كلاكيت للمرة الالف: قتيل على الدائرى

**dr.hazem** · 13-08-2010 02:34 PM

ياجماعه دي فعلا ثقافة شعب ودولة

على اول طريق مصر اسماعيليه الصحراوي بعد موقف العاشر
المكان ده بالليل ماهو الا سواد في جوفه سواد

وتفاجأ بواحد لابس جلابة رصاصي نفس لون الازفلت وبيعدي كأنه بيعدي في وسط البلد

انا عانيت من الموضوع ده والله
انا كنت بره مصر وعمري محصل معايا ان فجأه اكتشف ان في خيال قدامي لبني آدم...

وعلى فكره مش مجرد الناس اللي بتعدي

شوف امثلة تانيه
ميدان الحجاز وانا كنت مروح الساعه اتنين بالليل
وواحد جاي بموتوسيكل ديلفري فاكر نفسه عايش لوحده في الكون
انا بخرج من الميدان ولقيته قدامي فجأة بكل ما اوتي من سرعه

يعني كان بيني وبينه اقل من متر وربنا سترها اني شفته فآخر لحظه
ولا منور نور ولا عنده عاكل ولا باينله معالم
بقا انا لو خبطته يبقا عليا ذنب؟؟

مثال تالت عشان بأكد انه مش بس المشاة
التخلف كتير ولله الحمد

انا نازل من كوبري المطار باتجاه جوزيف تيتو
اول معديت ملف السندباد مسكت الحاره الشمال على اعتبار اني عايز الف وارجع
وكان الشارع بالليل والحكومه طايفة الانوار
عارفين لقيت قدامي ايه؟؟؟
عربية زباله ملهاش ولا لمبه ورا سليمه وولا عاكس والنمرة من كتر مهي وسخه مش عاكسه نور عربيتي ولونها لون الارض
الاخ راكن عشان يجيبو برميل من عالناحية التانيه بدل مايلف ويجيبه
بالذمه ده بيحصل فأنهي بلد

والامثلة كثيره ممكن اقعد اعدلك من النهارده لبكره
بس انا خلاص اكتشفت حاجه

الشعب كده مش هقدر اغيرهم كلهم
واذا كان رب البيت للطبل قارع فحالة أهل البيت الرقص والحدق يفهم...

والحل اني بقيت اتوقع كل البلاوي دي والله المستعان ويصبرنا على اللي احنا فيه ويسترها علينا يارب دايما

ربنا يسترها علينا جميعا..
آمين

**gebreel** · 13-08-2010 02:57 PM

و الله الكلام ده انا بقولو بقالي 100 سنة بس برجع و اقول الناس دي عاوزة تركب و تروح اشغالها و ممعاهمش عربيات يعملوا ايه؟

المفروض قبل ما كانو يدو رخصة مباني حوالين الدائر كان يتعمل كباري مشاه او انفاق بس اللي يغيظ ان كوبري المشاة الوحيد اللي على الدائري الناس مش بتطلعوا و بيعدو بردو من تحت دول بقى نقول عليهم اييييييه؟!

و اللي بيعدو اكنهم بيتمشوا و الله العظيم مرة وانا مروح و معدي من جنب مودرن واحد بيعدي الطريق بالورب و بيتمشى و عمال يبص على الناس اللي في العربيات انا بجد زهلت لما شفت كدة و باااااارد برود شديد

ربنا يتولانا و بلاش جري علشان نعرف نتحكم في عربياتنا و منكنش سبب في ازهاق روح

**M.ABDEEN** · 13-08-2010 03:04 PM

حتى يا محمد باشا بعد الردارات لما اتركبت في ناس مش هممها وفاتحة في السرعة بغباء ..........الدائري ده بقى صعب قوي على قد ما بيسهل في المشاويير

**Samir Elshahawy** · 13-08-2010 03:35 PM

زي ما القانون فيه فقرة بتقول " القانون لايحمي المغفلين" , برضه المفترض أن يكون هناك نص في القانون أن المشاة اللي بيعبروا الطريق الدائري لو ماتوا يبقي هما الغلطانين

المشكلة هي في ثقافة الميكروباصات اللي بترمي و تركب ناس علي طريق سريع زي ده
ربنا يأخدهم و يخلصنا بقي منهم و من بلاويهم بحق الشهر الفضيل قولوا أمين

كل عام و حضراتكم بخير
م/ سمير الشهاوي

**MMamdouh** · 13-08-2010 04:02 PM

المشاركة الأصلية كتبت بواسطة SE_coralsea

زي ما القانون فيه فقرة بتقول " القانون لايحمي المغفلين" , برضه المفترض أن يكون هناك نص في القانون أن المشاة اللي بيعبروا الطريق الدائري لو ماتوا يبقي هما الغلطانين

اعتقد اصلا ان لما واحد يعدى الطريق الدائرى او اى طريق سريع على رجلية بيندرج تلقائيا تحت بند المغفلين... و دة مجازا المقصود ببند "الاستغراق" فى الحوادث دى

بند الاستغراق المقصود بيه ان فى حالة الحوادث دى بيكون سائق العربية اخطاء بقتل المجنى علية... لكن المجنى عليه فى الاساس هو اللى اخطاء... و خطائة استغرق خطاء الجانى و تسبب فى وقوع الحادث

بالتالى بيعتبر سائق العربية برىء و النيابة بتفرج عنة و المجنى علية بيعتبر هو المخطى و بينتهى الموضوع على كدة... يبقى ازاى واحد عاقل يضيع روحة بالبساطة الشديدة دى عشان مكسل يطلع كوبرى او ينزل نفق او عايز يعمل فهلوى وسط عربيات ماشية 90 كيلو فى الساعة؟؟؟؟

المشكلة هي في ثقافة الميكروباصات اللي بترمي و تركب ناس علي طريق سريع زي ده

اصبت الهدف... و هو دة قصدى من الملاحظة بتاعت حادثة الجين 2... المنطقة تحولت الى موقف اوتوبيس على طريق سريع... نفس الكلام فى الحتة اللى قدام كارفور بس الناس بتقف فى مسافة حارتين مش حتى حارة واحدة... يعنى اللى حيمسك الحارة دى حيطيرلة على الاقل دستة مغفلين...

و فى النهاية برضة حيدفع 200 جنية غرامة فى المحكمة و يخرج... لان القانون لا يحمى المغفلين... المشكلة بس فى الخضة و الحالة النفسية الزبالة و تلفيات العربية و بهدلة الاقسام و النيابة و المحكمة

ربنا يأخدهم و يخلصنا بقي منهم و من بلاويهم بحق الشهر الفضيل قولوا أمين

امييييييييييييييييييييييي ييييييييين

MMamdouh

**hugan** · 13-08-2010 04:16 PM

المشاركة الأصلية كتبت بواسطة د.محمود صلاح

ايه اللي اضطر الناس دي انها تعدي الدائري ؟ ابجث في السبب قبل القاء اللوم عليهم بالكامل .

النا س ملهاش ذنب
هو مضطر انه يعدي الطريق علشان يركب مواصله
هل وفرت له بديل كوبري او نفق علشان نحمله المسؤليه
لو كان البديل موجود فعلا ولم يستخدمه
يكون موته موت مستحق لانه اهمل
العيب عيب النظام الفاشل
الناس عندهم ارخص من رغيف العيش

**dr.hazem** · 13-08-2010 06:29 PM

اخواني الاعزاء

هنبه على حاجه في غاية الخطوره والله

فيه ناس الشرع قد يعتبرهم منتحرين!!!!

ربنا قال
(ولا تلقوا بأيديكم الى التهلكة)

واللي بيقف على الدائري وغيره بالشكل ده هوا بيلقي بيده الى التهلكه لا محاله

وبعض العلماء يروا ان اللي يعمل كده كأنه منتحر

والحقيقه كلامهم عاجبني جدا

عامله زي اللي يقولوله في انزلاقات تلجيه في المكان الفلاني
يقول عارف بس هروح برضو

مهو منتحر كده

هو على يقين ان اللي بيعمله غلط كبير وقد يودي بحياته ومع ذلك بيعمله برضو

يبقى منقعدش نقول هما اكيد مش عايزين يموتو نفسهم

اللي يعمل كده كمان شجع انه يموت غيره

ياجماعه الكلام ده خطير جدا

مش كفايه انه وقف وعرض نفسه للموت
ده شجع غيره كمان
متخيلين لو غيره اللي اتشجع ده حصله حاجه
هيبقى بسبب اللي سن السنه القبيحه دي
اذن بجميع الاوجه محدش يقدر يبرأهم ولا يدافع عنهم وملهومش دية وكل واحد يعمل اللي هوا شايفه كويس وفيه مصلحته والله المستعان

تحياتي

-

-

-

الموضوع: كلاكيت للمرة الالف: قتيل على الدائرى

LinkBack

أدوات الموضوع

عرض

-

-

-

-

-

المواضيع المتشابهه

كلاكيت للمرة الالف العربية اتجرحت و لازم افضل متنكد

قتيل و 18 مصاب فى حادثة على الدائرى

كلاكيت للمرة المليون

كلاكيت للمرة الألف بلطجة رجال المرور!

الكلمات الدلالية لهذا الموضوع

المفضلات

المفضلات

ضوابط المشاركة