إرحمونا من الموتسيكلات الصينى ديه

**tutankhamoun** · 25-08-2010 02:00 PM

لسة كنت هاشيل مكنة صيني من 3 أيام
واقف في منعطف بالليل و منتظر ميكروباظ جاي ........ سبته يعدي و بعدين بكمل لقيت عيل راكب مكنة صيني مش منور و لا لمبة و كان خلاص بيني و بينه مسافة لا تزيد عن 10 سم .
و قبل كدا برضه واحد منهم بيلف ادام في شارع الهرم وواخد الشارع بالعرض و مسكت فرامل على الأخر ........ و كمان شتمني !!

**zaza_lanos** · 25-08-2010 02:13 PM

معظم الناس فى البلد ده
دماغهم احسن حاجة وهما الصح
نتيجة الجهل
وعدم المعرفة

وربنا يحفظنا من المرضى دول

**د.محمود صلاح** · 25-08-2010 02:33 PM

منتشر بصورة رهيبة عندنا ... وبدون نمر كمان .

**otefa** · 25-08-2010 04:16 PM

وده تحليل لتوضيح أسباب أنتشار الدراجات الصينية والطوفان ألي لسه هايحصل فيها وبها

منقول

دراسة جدوى.. لو بعت الموتوسيكل الصينى ببلاش فانت كسبان
السلام عليكم
علشان ادخل فى الموضوع لازم اوضح نقطة مهمة للاعضاء لعلهم يتوعبو قصدى و وجهة نظرى
طبعا كلنا ان لم يكن اغلبنا عانى من الزحام والمواصلات فى القاهرة الكبرى
انا عن نفسى هتكلم عن حالتى وهسيب لكل عضو يحب يشارك فى الموضوع ده انه يتكلم عن نفسه بنفسه
انا بشتغل 6 اياام فى الاسبوع ومعنديش غير يوم واحد اجازة فقط
فى كل يوم بركب مكروباص بنص جنيه لحد المترو وبركب المترو بجنيه يعنى 1,5 وانا رايح للشغل
وطبعا زيهم يبقى انا مواصلاتى فى اليوم 3 جنيه
طيب باخد قد ايه فى المشوار ده ؟؟؟؟ باخد تقريبا ساعة ونص رايح وزيهم وانا راجع
بالنسبة لموضوع بهدلة المواصلات والقرف وركوب المكروباصات والزحمة اللى فى المترو وانتظار المواصلات الخ الخ الخ مش هتكلم عنها لانها معروفة للجميع
نرجع للحسبة بتاعة المواصلات
وصلنا دلوقتى ان مصاريف المواصلات فى الشهر بتساوى تقريبا 90 جنيه
والوقت فى اليوم اللى بيضيع فى المواصلات هو 3 ساعات
وطبعا المجهود العضلى والبهدلة مش محتاجة حسبة
طيب نيجى بقى للموتوسيكل ونقارنه بالحياة بتاعتنا
لو انا جايب موتوسيكل فى حدود 3000 جنيه
المشوار بتاعى كله على بعضه من محطة البحوث لحد الخلفاوى يعنى الموار مش هياخد ربع ساعة بالمشى العادى
استهلاك البنزين مش هيعدى نص جنيه فى اليوم
والوقت بدل ما كان ساعة ونص رايح وزيهم جاى هيبقى نص ساعة رايح جاى
فهناك فرق بين 3 ساعات مواصلات وبين نص ساعة مواصلات
والتكلفة طبعا هناك فرق بين 3 جنيه فى اليوم وبين نص جنيه فى اليوم
يعنى تقريبا انا هوفر 2.5 فى اليوم تقريبا بيساو 75 جنيه فى الشهر وطبعا مش حاسبين المواصلات للمشاوير الخاصة
فمبلغ 75 جنيه لو ضربناه فى 12 شهر هيساوى 960 جنيه تقريبا توفير فى السنة
طيب لو انا اصلا اشتريت الموتوسيكل ب 3000 جنيه فده يعنى انه خلال 3 سنين هكون انا لميت تمنه من تحويشة المواصلات
فتخيل اخى الكريم انه بعد 3 سنين لو رميت الموتوسيكل فى الزبالة اكرمكم الله او فى الشارع فانا مش خسران تمنه ولا حاجه لاننى اصلا تمنه انا حوشته من تحويشة المواصلات
فمش مهم ان الموتوسيكل عمره الافتراضى سنتين او اقل او اكتر طالما الواحد بيستخدمه صح ومش جايبه علشان يبهدله
فى ناس يا جماعة بيركبو مواصلات اكتر من كده وبياخدو وقت اكتر من كده وبيكون داخل القاهرة يعنى مهواش بين محافظات ولا حاجة
فتخيلو الموتوسيكل الرخيص بيوفر ايه على اصحابه
ده طبعا غير الراحة النفسية والجسمانية اللى بيكتسبها سائقو الموتوسيكلات واللى كانو بيفتقدوها وهما فى المواصلات
انا عن نفسى لما اختصر الوقت فى المواصلات فده ربح ومكسب ليا وخاصة لو قلتلكم ان الشركة اللى بشتغل فيها ساعات العمل فيها الرسمية 12 ساعة من 9ونص الصبح لحد 9ونص الليل ومفيش ريست بين ساعات العمل
فطبعا انا هحس بكم ساعة اللى هوفرها لما اشترى الموتوسيكل ان شاء الله
بس الفكرة انى هشترى موتوسيكل كبير وغالى شوية فى حدود ال5000 بحيث يقعد معايا فترة اطول وافرح فيه
دى وجهة نظرى من حيث دراسة جدوى شراء موتوسيكل وحساب المزايا والمكتسب من شراءه وطبعا كل واحد هيكون ليه وجهة نظر مختلفة واتمنى ان كل واحد يدخل الموضوع ده انه يشارك فيه بوجهة نظره ويعتمد على ظروفه كمثال علشان الكل يستفيد
تحياتى لكم جميع
منقول

**mahmoud_anwar** · 25-08-2010 04:45 PM

ياجماعه انا زهقان موت من الموتسيكلات الصيني دي بجد والقي شويه متسولين ركبينه وكمان حصل مع ولدتي ان حقيبه اليد بتعتها اتسرقت وكان عيل سائق موتسيكل صيني وشد الشنطه وجري كان امنيه حياتي امسكه والله العظيم مكان هيشوف الموتسيكل والعجيب اننا رحنا عملنا محضر قالنا نمره الموتسيكل طبعآ مافيش نمر قالنا خلاص عوضكم علي الله عرفت سعتها اننا في الكوسه منتوصاش رحت بقا لي الراجل الي كان واقف ساعت الوقعه بقوله انتا انسان برد بتقول حرامي ومعرفتش تمسكه يلا ربنا كتبله عمر جديد الحرامي لي اني فعلآ لو كنت مسكته يشهد ربنا كنت هعزبه ولا هايهمني سين ولا جيم اصلها دراع مبقاش في احترام وكمان التكاتك بقت حاجه الواحد لا يستحملها تيجي في اي مقطع تلقي توك توك بيقفل عليك القي بقا ماشي في الشوارع العموميه ومتوسط الطريق لا تعرف تيجي منه يمن ولا شمال وطبعآ اغلبيه الي سيقنه شباب متسول جدآآآآآآآآآآآآآآآآآآآآآآآ آآآآ وطبعآ بقا مصدر ازعاج من المتسولين الي بيسقوه الي بيشربه فيه والي بيسرقه برضه بيه
أحنا بقنا نساعد الحرميه جامد جدآآآآ عواميد الاناره في الشوارع مطفيه علي طول عندنا عدد وفير من التكاتك والموتسيكلات
يعني ممكن ده الدعم الي كانه بيتكلمه عنه بيدعمه الحرميه اهو برضه علشان الشباب العطل اليمش لقي شغل شغلوهم اهو
ههههههههههههههههههههههههه

**haroun707** · 25-08-2010 05:14 PM

انا بيجى عليه اوقات كثير بكون عاوز اكون واقف بشومه كده والعيال اللى بتجرى بيه دى وبتعمل حصان اروح مديله واحده فى وشه بالشومه

وهو بيجرى كده

انا فعلاً طهقت منهم

**charming** · 25-08-2010 05:28 PM

مفيش مانع ابدا ان الشباب صاحب الامكانيات المتواضعة و الذى لا يملك حق سيارة انة يركب موتسيكل تحقيقا لذاتة و خدمة انتقالاتة
لكن مهم جداااا انة يحترم الشارع و اللى ماشين فية و يكون عارف اصول سواقتة

اقتراح
انشاء جمعية اهلية نشيطة للتبنى هولاء الشباب زيها زى الرابطة او المجموعات الاجتماعية اللى بنعملها على المنتدى او اللى بيعملوها فى الواقع فى الولايات المتحدة الامريكية بيكون ليها قواعد و اصول بينتمى ليها هولاء الشباب

**wasta** · 29-08-2010 10:48 AM

المشاركة الأصلية كتبت بواسطة modo88

وانا كمان اتبصم علي عربيتي من موتوسيكل بس حظه كان معايا 3 اصحابي ف العربيه واخد علقه سخنه الخبطه اتكلفت 30 جنيه تصليح والواد اكل علقه يجي ب 325 جنيه

قطيعه تقطعهم هما والتكاتك الله يخربيت اللي فكر يصنعهم

أحسن ياريتنى كنت الرابع معاكوا كنت إديته شويه ب 275 جنيه هههههههههه

المشاركة الأصلية كتبت بواسطة haroun707

انا بيجى عليه اوقات كثير بكون عاوز اكون واقف بشومه كده والعيال اللى بتجرى بيه دى وبتعمل حصان اروح مديله واحده فى وشه بالشومه

وهو بيجرى كده

انا فعلاً طهقت منهم

ياريت ياباشا وأنا هكمل عليه بس إنت وقعه بس

**Zika9909** · 30-12-2010 05:29 PM

يا جماعة العيب مش في الموتوسيكل الصيني، العيب في إللي راكبه، لأن المحترم محترم سواءً كان راكب موتوسيكل أو عربية أو حتى ماشي على رجليه، أما غير المحترمين ماليين البلد، شوف و أنت واقف في أي طابور شوف كام واحد هيحشر نفسه قدامك عشان يسبقك و ياخد مكانك، أبسط مثال وأنت بتقطع تذكرة المترو تبقى واقف قصاد شباك التذاكر و بتدي الموظف الجنيه تلاقي واحد مد إيده قدامك و عايز ياخد التذكرة قبلك!!!، نفس الشخص ده لو ركب موتوسيكل هيبهدل الدنيا و هيزاحم و يخبط في عربيات الناس بلا مبالاة، و لو ركب عربية هيكسر عليك من غير إشارة و يقطع عليك طريقك و يكون عايز يلف شمال تلاقيه جاي من أقصى اليمين و يوقف الطريق كله عشان خاطر يلف بدل ما يعمل حسابه من بدري و يكون محضن شمال عشان ما يعطلش غيره، و حتى لو ماشي على رجليه هتلاقيه ماشي في نص الشارع و يعدي الشارع حتى لو في عربيات جايه.
أنا شخصيًا أكتر حاجة بتضايقني و أنا سايق هو برود المشاة، ماشيين في عرض الشارع و لاحياة لمن تنادي.
المشكلة إن أغلب الناس دول إمكانياتهم تسمحلهم يشتروا الموتوسيكل الصيني عشان كده إحنا شايفين إن الموتوسيكل هو المشكلة.
الأسوأ منهم بقى التوكتوك، تلاقي واحد -لا اتربى في بيتهم و لا المدرسة ربته و لا حد عرف يربيه- سايق برعونة و تهور و ياما خبطوا ناس كبار في السن و ياما موتوا عيال و الجاي أكتر.
ربنا يستر.

-

الموضوع: إرحمونا من الموتسيكلات الصينى ديه

LinkBack

أدوات الموضوع

عرض

-

-

-

-

-

-

المواضيع المتشابهه

"قسم السيارات الصينى نايم" تعالوا نصحصح (ماهى السيارات الصينى داخل مصر) موضوع متجدد

إلى السادة المتحيزين إلى سياراتهم الشخصية : أبوس إيديكو إرحمونا!

الموتسيكلات الصينى b.m & shski & keweseki

حسبى الله ونعم الوكيل فى الى دخل الموتسيكلات والتكاتك الصينى مصر

ايه رأيكم فى الموتسيكلات الصينى؟؟؟؟

الكلمات الدلالية لهذا الموضوع

المفضلات

المفضلات

ضوابط المشاركة