كل ورقه شكل و لون و كل ورقه بشخص جديد و امضاء جديده

طب وريني يا عم بطاقه صاحب العربيه . مجبتهاش علشان كنا مشينا و مكنش ينفع نرجع تاني

طب اديني رقم صاحب العربيه اكلمه . لأ اصله قافل علي نفسه و مش بيكلم حد معلش اعذره ربنا يكون في عونه

طب فين كمال اللي عمل العقد ده . .. اصل ده يبقي جوز بنته و هو عملوا التوكيل علشان يبيع

طب التوكيل ده الراجل عملوا امتي .... من كام يوم بس احنا مكناش نعرف

ابص الاقي التوكيل بتاريخ قديم بقاله بتاع شهرين

طب ازاي التوكيل من شهرين و انتوا بتقولوا من كام يوم ... طب استني كده و راح محمد ده سحب نفسه و راح كلم حد في التليفون

و رجع قالي اللي في التوكيل ده مدير اعماله مش جوز بنته لأن الراجل ده استاذ في الجامعه و معندوش وقت للحاجات الصغيره دي

طب هاتولي كمال ده ..... اصله في مأموريه في اسكندريه و قافل تليفونه

طب ازاي في مأموريه و عملي العقد ..... ماهو عملوا و طلع علي اسكندريه

طب ازاي يا محمد و انت يا عم صلاح بتقولي انكم قرايب الراجل و انت مش عارف اسم جوز بنتوا اساسا

قالي اصل انا الصراحه جارهم و التاني قالي انا خاله مش عمه

طبعا انا اتأكدت انها نصبايه و ان في حاجه كبيره في الموضوع . بس اللي كتفني هو العقد اللي معاهم لأنه مسجل و ممكن تكون العربيه مسرقه و بما انها بقيت باسمي دلوقتي فممكن يعملوا بيها اي مصيبه و البسها انا او يضربوا توكيل من العقد و يبيعوها لحد تاني و يبقي انا اللي سرقتها و بعتها او يكون علي العربيه حكم ولا حجز و لا قضيه و اشيل انا الليله

فطبعا قولت لازم اتعامل بعقل و حكمه لحد ما ارجع العقد الابتدائي و المسجل و فلوسي كمان لأني للأسف مش من النوع اللي بيسيب حقه

فرحت ساحب نفسي و كلمت المحامي بتاعي اشوف هيقولي ايه

**أحمد علوان** · 15-07-2010 03:41 PM

أووووووووووة انا لما قريت اللي انت كاتبة الصراحة قلت لو كنت مكانك كان زماني دلوقتي مشرف على البورش

كمل عشان احنا متلهفين للباقي (ومن غير تشويق عشان متزعلش)

ويا ريت واحد بيبس عقبال اما تكمل ولو في غدا الموجود يس

**shasha850** · 15-07-2010 03:44 PM

**Ayman-Ahmed** · 15-07-2010 04:06 PM

موضوعك ان شاء الله يكون خلص على خير زى ما هنعرف بلليل ان شاء الله.بس لو انا مكانك وانا كنت فى مكانك مع نصاب زى كدة برده بس ده بقى جالى مع كل عيلته لما قولتله انا مش همشى البيعة ديه الا لما اشوف صاحب العربية ويمضيلى هو وتتلغى كل التوكيلات ديه.

يعنى ايه وازاى وبقولك ايه فكان ردى ببساطة خالى اللواء(الله يرحمه) قاللى كدة واهو معاكوا على التيلفون عشان هنروحله المكتب كلنا حالا نشوف رايه ايه.

العائلة بقت شخص واحد ومعلش يا طارق احنا رايحين البيت وراجعين علطول.والعقد اتقطع وال 1000 جنيه العربون اتعدوا تمام .طب والشرط الجزائى يا طروق؟ معلش بقى يا باشا.اصل انت مستعجل على الشرا والراجل اللى عامل التوكيل مش موجود دلوقتى.

طب خلاص يا طروق ولما تيجى تبيع تانى ابقى اظبط ورقك وكلامك.

لو كان حد فيهم قاللى ماشى اكلمه كان سمع احلى(الرقم الذى طلبته ليس صحيح)

عادة النصاب بيبقى جبان واول ما تقوله القسم-الشرطة بيرجع علطول

**mmans** · 15-07-2010 04:19 PM

اوبببا
الموضوع سخن اوى
متابع باهتمام

**cyborg_ift** · 15-07-2010 04:28 PM

والله انا عندي رد بس مش هيعجبك!!!!!!!!!

**myself112** · 15-07-2010 04:31 PM

متااااااااااااابع

**dolly13** · 15-07-2010 04:31 PM

اعتقد يا جماعة والله اعلم ان الموضوع مش نصباية بالمعنى الحرفى
اللى بيبيع العربية ده تاجر وبيستلقط عربيات حلوة او حالتها كويسة ويبيعها مع فارق الفين جنيه او 3 علشان كدة كاتب فى العقد شرط جزائى 2000 جنيه بحيث لو المشترى شك فى كلامه وحب يرجع العربية يبقى الراجل كسب سمسرته برده و يبيعها تانى بنفس الطريقة لحد ماواحد يرضى ياخدها بتمنها ويبقى عارف انه دافع فيها الالفين الزيادة وان البائع تاجر وبس
بس لو طلع هو ده اللى حصل محدش يتهمنى انى باتاجر فى العربيات

**cyborg_ift** · 15-07-2010 04:34 PM

على فكره انت ممكن بدل ما تقوم وتقعد وتقعدنا معاك ده كله ممكن كنت تختصر الاحداث وكانت هتبقا مشاركه واحده من اول امبارح بالليل ....... يعني القصه مليانه حشو وبصراحه كان نفسي اكملهه قبل ما اروح مشوار وادينا كلنا بنستفيد من احدث طرق النصب

**hossam_elwani** · 15-07-2010 05:28 PM

الى الامام يا نصابين ........

الموضوع: احترس من النصابين في السوق

LinkBack

أدوات الموضوع

عرض

-

-

-

-

-

المواضيع المتشابهه

النصب والسرقه احترس ثم احترس

احترس من درش

الالنتر الى هتكسر السوق وتسحب بساط السوق كله ما شاء الله عليها

احترس من الـ atm

الكلمات الدلالية لهذا الموضوع

المفضلات

المفضلات

ضوابط المشاركة