الموضوع: جواز عتريس من غير النيش باطل

عادات إجتماعية، عندما تحاول ان تحطمها تجد رد جاهز ثابت دائم،( وجدنا آباءنا لها عابدين)

المشاركة الأصلية كتبت بواسطة د.أبونضال

إنها البلد والثقافة التي أنتجت موكب عرس "قطر الندى" بنت "خمارويه" الذي كان أوله في بغداد وآخره في القاهرة وأفلست مصر بسببه

ههههههههه

العقلية دي مش هتموت ابدا، بل بالعكس تزداد تغولا واستفحالا وشذوذا، موكب قطر الندى كان موكب عرس، اما الآن فنفس المواكب تسيير ايضا من والى، لكن ليست للأعراس، بل لأشياء اخرى...، و نتيجتها واحدة، إفلاس الأوطان، عموما تم تغيير مسمى قطر الندى لقطر القار(تماشيا مع المسميات الحديثة والمتوافقة بشكل اكثر ديناميكية مع المزاج العام للثقافة الشعبية والنخبوية).

تذكرت هذا بعد ان عملت اعلان عن بيع السفرة

http://www.nilemotors.net/nile/168585-a.html (السفرة اللي عمري ما قعدت عليها للبيع (صور))

ويبقى انا اول واحد في مصر قرر يبيع سفرته

أنا سبقتك وبعت الصالون بعد 4 سنين جواز
عمرى ما قعدت عليه
والضيوف اللى بييجوا أغلبهم من العيلة بيقعدوا فى الأنتريه
يا سلام على البراح اللى بقينا فيه بعد ما الصالون غار
برضه الوسع حلو.

يا بخت اللى خده ، أخد صالون زيرو بكل معنى الكلمة بنص تمنه.

عندنا فى الصعيد أهم حاجة الدهب
وكل عروسها حسب العيلة والنسب والتعليم
ومهما الدهب سعره يزيد
مش مهم عندهم
المهم هتجيب كام جرام ...................!!؟

المشاركة الأصلية كتبت بواسطة شريف

من فتره كان في مشروع كده و الاهل كانو من المنيا
المهم كانو عايزين الشبكه ب 50 الف جنيه

لو مكانك اقلهم انا ادفعهم مقدم bmw وعنى ما اتجوزت

موضوعك جميل يا دكتور أحمد
و مبروك على السفرة اللى بعتها و على فكرة ناس كتير من زمايلى فعلا مابيستخدموش السفرة الا ما ندر
وكذلك الصالون
و فعلا موضوع التجهيز للجواز بقى غبى جدا ........بس الناس غريبة و أفكارهم حجرية و كله نظام الأمعة و زى ما فلان بيعمل أعمل هو يعنى أحسن منى ...نضيع عمرنا عشان شوية كراكيب و شوية الكراكيب دول عليه قايمة والقايمة بعشرات الألأف و المؤخر و الشبكة

و بعدين لو اختلفنا والنصيب خلص تبدأ المعارك على كل ماسلف و بدل ما الواحد أو الواحدة يطوى الصفحة ويبدأ صفحة جديدة مع حد جديد لأ يضيع باقى عمره على الخناق و المشاكل على القايمة والنايمة و هلم جرا

فى الدول العربية ما فيش غير المهر ،، بس أجارك الله ممكن يكون كيلو دهب كدة ولاحاجة (مش عارفة حزام دهب و صدرية دهب و ابصر جنزير دهب تلبسه فى رقبتها) أما البيت وتأسيسة فالراجل بيأخذ العروسة بالفستان اللى عليها فى بيته و مش بيكون فى شروط عفش ولا قايمة زى عندنا وأعتقد هما أقرب للشريعة الاسلامية منا ،،لولا غلو المهور كانوا يبقوا 100 100

أحنا لما جينا جوزنا أختى كان على نظام النص بالنص و العريس ,أهله هما اللى بيغالوا وقلنا ماشى ...
و لما جينا جوزنا أخويا بردوا نفس النظام النص بالنص و العروسة وأهلها هما اللى كانوا بيغالوا وخلوه يستلف و يتداين لدرجة أن رفايع النيش قاربت ال 15 الف و قلنا معلش المهم يتجوز ويستقر ...و قايمة قاربت ال 80 ألف ......

فعلا حاجة تخنق و عليه الواحد مش لاقى لكل هذه الأمور قيمة فعليه دى كلها تبذير و طاقات مهدرة و محتاجة شجاعة لتغيير هذه الأوضاع و لو كام واحد بدأ و ما همهوش كلام الناس بعد كده الناس كلها حتقلدهم زى عادتهم فى التقليد الأعمى

بس المهم يكون الطرفان متفقين على كدا و يواجهوا أهلهم لأن دى حياتهم هما و بس
و المبالغ المهدرة دى ممكن تجيب شقة صغيرة يكبروها مع الوقت ويوفروا الايجار و يعيشوا كويس

ممكن يبدأوا باوضة نوم وانترية و غسالة وثلاجة وبوتاجاز لا أكثر ولا أقل وأنا عن نفسى أقبل بكده بس يكون راجل بجد ... رادل يا أماى ...أسد .. ليث..غضنفر ...هههههههههه من بتوع زماااااااان و لما بقول الكلام دا بسمع تريقة للصبح و البطران يلاقى قطران وما الى ذلك ..........

بصراحة الواحدة أهم شئ فى شريك حياتها إنه يكون إنسان محترم خلوق مسئول تحس بالأمان والاطمئنان بجانبه إنسان يقدر يحميها و يحافظ عليها و يجنبها أى إهانه و فعلا لو كلوها بدقة فى بداية حياتهم و يكبروا واحدة واحدة وهى بردوا تطيعه فيما يرضى الله ، لكن يا فرحتى بكل الكراكيب و هو منكد عليها صبح وليل أو سئ الطباع والخلق .