الموضوع: أسهل طريقة للحصول على رخصة القيادة مضمون 100%

السلام عليكم ورحمة الله

انا لاحظت يا جماعة ان ناس كتير قلقانة من موضوع انها تروح تختبر فى المرور لاستخراج رخصة القياداة وخصوصا انك لازم تمر على ثلاث اختبارات (كمبيوتر - اشارات - قيادة )

المهم انا طبعا كنت زيكم لكن زيادة على كدة انى ماعنديش عربية وعمرى ما سقتغير حلوانى كدة كلشنكان ياعنى ونويت اشترى عربية بس كان مبدأى انى ماشتريش عربية الا لما يكون معايا رخصة قيادة والحل >>>>

[OVERLINE]
مدرسة المرور
[/OVERLINE]

الموضوع سهل جدا يا جماعة وهشرح رحلتى للحصول على الرخصة بالتفصيل

أولا: روح قدم فى مدرسة المرور اللى فى الشيراتون (بس للاسف لسكان القاهرة الكبرى فقط) ودى مدرسة تابعة للمرور وبيتم التدريس فيها لمدة شهر بواقع حصتين اسبوعيا

ثانيا : الاوراق المطلوبة هى نفس اوراق التقديم لاستخراج رخصة القيادة (كشف باطنة ونظر واربع صور شخصية وصورة البطاقة وصورة الؤهل) ومبلغ 256 جنية

ثالثا : المدرسة بتديك وصل وميعاد لاستلام جدول بمواعيد التدريب واسم المدرب وعند استلام الجدول بتستلم وصلات بعدد حصص التدريب (مش مهمة ) ورخصة قيادة تعليمية مؤقتة وكتاب بيشرح فية كل حاجة عن السيارة والمرور

رابعا: بيتم تدريبك على القيادة (غالبا على عربية نص نقل للرجال وعربية ملاكى للبنات) فى مكان قريب من مدرسة المرور من خلال المدرب على التقدم للامام والرجوع للخلف وبين الاقماع وبعد كام حصة بيطلع معاك على الطريق وتسوق وسط الزحمة

خامسا: بعد ما تخلص الحصص بقلولك على ميعاد الاختبار ومكانة مرور السلام .

سادسا : يوم الامتحان بتروح تشترى نموذج اختبار بحوالى 6 جنية من نفس المرور بس لازم تقول للموظف انك تبع مدرسة المرور لانة ب 40 جنية لو ما كنتش تبع المدرسة وبعد كدة تروح ساحة الاختبار فا هتلاقى واحد من المدربين هناك بيطلعلك الورق اللى قدمتة فى الاول وبيدبس فية نموذج الاختبار

سابعا : كلكم بتقفوا صف واحد او حسب ترتيب الورق اللى مع المدرب بيتم اختبار واحد واحد على نفس نوع العربية اللى كان بيتدرب عليها وذلك من خلال السير بين الاقماع (اللى مافهاش اى انحناء يذكر واللى ممكن تعدى عربية ترلا ) لمسافة حوالى 15 متر ياعنى مش حتلحق تسوق ويقولك انزل وروح للظابط .

أخيرا : تروح للظابط واللى المفروض انة بيتابعك وانت بتسوق (لكن هو اصلا ما بيبصش على حد) ويقولك انت روح خد رخصتك من المرور الفلانى حسب منطقتك فى خلال كذا ....

ملحوظة:
1- انت ما بتختبرش لا اشارات ولا كمبيوتر وحتى لو شددو شوية واختبرت فى حاجة منهم وسقط لا قدر الله ودة نادر لما يحصل ياعنى واحد ولا اتنين من ضمن 80 واحد بيقولك تعالى بكرة اختبر مع المجموعة التانية (لان العدد كبير فبيتم الاختبار على 3 يام)

2- مش كل المدربين كويسين فية منهم ناس انتهازية ياعنى كل حصة بيبقى عاوزك تظبطة بعشرناية او يقول لابو بنت مثلا بنتك مش اوى فى السواقة وانا ممكن اديها حصص اضافية والحصة بكذا

3- لكن اللى كان بيدربنى كان راجل جدع جدا معايا وماكنش بيعمل الحركات دى لدرجة ان اتفجأت يوم الامتحان ان كل واحد عمال يقول دا انا اديت المدرب بتاعى كذا واسغربوا ان الراجل دة ما خدش منى اى مليم

4- لو ما عندكش وقت انك تيجى يومين فى الاسبوع فممكن تظبط مع المدرب بتاعك انة يديك حصة واحدة مكثفة فى وقت معين فى الاسبوع بدل اتنين وابقى برضة قدرة

ودة بقى الفديو اللى صورتة وانا واقف مستنى دورى وهم بيختبروا البنات

YouTube - ‫ط§ط®طھط¨ط§ط± ط±ط®طµط© ط¨ظ…ط±ظˆط± ط§ظ„ط³ظ„ط§ظ… - ط¨ظ†ط§طھ ظ…ط¯ط±ط³ط© ط§ظ„ظ…ط±ظˆط±‬‎

المشاركة الأصلية كتبت بواسطة aymanmaly

انا بعتزر عن هذا التعليق
و لاكن لو الامتحان بقى بالشكل دة يبقى انا فهمت لية كم الحوادث و عدم الاخلاقيت فى الشارع المصر
بعتزر مرة اخرى و ارجو الفهم انى لا اقصد احد بعينة و لكن ما نراة فى الشارع من اسلوب قيادة يبدء من هذا الامتحان

حضرتك اكيد عارف ان لو الواحد خد 100 حصة تعليم قيادة برضة لازم ولا بد انة يتعلم السواقة من الممارسة مش من المدرسة وان كانت بتعمل اللى عليها بردة

لكن من الظلم بردة انى اشوف كام واحد بيسقط فى الامتحان وهو جاى من اخر الدنيا بعربيتة اللى بيسوقها بنفسة لمجرد ان مش حافظ اشارة او وقع قمع وفى الاخر (الرخصة مسؤلية صاحبها)

اما عن اخلاقيات السواقة فى الشارع المصرى مش هيعملها واحد مبتدأ بالعكس بيكون حريص جدا لكن اخوانا سواقين الميكروباص والتاكسى والنقل هم السبب فى الفوضى دى وربنا يستر علينا