الموضوع: احترس من النصابين في السوق

انا مدفعش جنيه واحد في حاجة الا لما اكون متاكد من كل الورق وكل حاجة - كان المفروض لو هوا ربط كلام علي بال ما تتقابلو تاني يوم يبقي كل حاجة تتاجل لتاني يوم - هوا اللي عايز يبيع يعني من غير عربون او اي حاجة كان يستني لتاني يوم عادي


من ساعة المحطة وهيا باينة - اي معلومة مخلوفه عن اللي اتقال يبقي الكلام كلة فشنك

الجواب بيبان من عنوانة

فرحت ساحب نفسي و كلمت المحامي بتاعي اشوف هيقولي ايه

نسيت اقولكم كمان انه قالي انه دفعلي 1600 جنيه رسوم تسجيل العقد

المهم المحامي قالي ان الموضوع فيه قلق و خوفني بردو من موضوع العقد و قالي لازم تروح الشهر العقاري و تتأكد من العقد . لو طلع سليم يبقي تتأكد من الرخصه و تشوف ملف العربيه في المرور علشان ممكن تكون الرخصه هي اللي مضروبه

اما لو مضروب يبقي تتطلع علي القسم وانا هحصلك

قولتلهم هو العقد معمول في اني شهر عقاري . طلعوا مش عارفين و اتصلوا بالتليفون علشان يعرفوا اتعمل فين و قالولي في المعادي

قولتلهم نروح نكشف علي العقد هناك . لقيت وشهم اتقلب و قالولي مفيش مشكله اننا نروح بس ده تضيع و قت و انت مسافر كمان يومين

قولتلهم مش مهم انا مش ورايا حاجه غير العربيه النهارده و قعدوا يحلفوا ان العقد سليم و كلام كتير قولتلهم خلاص مش عايز العربيه

رجعوا تاني يتكلموا في التليفون و في الأخر قالولي اوك احنا هنروح بس علشان تطمن

طبعا انا قولت انهم هيكلموا الراجل بتاعهم في الشهر العقاري علشان يعمل حسابه بس قولت امشي معاهم للأخر لحد ما ارجع حاجتي

و احنا في العربيه الراجل اللي هو بقي خاله (صلاح) قالي انا مش عارف انت شاكك في ايه ده احنا عاملين عقد مسجل وانا راجل مهندس محترم في شركه تاون جاز بتاعت الغاز . حظه الأسود اني اعرف مدير عام في الشركه دي . فقولتلوا تعرف فلان قالي اه طبعا ده حبيبي دا احنا عشره 25 سنه بس انا لسه رئيس قسم و هو مدير عام

لما نزلنا من العربيه كلمت الراجل بتاع تاون جاز قالي انا سمعت الأسم قبل كده بس معرفوش معرفه شخصيه و حكيتلوا الموضوع و قولتلوا اسألي عليه قالي اوك هسأل و اكلمك

دخلنا الشهر العقاري و مردتش اروح علي الموظف اللي عمل العقد و رحت رايح مباشره علي المديره و ورتها العقد قالتلي اه سليم و الأختام سليمه و رحت للموظف و فتحلي الدفتر بالعافيه و لقيت العقد متسجل فيه اسمي مشتري بس من غير امضاء

قالولي ها اطمنت قولتلهم ربنا يسهل نتطلع بقي علي المرور علشان عايز اشوف ملف العربيه . اتشالوا و اتحطوا و الراجل قعد يقول انا عندي السكر و كده ممكن اموت منك و كلام كتير اوي ملوش لازمه

و جالي تليفون من الراجل بتاع تاونجاز و قالي انه فعلا شغال في الشركه بس ابن ستين (.......) و نصاب و عليه مشاكل كتير و سمعته زفت و انا مش مسئول عنه في اي حاجه يدخل فيها اسمي

طبعا الموضوع كده اتحسم بس لسه عايز افهم اللعبه فين علشان اعرف انا اتورطت في ايه و اشوف هتصرف ازاي لأن العربيه رسميا باسمي دلوقتي و اي مصيبه انا اللي هشيلها

قعدوا يعملوا تليفونات تاني و في الأخر قالولي هنروح المرور علشان نخلص من الموال ده . قولتلهم ماشي

و احنا في العربيه و طالعين الاتوستراد قولت للراجل اديني رقم بيت صاحب العربيه اكلمه اعزيه او اكلم حد من البيت

قالي معرفش رقم البيت . قولتلوا يعني انت متعرفش الراجل اساسا قالي اه و بعدين افرض اننا تجار و اتعامل معانا علي كده

قولتلوا قول كده من بدري و بلاش لف و دوران و حوارات و كدب . انتوا سماسره و عايزين قرشين و انا معنديش مشكله اني اتعامل مع تاجر في العربيه بس يبقي الكلام واضح و الورق سليم

و بما انك سمسار يبقي توصلني لصاحب العربيه و مش هتكلم معاه في فلوس علشان مضيعش سمسرتكم و حسيت في عنيهم غدر

و قالي مش هينفع

فقولتولي اقف علي جنب علشان نتكلم و نعرف هنروح علي فين و اول ما وقف نزلت من العربيه وقعدنا نتكلم و فهمت اني مش عارف اخد الورق منهم بالذوق و قررت اني استعمل اسلوب تاني

و قولتيلوا ان العربيه متلزمنيش و مش عايز ال500 جنيه . قالي طب و ال1600 جنيه اللي دفعناهم و ال 2000 جنيه الشرط الجزائي قولتلوا مليش فيه و رحت سيبه و عديت الشارع و اخدت تاكسي و مشيت

لقيت بقي تليفون من واحد جديد اسمه (سامح) بيقولي انا صاحب معرض العربيات اللي هما شغالين معاه وواخدين منه العربيه قولتلوا خير. قعد يثبت فيا شويه و بعدين قالي اروح الشهر العقاري اعمل تنازل عن العربيه او توكيل ليهم علشان يعرفوا يبيعوها بعد كده (خدوا بالكم من التدبيس ده) .طبعا كده هما عايزين يدخلوا حد معاهم في اللعبه علشان يشيلها لأن مفيش تاجر في الدنيا هيسجل عربيه باسم حد من غير ما يكون واخد فلوسه بالكامل و استحاله يقع في غلطه زي دي

طبعا قولتلوا اسف انا ممضيش علي بيع حاجه مش ملكي اساسا . قالي طب انت عايز ايه . قلتلوا فلوسي و العقد . قالي مش هينفع و احنا هنعرف نتصرف في العربيه

رحت طالع علي قسم حلوان علشان اعمل بلاغ بالموضوع . امين الشرطه في الاستيفه لما حكيتلوا قالي دي نصبايه و اديتوا صوره بطاقه الواد و ظبط الأمين راح قالي كلمه و اديني التليفون و راح واخد الواد طريحه قباحه من بتوع الامناء و قالوا حاجه الباشمهندس ترجعله النهارده علشان لو مجتش احنا اللي هنجيبك و قفل السكه و قالي هيكلموك اكيد . قلتلوا طيب و محضر اثبات الحاله قالي مش هينفع تعملوا هنا لازم في محل اقامه الواد او محل الواقعه اللي هو المعادي.لقيت طبعا بعديها تليفونات و يا باشمهندس متكبرش الموضوع و ملهاش لازمه الأقسام و حاجتك هتجيلك قولتلهم ماشي بس قولت لنفسي لازم اعمل المحضر احتياطي لأي ظرف. كلمت عقيد اعرفه في المجمع قالي هبعتلك امين من مكتبي و هيقابلك في المعادي . قبلتوا هناك و دخلنا نعمل المحضر قالولنا يتعمل في قسم البساتين علشان الشهر العقاري تبعه

رحنا علي البساتين و عملنا محضر اثبات الحاله و ظبطت الأمين اللي هناك كمان راح عامل محضر نصب كمان و راح مظبطه ورص الأقوال و كل حاجه

لقيت الواد بيكلمني بيقولوا قابلني عند نادي السكه اديك الحاجه . طبعا حسيت انه ممكن يكون في غدر .قولتلوا تعالي انت . انا في قسم البساتين قاعد في مكتب المأمور مستنيك و راح الأمين واخد التليفون و كلمه علي انه المأمور و عمله رعب مني . طبعا الواد كلمني بعد نص ساعه تاني و هو بيرجف و قالي بصراحه انا خايف اجي تعالي نتقابل في اي حته قريبه . قولتلوا متخفش انا لو عايز اجيبك بالعافيه كان زمانك قدامي دلوقتي انت و العربيه و الفلوس . انا مش عايز اأذيك وعلشان تتطمن انا هستناك بره القسم مش جوه لو خايف اني اشدك جوه ولا حاجه . انا هستناك بره نص ساعه لو مجتش يبقي متكلمنيش تاني و شوف حتي تستخبي فيها

عدت النص ساعه و مجاش و بيكلمني رحت قفلت التليفون في وشه لما قالي انه خايف يجي تاني و قولتلوا مات الكلام

و بدأت اعمل اتصالاتي بالقرايب و المعارف الجامدين لأني فعلا لحد اللحظه دي كنت عايز اخلص الموضوع ودي و معملش مشاكل علشان مفيش وقت

و كلمت جوز خالتي قالي بكره الورق و الفلوس و العربيه و الواد هيجولك تحت البيت

و انا في الطريق لقيت واحد جديد بيكلمني و بيقولي انا المحامي بتاع المعرض و جار محمد و اوامر سيادتك ايه . قلتلوا خلص الكلام محمد و الحاجه هيباتوا قدام البيت الليله و قفلت معاه

و كلمت عمي قالي روح علي خالد بيه رئيس مباحث السيارات في المديريه و هتلاقيه هناك الساعه 11 و قولي انك من طرفي و احكيلوا و هو هيتصرف

لما وصلت البيت لقيت تليفون جديد من واحده ست بتقولي انا ام محمد و بحلفك باغلي حاجه عندك ما تعملش فيه حاجه و اللي انت عايزه هتخدوا ولو عايز العربيه ببلاش خدها بس من غير ما تأذي الواد و قعدت تعيط كتير في التليفون و كنت بتكلم من المايك و امي سمعت الحوار و بعد ما الست قفلت امي قالتلي علشان خاطري بلاش تعمله حاجه لأن الست صعبت عليها قوي و طبعا انا مردتش ارد خاطر امي

كلمتهم و قولتلهم انهم يقابلوني بالورق و الفلوس عند مديريه الأمن الساعه 11 . الست قالتلي هيا مواعيدك كلها يا في الأقسام يا المديريه قلتلها ده اللي عندي لأني هكون في مكتب رئيس المباحث هناك

طبعا رحت المديريه و اتاخروا و قبل ما اطلع كلموني و قالولي احنا جينا و اتقابلنا و كانت هي و واحد تاني عرفت انه المحامي اللي كلمني . طب هات الورق قالي في العربيه هروح اجيبوا و راح بيديني الفلوس قولتيلوا الورق الأول و رحت قعدت في عربيتي لقيتوا جاي واداني الفلوس و (صور) الورق . طبعا انفجرت فيه و رميت الفلوس و الورق في وشه وطلعت بالعربيه و نويت اطلع (.....) اللي جابوهم

وصلت البيت لقيت تليفون من الست و متزعلش و حقك عليا و اصل ده المحامي اللي قال كده علشان نضمن العربيه و كلام كتير . المهم قولتلها اخر كلام عندي تيجوني بكره باصل الورق و الفلوس عند الشهر العقاري و يكون معاكي الشخص اللي باعلي في العقد علشان ابيعله هو واذا كان هيجي اي حد تاني يبقي محدش يلومني علي اللي هعمله و كنت فعلا هشد الواد ده في امن الدوله هو واللي معاه

و الصبح جت فعلا و معاها الراجل و مردتش اطلع الا لما اخدت الورق و الفلوس و عملت للراجل عقد مسجل جديد و اصريت علي كده و مردتش اعمل توكيل و دفعوا 1600 جنيه تانيه و الست قعدت تبوس تدعيلي في اللي عملتوا و اني مردتش الأذي لابنها

المفاجأه بقي : ان الراجل اللي جه طلع تاجر عربيات و بيشتغل في عربيات الحوادث وانه باعلهم العربيه دي و الواد مرديش يعمل لنفسه ورق علشان ميبقاش فيها ورق كتير و الناس تشك فيها لأنها 2009 و التاني واخدها بسعر واطي طبعا و كان عايز يلبسهالي و يعملوا عليا تجار هو و شريكه

و احلي حاجه بقي بعد ما عملت للراجل العقد و الست كانت متفقه معاه انه يعملهم توكيل علشان يبيعوا العربيه لحد تاني . راح الراجل سبها و مشي و قالها مفيش توكيل و لا عربيات و سبتهم و هي بتجري وراه و تتحايل عليه

انا اسف جدا للاطاله في الموضوع بس انا حبيت اكتبه بالتفصيل الممل لعل و عسي اي حد يستفيد من اي تفصيله في الموضوع و خاصه ان الواحد بيدفع شقي عمره في العربيات و يمكن اي حد يتعرض لموقف زي ده و ربنا يسترها معانا جميعا

ارجو من اداره المنتدي اذا كان في الامكان جمع الموضوع كله في مشاركه واحده ليتمكن الأعضاء من متابعته مباشره والا يضطروا لقراءه كل المشاركات ليصلوا الي باقي الموضوع . و شكرا جزيلا
و شكرا لكل واحد رد علي الوضوع او اهتم بيه

لاحول ولا قوة الا بالله مفيش حاجة سالكة فى البلد الناس بقت اخلاقهم فى الحضيض

الله يكون فى عونك فعلا انت صبور جدا انا لو مكانك كان زمانى فى البورش

موضوع جامد جدا

وكل اللى حصل ده وانت لوحدك مافيش حد معاك يساعدك

عموما ربنا كان معاك

وشكرا على تعبك لافادة باقى الاعضاء

فعلا لو هتدفع مبلغ ذى ده ابعد عن الأسواق دى