الموضوع: صبانة ال 20000 في رمضان وشكرا للمهندس خالد ممدوح-والمهندس محمد عمر فرع العبور

المشاركة الأصلية كتبت بواسطة tamer61

حجزت لصيانة ال20000 يوم الخميس الماضي 12\8 فرع العبور وكانت مفاجآه حلوه ليا إنهم عملوا فتره مسائيه خلال رمضان ودي طبعا فكره ممتازه علشان ظروف الصيام.

المهم رحت الساعه 9 بالضبط و تم دخول العربيه للورشه الساعه 9:30 بالضبط و الصيانه عباره عن تغيير زيت و فلتر الزيت و تغيير فلتر الهواء و تغيير البوجيهات وتربيط عفشه و كشف على الفرامل. طبعا حمدت ربنا إن المهندس \خالد ممدوح كان هناك و الحقيقه رجل محترم و بشوش و بيسمع كل حاجه و بيتحقق بنفسه من كل إللي بتقوله بالإضافه لتعامله بذوق و إحترام مع كل الناس "ربنا يبارك له ويكتر من أمثاله". و كمان قابلت هناك برضه المهندس\ محمد عمر مدير الورشه و هو شخص أكتر من رائع و تحس إنه بيتكلم بإخلاص و إحترام و بيحسسك إن العربيه عربيته يعني منتهي الإهتمام والأمانه.

المهم قالولي إن العربيه حتخلص على الساعه 11:30 أو 12:00 فرحت أتجول في المعرض بروقان لأن الجو كان هادى جدا وقابلت هناك الدكتور\شريف عبد العزيز "من الزقازيق" وهو أحد ملاك اللوجان إللي إتعرف على العربيه و إشتراها بعد دخوله على نايل موتورز و الحقيقه إن خبرته في السيارات كبيره جدا و بالمناسبه هو مبسوط جدا من اللوجان من كل النواحي.

جت الساعه 11:00 و لقيت المهندس خالد بيقولي العربيه خلصت قلت له يا ريت السنه كلها رمضان علشان الروقان و الهدوء و كمان سرعة الآداء.

ملاحظاتي بعد الصيانه:

العربيه رجعت لحالتها أكني لسا مستلمها ....و كمان السحب ممتاز وتحس إنها عايزه تطير و بقت بتدور بالنيه "يعني يدوب تفكر تلف المفتاح تلاقيها دارت" وبقى صوتها أهدى.

ملحوظه أخري:

إتجننت في عقلي و إشتريت مسند الذراع من التوكيل "ب 710 جنيه" أصل أنا عندي عقدة الأصلي "بالمناسبه كنت شاري الدواسات برضه من هناك 325 جنيه .... و ركبته بنفسي لأن الفني مش موجود فتره مسائيه بس بجد يا جماعه تحفه تحفه تحفه ..إدى فخامه غير طبيعيه للصالون بالإضافه للراحه وكمان مساحة تخزين جديده وعلى العموم حرفع صوره بعدين لأني بكتب الرساله دي و أنا مفيص من الصيام و العطش و كل سنه وأنتم جميعا بخير و سعادة. و تقبلوا خالص تحياتي.

الف مبروك على صيانة 20000 و عقبال صيانة المليون انشاء الله

حضرتك الصيانه اتكلفت كام كله شامل الزيت؟؟؟؟؟
عشان انا ان شاء الله هحصلك قريب
و يا تري كل الاقسام موجوده في الورشه بالليل ؟؟؟

مبروك على الصيانه ومش قادر اسامحك على المسند هههههههههه ربنا يبارك لك في العربيه والمسند يالا علشان ما تزعلش

كل عام وانتا بخير


الناس في العبور محترمه ومحمد عمر انسان ذوق ومهذب

ياريت يا جماعة نتكلم مع الناس بتاعة التوكيل اننا يمعنا عنكم كذا في منتدى نايل موتورز علشان يديهم برضوا احساس ان شغلهم متراقب وبيسمع وان ده بيعملهم سمعه كويسه او وحشه اعتقد ده ممكن يفرق في الاهتمام شويه وعلى الاقل مره ورا التانيه يحسوا ان عددنا كبير طالما ان فكرة اننا نتقابل ونتفق على شكل للتعامل مع التوكيل وغيره موضوع صعب جدا وشبه مستحيل يبقى على الاقل الصيت ولا الغنى