كنت باشوف امبارح برنامج صبايا.. الظاهر انها حلقة معادة جت أيام عيد الحب.. الحلقة كانت عبارة عن نماذج نادرة من المحبين.. من النماذج دي اتنين كانوا بيحبوا بعض اوي من 25 سنة.. لما كون نفسه اتقدم لها.. بس ابوها رفض.. و حاول كذا مرة بس ابوها برضه ما كانش راضي بس الأسباب لم تذكر.. آخر ما زهقوا همه الاتنين قاموا متفقين مع بعض و سهلت له هي مهمة قتل ابوها
و قد كان.. و اتقبض عليهم و اتحكم عليهم بالمؤبد.. فات منهم 19 سنة.. انما لسه بيحبوا بعض.. من 15 سنة تقريبا قدم هو طلب لإدارة السجن عشان يكتب كتابه عليها.. و الإدارة وافقت و كتبوا الكتاب.. بقالهم 15 سنة مكتوب كتابهم و دلوقتي مستنيين يخرجوا عشان يتموا الزواج.
الملفت بأه للنظر هو ان المذيعة المحترمة جايباهم و بتتكلم معاهم كنموذج للحب اللي مش بتعوقه ظروف رفض أب و لا سجن سنين طويلة و لا حاجة خالص.. و بعد ما الريبورتاج خلص هي بتعلق و بتقول ان هو ده الحب فعلا.. و بتوجه كلمة للشباب انه ما يصدقش البنت لما تتخلى عنه عشان أهلها مش موافقين و بتقول للشاب من دول: تبقى ما بتحبكش.. تبقى بايعاك.. و لما الشاب يتخلى عنك عشان أبوكي رافض يبقى ما بيحبكيش.. لسه دلوقتي شايفين ازاي حد ممكن يضحي بعمره عشان اللي بيحبه.. ممكن يقتل عشان اللي بيحبه.. طبعا مش باقول ان كلنا لازم نعمل زيهم و نقتل.. انما حتى بعد كده الحب بيعيش.
طبعا لا تعليق على الكلام ريهام.. انما سؤالي هو: ايه حمى الحب اللي طافحة على مجتمعنا اوي الأيام دي كده؟ ايه الاحمرار اللي بيصيب مصر يوم 14/2؟ مش شايفين ان الموضوع زايد عن حده حبتين؟
المفضلات