مشكلة فى الفتيس العادى وعمالة تزيد

**samirayad** · 11-08-2010 10:54 PM

علشان نعرف كويس أيه هى الغويشه

لازم نتذكر الغويشه التى تضعها العروس فى يديها

فالغويشه هى حلقه مفرغه توضع حول الأيدى

وهنا الغويشه فى الفتيس ( صندوق التروس )

شبه غويشة العروس تماما فيما عدا أنها مسننه من الداخل كما سنعرف فائدة التسنين

وعلى الرسم الهندسى التالى لصندوق تروس كل أجزاءه مفصصه بالقطعه ( مئات القطع الهندسيه وكل قطعه وليها عمل ودور محدد )

أنا علمت بالأزرق على تروس خروج السرعه الأولى والتانيه بمكوناتها

14 - ترس ناتج تعشيق السرعه الثانيه

24- ترس ناتج سرعة تعشيق الأول ( يلاحظ أنه أكبر من ترس خرج النقله التانيه ...علشان كده سرعة الأول أبطأ من التانى )

21 - ترس توافق أو تزامن أوتعشيق التروس القائده للأول والتانى مع التروس المنقاده

18 - صرة مسننه تعمل على ترس التزامن للأول والتانى ( اللى هى غويشة الأول والتانى )

15- حلقة تجميع أو غلق الأول والتانى وقت النقل للأول أو التانى

17 - عمود تحريك شوكة الأول والتانى

16- شوكة الأول والتانى

كما بالشكل

الشوكه 16 هى اللى بتحرق الغويشه 18 علشان تخللى ترس التزامن 21 يخللى النقله تبقى على الأول أو التانى حسب تحديد قائد السياره

لما بتنعم أو تبوظ أسنان الغويشه الداخليه

لا يستطيع ترس التزامن تشغيل مجموعة الأول أو مجموعة التانى بكفاءه

ومن هنا بتحدث الأعراض المذكوره بالموضوع

**M.Zaher** · 12-08-2010 12:47 AM

طبعا شرح جامد جدا منك يا بشمهندس سمير
جزاكم الله خيرا
سؤال رفيع
تغيير الغوايش صعب و مكلف ؟؟؟
وهل بعد التغيير الفتيس بيرجع زي الاول ولا لاء ؟؟؟
ولا الافضل تغير الفتيس كله؟؟

**samirayad** · 12-08-2010 12:53 AM

سهل ياباشا

بس أهم شىء الصنايعى يبقى ده تخصصه

وغير مكلف
تقريبا 200 ج ( غويشه ومصنعيه مع صنايعى نظيف ) يرجعوا الفتيس زى الفل

**khaledserag** · 12-08-2010 01:07 AM

انا عندى مشكلة شبيهه لما ببقى ماشى على 10 او 15 كم الفتيس مش بيرضى يجيب اولانى بس الميكانيكى قاللى ده عادى هات الاولانى و انت واقف
بس لما باجى اجيب الاولانى و انا ماشى مش بسمع صوت هو بس مش بيرضى ييجى

**karimfahmy99** · 12-08-2010 04:04 AM

المشاركة الأصلية كتبت بواسطة khaledserag

انا عندى مشكلة شبيهه لما ببقى ماشى على 10 او 15 كم الفتيس مش بيرضى يجيب اولانى بس الميكانيكى قاللى ده عادى هات الاولانى و انت واقف
بس لما باجى اجيب الاولانى و انا ماشى مش بسمع صوت هو بس مش بيرضى ييجى

طبيعى لو العربية فى حركة غلط انك تنقل و تجيب الاول . اما تقف خالص و تطلع ع الاول اما تجيب التانى و تظبط رجللك و تكمل ع التانى . انما تجيب الاول و العربية ماشية غللللللللللللللللللط تبوظ غويشة الاول و التانى زى اللى يعشق مرشدير و العربية لسة ماشية للامام برضة من اخطر الحاجات اللى تتعمل و تجيب غويشة المرشدير

**dramyd** · 12-08-2010 10:09 AM

طبعا قبل اى كلام ... ارحب
بـ / م . سميــــــــر
وقولة نورت الموضوع بشرحك الجميل وربنا يخليك لينا عشان تعلمنا كمان وكمان ....

ايــــــــــــــة الشرح دة بجد ..... بجد مهندس
طيب يا باشمهندس .... المفروض على كلامك انو فى ناس شغالة فى الفتيس بس مش كدة ........ ولا انا فاهم غلط.؟
ويا ترى اكيد لو اتعملت مش هتبوظ لو الاستحدام كويس ومع معاملة العربية بحنية وبرفق ولا هتبوظ زى الاستاذ اللى شارك معانا وعمل الفتيس وباظ تانى بعد كدة غيرة......

**karimfahmy99** · 12-08-2010 10:30 AM

مع احترامى للباشا الكبير

اة فى ورش متخصصة بس لاصلاح الفتيس و كان فى واحد مشهور اوى فى شبرا

و اذا كان على موضوع الغويشة فدا عادى و امرها سهل دى من اقل التلفيات اللى ممكن تحصل و حلها مضمون . المهم تروح لمتخصص عشان يفك و يقفل صح و تعمل حسابك طبعا بعد ان شاء الله ما تعمل الشغل تروح تزود زيت الفتيس علاطول

**dramyd** · 12-08-2010 12:11 PM

الحمد لله...
تمنطونى ربنا يخليكو...
طيب ياربت لو فى حد هنا يعرف الراجل اللى فى شبرا دة يقولنا علية..
دة هيبقا مية مية عشان هيبقا قريب منى ولو انتو عرفينو انو كويس يبقا 100 100 عشان كدة هتاكد انى العربية هتبقا سليمة زى الاول....

وياريت لو حد يقولنا هتاخد مجهود كتير ولا لا هتاخد وقت ولو البشمهندس سمير يقولنا هو هيعمل اية الراجل بتاع الفتيس بالظبط يبقا ربنا يخلية عشان نبقا فهمين الراجل بيعمل اية ولو فى اى حاجة ممكن يغلط فيها الراجل نبقا فهمين ونقولو مش نبقا وقفين زى الطــــــــرابيش
وحنا معاه ............ مش كدة ولا اية ...

**hosar** · 12-08-2010 12:30 PM

كدة طبعا ........ انا معاك

**samirayad** · 12-08-2010 02:20 PM

ويا ترى اكيد لو اتعملت مش هتبوظ لو الاستحدام كويس ومع معاملة العربية بحنية وبرفق ولا هتبوظ زى الاستاذ اللى شارك معانا وعمل الفتيس وباظ تانى بعد كدة غيرة......

ياباشا متقلقش
موضوع تغيير الغويشه سهل جدا

بس عاوزه متخصص فتايس

أسأل أى تاكسجى عندك فى شبرا

وقوله أنا عاوز أغير غويشه للفتيس

وشوفه هيقولك أيه

_______________

بس أتأكد برضه الأول أن زيت الفتيس فى وضعه الطبيعى زى ماقيل قبل كده