الموضوع: تتجوز اجنبيه ولا تغسل صحون (وتستمر المأساه للهروب)

المشاركة الأصلية كتبت بواسطة AshTurbo

طبعاً مقتنع بيه وإلا هقوله ليه أصلاً ؟ انا لو عاوز أسافر بأذن الله أسافر بكرة مش مشكلة عندي وأكتر من مرة جاتلي فرصة عمل برة وفرص ممتازة أي حد يتمناها ولكن أنا قاعد هنا في بلدي ومش هسيبها هأفضل أناكف فيها وتناكف فيا يوم حلو ويوم وحش بس مش هسيبها وتوقيعي تعبير عن الواقع اللي كلنا عايشينه ليه عكس كلامي هو أنا قولت أن أحنا عايشين عيشة فل وكلنا بننام على ريش نعام وفي بقنا معالق دهب ؟

طيب واضح انك مفهمتش قصد كلامى

ربنا يقويك على الى حتشوفه يظهر انك لسه مشفتش حاجه

على فكره انا قاعد معاك فيها وربنا يقوينا على الى حنشوفه (بس قاعد غصب عنى ههههههه)

برضه روسيا كسبانه فى الاستطلاع حتى الان

الظاهر إن كلامى مش عاجب ناس كتير ،..........
بس الحمد لله صاحب الموضوع قال أنا مع الراجل دا مع إنى مش راجل أساسا هههههههههه
شوفوا يا أخواتى الأعزاء و يمكن منكم ناس كتير أصغر منى و لسة فى بداية حياتهم

أمبارح كان برنامج حديث المدينة مصور حلقة فى إيطاليا و من ضمن الحلقة أتكلم عن مشاكل المهاجرين المصرين لإيطاليا شرعيين أو غير شرعيين و أتكلم كمان عن حاجة أول مرة أسمع عنها إلى جانب السفارة فى ايطاليا هناك سيدة ترعى شئون الايطاليات فى الغردقة (معقل السياحة هى وشرم الشيخ ) الأتى تزوجن من مصريين ثم بعد إن استقر المصرى و خد الجنسية واشتغل وعمل قرشين و خلفله جنبهم عيلين .....هوبا ايه ....أاااااااااااه أفتكر حاجة صغيرة كدا ............ قال ايه مش عايز بناته يتربوا هناك و مش عاجبة طريقة و أسلوب تربية أمهم ليهم و أسلوب الحياة هناك فخد بناته أو ولاده و رجع مصر وطلق الايطالية الحسناء أصل المصلحة خلصت خلاص و حرمها إنها تشوفهم و حرمهم من أمهم لانها من وجهة نظره مش كفء لتربيتهم حط نفسك مكان أمهم تحب حد يحرمك من ولادك أو حط نفسك مكان ولادك تحب حد يحرمك من أمك و كان لسه فى موضوع لاخ زميل لينا عن أقرب الناس لقلبك والأغلب أختار الأباء و خاصة الام.

طيب ليه خلط الأوراق الجواز حاجة و ليها قدسيتها و شروطها و الشغل حاجة تانية وليه قدسيته فالعمل عبادة
مبدأ المصلحة و الاستغلال فى الجواز مبدأ مقيت

عايز تتجوز أجنبية مش مشكلة بس يكون أنت مقتنع بيها وتنطبق عليها شروط الزوجة الصالحة لتربية أبناءك و صون شرفك و نيتك تكون فى دوام الزواج مش فى مصلحتك أنت الذاتية فقط و لفترة دون النظر لمصلحتها أو مصلحة الأبناء إن وجدوا و الحديث الشريف بيقول (كفى المرء إثماً أن يضيع من يعول) و( الظلم ظلمات يوم القيامة) وكمان ( تَخَيَّرُوا لِنُطَفِكُمْ وَانْكِحُوا الْأَكْفَاءَ وَأَنْكِحُوا إِلَيْهِمْ).

مع تمنياتى لكم جميعا بالتوفيق و الخير الوفير

المشاركة الأصلية كتبت بواسطة mahmoudysf

انا طبعا مش مع الجواز بالطريقة دي
بس يا ريت تقوليلي فين شغل التراب ولا الزبالة اللي بيكسب هنا زي هناك
وفين الاحترام للي بيشتغل هنا في الصحون
وهل احنا هنبطل نبص بصة دونية للي بيشتغل هنا فى الصحون
الاول نجاوب على الاسئلة دى وبعدين نقول للناس اشتغلو في الصحون هنا ومتشتغلوش في اوربا عشان عيب

أقول لحضرتك

أولا : بالنسبة لوجود الشغل المربح شوف يا سيدى

• تركيب متر السراميك بـ 15 جنية فيما فوق حاليا دا غير شغل النقاشة المربح أيضا
• متوسط يومية عامل البناء فى مصر 40 - 50 جنية وشباب مصرى كتير من اللى بيسافر ايطاليا بيشتغل فى أعمال البناء هناك
• شباب زى الورد بيجى جنب برج سكنى أو كل كام عمارة ويلمع العربيات و يغسلها مرتين فى الشهر وبيأخد من كل شقة 30 جنية فالشهر شوف لو 20 - 30 عربية يحصل كام
• و غيرها من الحرف اللى مش محتاجة رأس مال بل مجرد تعلم الحرفة أو الصنعة

ثانيا : بالنسبة للنظره الدونية للى بيشتغل فى أى صنعة أقول لحضرتك

• أنا شايفة إن الموضوع دا كان زمان لأن دلوقتى الناس ممكن تحترم أى حرامى صاحب منصب و هما عارفينه حرامى بس المصلحة و هما و هو مش مكسوفين
• يبقى اللى بيشتغل حاجة حلال يتكسف بالعكس المفروض يشعر بالفخر لأنه مع كل الصعاب ماخسرش نفسه و لا دينه و يوم بعد يوم الحال بيتحسن و المقاولين كتير منهم كانوا فى الأول عمال و ربنا فتح عليهم أو تحوش كأنك فى الخارج و تعمل مشروع أكبر فيما بعد و المهم الأصرار و العزيمة
• الناس دلوقتى ملهيه وراء لقمة العيش و محاشد بقى مركز مع حد و بالعكس بيحسدوا أصحاب الحرف المربحة و خاصة الموظفين التعساء و لو عندهم الشجاعة يعملوا زيهم كانوا عملوا
• فاكر حكاية جحا مع كلام الناس هو و أبنه و الحمار يا سيدى دعك من الناس فلن يعجبهم العجب
• الشباب هو المغامرة و التحدى و الطموح فى حدود المشروع والحلال و ربنا موجود و كبير ومن توكل على الله كفاه

ملحوظة : أنا ما قولتش ما تشتغلوش فى أوربا عشان عيب ، الهروب و عدم مواجهة الموقف هو اللى عيب
و على فكرة أنا أعرف ناس كتير مؤهلات مختلفة أشتغلت حرف فى أول حياتها و ناس تانية رفضت و الفرق بين الحالتين بعد فترة أصبح رهيب و الناس اللى تعالت أو خافت من كلام الناس بتحسد الناس الأولنيين الان

مع تمنياتى للجميع بالتوفيق و الخير الوفير

المشاركة الأصلية كتبت بواسطة tifana2010

أقول لحضرتك


أولا : بالنسبة لوجود الشغل المربح شوف يا سيدى

• تركيب متر السراميك بـ 15 جنية فيما فوق حاليا دا غير شغل النقاشة المربح أيضا
• متوسط يومية عامل البناء فى مصر 40 - 50 جنية وشباب مصرى كتير من اللى بيسافر ايطاليا بيشتغل فى أعمال البناء هناك
• حضرتك انا عارف المهن دي كويس لاني بحتك كتير بالناس دي
• بس معلومة صغيرة عشان الواحد يتعلم مهنة زي تركيب السيراميك او النقاشة او ....
• لازم يبدا من سن 12 سنة وباخد وقت طويل جدا عشان يتعلم ومحدش النهاردة بيعلم واحد رايحلة مخلص جامعة وعندة 22 سنة ولا هيعلمة بسهولة وكل واحد معاه من الصبيان ما يكفية وزيادة دي نقطة
• النقطة التانية مش معقول نقول للكام الف اللي بيتخرجوا من الكليات كل سنة وبياملو يخدمو البلد كل واحد في تخصصة روحو اقعدو مع سباك ولا نقاش خمس سنين تاني عشان تتعلم صنعة وللعلم اللي بيروح عشان يتعلم المهنة بياخد مصروف بس مش مرتب يعنى
• وبعدين انا اعرف فيه شباب فعلا كتير بيشتغل وهو بيدرس وبعد ما بيخلص جامعة عامل بناء وب 50 و60 جنية فعلا في اليوم لاكن هل انتى شايفة ان ده كافي ان شاب يكون نفسة ويشترى او ياجر شقة ولو ده حصل فعلا
• هيفضل لغاية امتى يشتغل فى الفاعل علما بان دى بتعتمد على الصحة يعنى بعد سن معين هيلاقي نفسة لا قادر يشتغل ولا عمل حاجة وقاعد فى الشارع وشفت من دول كتير فعلا يعنى لو مرض او حدثتله اصابة ربنا وحده اللي بيتولاهم
• الكلام النظري بدون حلول فعلية سهل جدا
• شباب زى الورد بيجى جنب برج سكنى أو كل كام عمارة ويلمع العربيات و يغسلها مرتين فى الشهر وبيأخد من كل شقة 30 جنية فالشهر شوف لو 20 - 30 عربية يحصل كام
• طيب كويس انك قولتى فيه شباب بيعمل كدة بس هل ده هو بقى كل ما يتمناة الشباب ان كل واحد يشوفلة كام عربية يغسهم الموضوع صعب شوية واللي يبتدى زهرة حياتة بيغسل عربيات تفتكري هيكون اية مسقبله
• و غيرها من الحرف اللى مش محتاجة رأس مال بل مجرد تعلم الحرفة أو الصنعة
• دي اتكلمت عليها فوق وبعدين مش كل الدنيا هتبقى صنايعية كل خلق لما ميسر له

ثانيا : بالنسبة للنظره الدونية للى بيشتغل فى أى صنعة أقول لحضرتك

• أنا شايفة إن الموضوع دا كان زمان لأن دلوقتى الناس ممكن تحترم أى حرامى صاحب منصب و هما عارفينه حرامى بس المصلحة و هما و هو مش مكسوفين
• ما هي دي الغريبة دلوقتى الناس تحترم صاحب المنصب والمال حتى ولو حرامي لاكن لاتحترم الشاب المكافح
• يبقى اللى بيشتغل حاجة حلال يتكسف بالعكس المفروض يشعر بالفخر لأنه مع كل الصعاب ماخسرش نفسه و لا دينه و يوم بعد يوم الحال بيتحسن و المقاولين كتير منهم كانوا فى الأول عمال و ربنا فتح عليهم أو تحوش كأنك فى الخارج و تعمل مشروع أكبر فيما بعد و المهم الأصرار و العزيمة
• بيتهيالي اللي يشتغل هنا في الاعمال دي يادوب يسد رمق اسرتة دا لو عرف يعمل اسرة لاكن يحوش دى صعبة شوية
• الناس دلوقتى ملهيه وراء لقمة العيش و محاشد بقى مركز مع حد و بالعكس بيحسدوا أصحاب الحرف المربحة و خاصة الموظفين التعساء و لو عندهم الشجاعة يعملوا زيهم كانوا عملوا
• فاكر حكاية جحا مع كلام الناس هو و أبنه و الحمار يا سيدى دعك من الناس فلن يعجبهم العجب
• الشباب هو المغامرة و التحدى و الطموح فى حدود المشروع والحلال و ربنا موجود و كبير ومن توكل على الله كفاه
• ونعم بالله
• وعشان كدة بنقول طالما ضاق الرزق في مكان الدين برضة بيطالبنا بالبحث عن الرزق في اي مكان طالما بالحلال

ملحوظة : أنا ما قولتش ما تشتغلوش فى أوربا عشان عيب ، الهروب و عدم مواجهة الموقف هو اللى عيب
هو الواحد لما يسافر عشان يشتغل وياخد اجر ادمي ويطور من نفسة ويسعى للرزق بقى هروب
بيتهايالي كلمة هروب دي انشاء بعيدة عن الواقع


و على فكرة أنا أعرف ناس كتير مؤهلات مختلفة أشتغلت حرف فى أول حياتها و ناس تانية رفضت و الفرق بين الحالتين بعد فترة أصبح رهيب و الناس اللى تعالت أو خافت من كلام الناس بتحسد الناس الأولنيين الان
معلش عشان نبقى بنتكلم كلام عملي مش انشا لو اتقدم لحضرتك واحد معاه دكتوراة لاكن بسبب الفساد مشتغلش بيها لاكن شغال سباك هتوافقى؟؟؟؟؟؟؟؟؟؟؟؟
مع تمنياتى للجميع بالتوفيق و الخير الوفير

بالمناسبة الشباب اللي بيطلع اوربا ويشتغل فى المعمار او حتى بيغس عربيات الفرق ان هناك بتاخد اجر يكفيك انك تعيش عيشة كريمة وبعد فترة بتقدر تطور من نفسك ولو درست او اتعلمت حاجة اثناء شغلك بتاخد حقك وبتاخد مكانتك على حسب مهاراتك
لاكن هنا طالما فيه محسوبية وواسطة مفيش امل حتى لو بقيت اعلم اهل الارض ده واقع
على فكرة انا عديت مرحلة العشرينات بكل معاناتها
عشان كدة بقول لاي شاب لوجاتلك فرصة انك تشتغل برة متترددش قبل فوات الاوان

المشاركة الأصلية كتبت بواسطة mahmoudysf

بالمناسبة الشباب اللي بيطلع اوربا ويشتغل فى المعمار او حتى بيغس عربيات الفرق ان هناك بتاخد اجر يكفيك انك تعيش عيشة كريمة وبعد فترة بتقدر تطور من نفسك ولو درست او اتعلمت حاجة اثناء شغلك بتاخد حقك وبتاخد مكانتك على حسب مهاراتك
لاكن هنا طالما فيه محسوبية وواسطة مفيش امل حتى لو بقيت اعلم اهل الارض ده واقع
على فكرة انا عديت مرحلة العشرينات بكل معاناتها
عشان كدة بقول لاي شاب لوجاتلك فرصة انك تشتغل برة متترددش قبل فوات الاوان

انا برضه مع الكلام ده رغم احترامى لرأى الاخت Tifana2010 وبعتزر لو قولت (انا مع كلام الراجل ) مكنتش اعرف انك مش راجل
بس فعلا الى عاوز يتعلم مهنه مينفعش بعد متعب سنيييين فى التعليم يروح يتعلم سباكه ولا نقاشه هى الفكره انه لازم يكون بيشتغل فيها من وهو فى الدراسه فتره طويله عشان يكون اتقنها كويس وبعد الدراسه يشوف هو ناوى يكمل فى ايه ولو مشى فى طريق من الاتنين صعب يرجع فى واحد منهم لازم يكمل فيه

واللى بيمسح عربيات بره طبعا ليه مستقبل افضل هناك لان مش حيفضل طول عمره بيمسح عربيات حيعرف يحوش من فلوس هناك لاكن هنا لو اخد 50 جنيه فى اليوم يعنى 1500 فى الشهر نفترض انه مش بيصرف حاجه منهم غير 500 اكل وشرب ومواصلات (ده طبعا صعب بس نفترض) حيحوش 12000 جنيه فى السنه عاوز كام سنه على كده عشان يشترى شقه ويوضبها ويجهز نفسه ويتجوز
ده لو افترضنا انه عرف ياخد 50 جنيه فى اليوم وعرف يحوش ال 12 الف بدون ميصرف مليم
ولو افترضنا برضه انا الحياه زى مهى مش بتغلى وتولع نار كل يوم عن التانى
ده كده عشان يشترى شقه ويتجوز امال فين المستقبل الى عمله !!!
ولو عمل كلللللللللل ده وراح يتقدم لواحده مؤهل جامعى زيه بالظبط هل اهلها حيوافقو عليه ؟؟؟ مش كتير حيوافقو بيه

لكن لو بيمسح عربيات بره وجه هنا يخطب واحده ايه حيكون وضع اهلها طبعا اكيد عارفين ده حيشيلوه من على الارض شيل ده راجل عايش بره (ده التفكير المصرى السائد حاليا)

المشاركة الأصلية كتبت بواسطة pro_samir

هي الروسيه هتخلف ازاي أصلا وعندها 50 سنه :)) دة لو كان جواز فعلي يعني

وبعدين المفروض اللي بيعمل حاجة زي كده بيكون الموضوع علي نور من الأول وبالأتفاق زي ما حد كان بيقول الموضوع كله بيكون مصالح متبادله بغض النظر عن كون ده حاجة كويسه أو وحشه

بشكل عام كل اللي اعرفهم اتجوزو اجنبيات ومخلفين منهم هم أصلا مستقرين برا ومش ناويين علي رجوع منهم اللي في انجلترا واللي في امريكا واستراليا وحتي اللي ناوي يرجع فا برضو متفق مع مراتة علي كده وهتيجي معاه

+1