بجد أنا مش فاهمة ليه كل واحد مصر انه وجهة نظره هي الصواب المطلق؟؟ كل الاراء اللي بنتكلم فيها دي مش غلط, هي وجهات نظر مختلفة مش بنتكلم في مسلمات.
في أمور الجواز دي كل واحد من حقه يكون ليه طلبات أو شروط لو عايزين تسموها كدة, سواء العريس أو العروسة. المشكلة ان الرجالة بقوا عندهم نوع من الحساسية ناحية أي طلب ليه علاقة بالماديات و بيعمموا أوي في الكلام عن المغالاه في الطلبات. يعني المثال بتاع الشقة الايجار ده فعلا ناس كتير شايفاه مخاطرة و عدم استقرار و ده حقهم. الحل بقى ان يا اما تدور على واحدة هي و أهلها يرضوا بالحل ده, يا أما تحاول تجتهد انك توفر مقدم لشقة في مكان بعيد و القسط مش حيفرق كتير عن الايجار.
بالنسبة بقى لموضوع الحديث الشريف و ان لو واحد يعرف ربنا لازم نجوزه بنتنا , أنا شايفة ان الكلام ده مش دقيق و - أسفة في التعبير - محاولة لفرض وجهة النظر بأسم الدين.
أنا عايزة اللي بيقول انه الاختيار المفروض يكون على أساس الدين بس يقول لنا لو بنته جالها عريس في منتهى التدين و الأخلاق, بس مش متعلم أو تعليمه متوسط حيوافق يجوزهاله؟؟ طيب لو متعلم بس أبوه بواب او سايس مثلا - مع كامل الاحترام لأصحاب المهن دي - برضه حتوافق؟؟ بلاش خالص الأب, العريس نفسه لو حد جابله عروسه قمة في الدين و الأخلاق هي و أهلها, و لما شافها لقاها وزنها 100 كيلو مثلا و هو بيحب الرفيعين, لازم يرضى يتجوزها عشان الرسول عليه الصلاة و السلام قال اظفر بذات الدين؟؟ أكيد لأ. و أكيد برضه هي ممكن تلاقي ابن الحلال اللي بيحب التخان أصلا و يتجوزها و يبقى شايفها احسن و احدة في الدنيا. نفس الكلام بالنسبة للراجل, هو ظروفه مش مناسبة للبنت دي و أهلها, أكيد في ناس تانية تبقى موافقة على الظروف دي و مرحبة بيه.
تاني بقول أنا مش معنى كلامي ان كلام ابو العروسة صح في المطلق و مينفعش واحد يتجوز في شقة أيجار جديد بالعكس أنا نفسي اتجوزت في شقة أيجار جديد زي ما قلت قبل كدة, و ربنا وحده اللي يعلم ظروف جوازي كلها كانت عاملة ازاي, و أنا كنت و الحمد لله أقل واحدة في كل قرايبي و أصحابي من ناحية الماديات في جوازي. و برضه الحمد لله ربنا سبحانه و تعالى عوضني خير في حياتي مع جوزي سواء ماديا أو معنويا. بس مش معنى كدة ان اللي أنا رضيت بيه لازم اي حد تاني يرضى بيه و الا يكون غلطان. الجواز ايجاب و قبول من الطرفين في كل حاجة, سواء في الماديات أو الشكل أو الطباع ........الخ. في الأخر كل جوازة ليها ظروفها و من حق كل طرف انه يختار اللي يناسبه.