[QUOTE=Opelvectra;3872910069]السلام عليكم يا شباب انا عارف اني كنت وعدت احمد و وعدتكو كلكو اني اعمل تقرير للعربية بس انا قولت استني شوية لحد ما امشي شوية بالعربية ياعني انا عامل دلوقتي تقريبا 4200 كيلو المهم نبدا كددة
اولا: الصاج
الصاج ضعيف شوية زي اغلب العربيات الجديدة ياعني بس مش عارف حاسس اني بخاف اسند علي العربية او اقعد علي الشنطة لحسن اطبقها مش عارف لية .
من وجهة نظرى دى طبيعة كل العربيات الجديدة ... والسبب التكنولوجيا الحديثة + معايير السلامة والامان الدولية
ثانيا : الصالون
الصالون جميل و واسع جدا و مريح في القعدة و الرؤية من جوا العربية جميلة و شايف المحيط اللي حواليك كولو و المرايات الجانبية ممتازة في الرؤية .
تمام متفق معاك ما شاء الله صالون وهمى لهذه الفئة من العربيات ...
ثالثا : العفشة
العفشة جميلة بس بحس انها ناشفة شوية و بتخبط في المطبات و بحس بكل حاجة في الدريكسيون الخبطات و النقر و كل حاجة و الغريب دلوقتي ان الدريكسيون معووج سنة بسيطة مش عارف دا عيب الاسفلت اللي في مصر ولا العيب في الهواء في الكاوتش مش عارف
العفشة نعمت قوى بعد ال 3000 ماشاء الله عفشة تجمع بين النعومة والقوة
انا ظابط هواء الكاوتش نيتروجين قدام 33 وخلفى 30 زى ما مكتوب على باب السائق
رابعا :الموتور
الماتور ما شاء الله جميل ربنا يحفظوا بجد ممتع في المشي و سريع في الاستجابة بس مش عارف بحس ان الاستهلاك غريب ياعني الصفيحة بتعمل ساعات 190 او 200 حاجة كدة مش عارف
الموتور ... ماشاء الله استجابة وقوة وسحب ... ولا اروع
الاستهلاك بيختلف حسب طبيعة القيادة والسرعات اللى بتمشى عليها ... ولو متوسط السرعة عندك 80 90 وما فيش وقوف كتير يوصل الاستهلاك الى 250 او 260 كيلو فى الصفيحة ... وعلشان تظبطه صح اكيد انت عارف الطريقة ... تفول وتمشى وتفول تانى وتقسم المسافة المقطوعة على مقدار الزيادة المضافة يطلع مقدار الاستهلاك لكل لتر تضربه فى 20 لتر يديلك الاستهلاك
خامسا : التكييف
بردوا ما شاء الله التكييف بتاع العربية جميل جدا اغلب الوقت بمشي علي السرعة الاولي مش بطلع للتانية خالص حتي في عز ايام الحر و الحمد لله .
التكييف كان على واحد وكنت راجع من العين السخنة ومشغله ومتلج مش عارف اعمل ايه عمال اقفل الهوايات اللى قدامى جايب من فتحة التابلوه وضارب فى وشى اقفل اللى فى التابلوه ضارب من اللى جانبى ... تلاجه فعلا
نيجي بقا للملاحظات علي العربية العربية العلو بتاعها عن الارض كبير شوية انا لسة راجع من الساحل اخر سرعة جبتها بالعربية 195 بالعافية والله و مش عاوز اقولكو بقا انا كنت متشعلق في الدريكسيون و مركز بطريقة رهيبة تعبتني نفسيا هههه بس الحمد لله عدت علي خير العربية عاوزة تنزل شوية علي الارض و الجنوط تكبر شوية
دى المعادلة الصعبة اللى فى العربية ... عاوزها عالية عن الارض ماتحكش فى مطباتنا الحلوة وتديك ثبات لحد 140 ولا تنزل للارض شوية وتحك بس تديلك ثبات اعلى لحد 200 زى السيفيك كده مثلا ...
فى النهاية هى عربية ماشاء الله عليها انا شايفها معادلة لسعرها جدا مقارنة بعربيات تانية
المفضلات