الكاوتش اتفرتك فى جينا على سرعه 160 كم

**densfog** · 30-08-2010 07:10 PM

السلام عليكم اخوانى الأعزاء اليكم اخر مصايب جينا

وانا ماشى فى امان الله على طريق مصر الأسكندريه رايح على باب الله لأكل عيشى فى السويس وماشى على حوالى 160 وانا جنب اوتوبيس حسيت كأن طوبه خبطت فى العربيه جامد بعدها بثانيتين وكانت سرعتى 160كم بالظبط بدأت اسمع صوت خبط جامد من ناحيه العجله اللى قدام يمين .. الحمد لله ربنا هدانى ومادوستش فرامل وشغلت الأنتظار وبدأت اخد يمين ( كنت فى اقصى اليسار ) لحد لما وصلتها لبر الأمان وهنا كانت المفاجأه .. العجله متفرتكه بكل ما فى الكلمه من معانى .... الجزء المسطح اللى بيبقا ملامس للأرض منفصل تقريبا عن باقى العجله ...
طبعا ركبت الأستبن المسكين بتاع العربيه كل الناس اتريقت عليه واللى يقوللى هو لونه اصفر ليه هو انت دوست على كتكوت؟؟ ... وفضلت ماشى بالكتكوت لحد السويس وأدينى بحاول اخد قرار اشترى اى نوع كاوتش وهل اجيب الرخيص زى الكومهو او النان كانج او الهانكوك ولا اجيب البريدجستون وده لأنى ناوى اغير الطقم كله باذن الله ..... بالمناسبه الحاجه الوحيده اللى عاجبانى فى الموضوع ده ثبات العربيه بسم الله ماشاء الله فى اثناء ما الكاوتش فرقع حسيت ان انا حتى لو سيبت الدريكسيون كانت العربيه هتفضل ماشيه فى سكتها عادى ومعملتش مجهود علشان احفظ توازنها .... عامه قدر الله وما شاء فعل

**slim_shika** · 30-08-2010 07:30 PM

الحمد لله يا باشا جت سليمة بس أخطر حاجة في الدفع الامامي هو إن عجلة قدام تضرب.

انصحك لو هتغير ال 4 فرد في خلال 1000 كيلو جيب عجلة مستعملة مؤقتا لحد متغير كله, لكن لو هاتغيرة كمان 10.000 - 20.000 يبقى اشتري جديد.

**م.محمد مختار** · 30-08-2010 08:01 PM

الحمد لله على السلامة...
وشكراً لبروتون على الجين الجميلة..

ممكن تشتري فردتين جداد للعجل الامامي فقط ... ولما يتوفر معاك فلوس تاني اشتري الفردتين الباقيين و ركبهم قدام برضه و رجع الأولانيين للعجل الخلفي.