السلام عليكم، أولا ياجماعة أحب أبارك للمنتدى على المقابلة الجميلة اللى تمت واللى مع الأسف مارحتاش بس تقرير أبو ليلى عنها وافى والصور تفرح وتخلى الناس اللى مارحتش وأنا منهم تتحسر ... ان شاء الله ملحوقة

ثانيا وللمرة الأولى من 4 شهور من ساعة ماجبت العربية سقتها على طريق سفر وبسرعة عالية نسبيا وحبيت أقدم لحضراتكم ملاحظاتى عن التجربة دى مع شوية استفسارات .... طمع يعنى

لمدة ساعتين كانت سرعتى أعلى من 130 ومعظم الوقت كانت من 150-170 وشوية كده 180 بس المدام كانت قاعدة جنبى وأول ما لاحظت ال 180 دى ... ماقولكوش اللى حصل بس المهم انى ماحولتش بعديها حقنا للدماء مع ملاحظة ان الدواسة وقتها كانت بعد النص بحاجة بسيطة جدا ولسه المسافة لتحت طويلة.

1- بالنسبة للسرعة جميلة واستجابة العربية شايفة معقولة جدا (مع ملاحظة انى مشغل التكييف طول الوقت وده ليه قصة تانية) وثباتها كويس، ال 180 دى لما أنا جبتها أنا ماكنتش قاصد أساسا والموضوع كان وأنا بفادى كام عربية كده يمين وشمال بغرز على خفيف وماحستش إلا لما بصيت على العداد، يعنى ولله الحمد العربية خدمتنى كويس.

بالنسبة لصوت الموتور وده بيت القصيد .... لقيت انه بيعلى بعد ال 130 وعند ال 140 كانت أعلى نقطة فى صوت الموتور وبالبلدى كده حسيت "بنعرة" فى الصوت واضحة عند ال 140 لغاية ال 145 وبعديها "النعرة" دى بتروح تماما وصوت الموتور بيهدى ولكن بيفضل محسوس بيه وللحق يقال جربت قفلت التكييف الصوت هدى أكتر، والغريبة انى حتى وأنا بهدى أول مابيعدى المؤشر على ال 140 بحس برضه بصوت النعرة دى!ّ!!
واستفسارى هنا هل الصوت اللى عند ال 140 طبيعى وطبيعى انه يروح بعديها

2- التكييف وده كان الحاجة المحبطة، أولا أنا قبل كده كان العادى بتاعى بخليه على 22 مع تدوير هواء داخلى بلاقيه أفضل بكتير من التدوير الخارجى، أما مع السرعة العالية فلقيت انه فجأة بعد حوالى الساعة من السواقة لقيت التكييف ضاع حطيت إيدى على الأربع فتحات لقيت أفضل واحدة فيهم هى اللى جنب الشباك الشمال تليها الوسطى شمال ثم الوسطى يمين أما الفتحة اللى جنب الشباك اليمين فكانت المفاجأة ... مطلعة هوا سخن؟؟؟؟؟؟!!!
جربت أطفى التكييف وخليته أوتو مع تنزيل الحرارة لـ 20.5 والأوتو ظبطه أتوماتيكيا على التدوير الخارجى، الوضع اتحسن كتير بس الفتحة اليمين مستمرة فى الهواء اللى بقى دافى مش سخن .... قفلتها، واعتمدت على ال 3 فتحات التايين، طبعا الوضع اتحسن كتير جدا والتكييف بقى كويس بس فضل التفاوت بين الفتحات فى سقوعية الهوا، والغريبة انى لما حاولت أحولى لوضعية التدوير الداخلى لقيتها أوحش.
المهم بعد ما بقيت جوه القاهرة ومع نزول معدل السرعة لأقل من 110 بدأت الفتحة اليمين تفوق شوية
وده استفسارى التانى هل ده طبيعى .... هل أنا بعمل حاجة غلط

الخلاصة
تسارع جيد جدا للعربية مع وجود التكييف، ثبات فى المناورات لغاية 180 (اللى جربته) ولو انها مناورات على الواسع مش مفاجأة قوى يعنى
التكييف وآه من التكييف ... أنا عارف ان تكييف السيراتو ما يخدتش درجة ممتاز، بس أنا شخصيا كنت بديله درجة جيد جدا لكن بعد اللى حصل مش عارف أقول إيه

تحياتى