الموضوع: أنا في دوامة ملهاش نهاية

المشاركة الأصلية كتبت بواسطة miss_pharma

اسمع مني عشان انا كنت في نفس موقفك ده بالظبط ..
كنت مكان البنت دي واهله كانوا عاملين معاه زي اهلك بالظبط عشان مامته عايزة تجوزه واحدة بنت صاحبتها .. بس اهله ماكانوش يعرفوني ولا عمرهم شافوني اصلا

بص بقى
الاول كان متردد وخد وقت كتير زيك كده عشان يفتح الموضوع خوفا على زعل والدته لحد لما خد قرار وفاتحهم .. مامته زعلت منه وخاصمته ومبقتش ترد عليه .. بس اقنع والده لان دايما الاب بيبقى عقلاني غير الام خصوصا في المواضيع المصيرية دي ..

والده جالنا البيت عشان يرضي ابنه مش اكتر وهو مش مقتنع ..
بس الحمد لله رب العالمين بعد ماقعد مع والدي ووالدتي ومعايا .. واتكلمنا وضايفنا واتعرف على اسرتي ..
الموضوع اختلف تمامااااااااااااا والراجل حس ان الحمد لله احنا ناس كويسين جدا وحبني وارتاحلي انا واسرتي ..
وخطيبي كان مبسوط جدا بالزيارة دي ..

فضلت مشكلة مامته لحد لما اقنعها انها تقابلنا وبرضه الحمد لله اول لما شافتنا وقعدت معانا انا وماما واتكلمنا
الموضوع اختلف خاااالص وببركة الدعاء ومشيئة ربنا الحمد لله الموضوع مشي زي الفل ما شاء الله ..

وعلى فكرة نفس الموقف حصل مع اخوه من قبله عشان برضه كانت عايزة تجوزه بنت اختها .. بس الفرق انهم لما قابلوا اهل مرات اخوه مرتحوش معاهم وكانوا رافضين البنت ومع ذلك اخوه صمم يتجوزها واتجوزها فعلا ودلوقتي معاه ولد .. ومش عايزة اقولك العلاقة بينهم اتحسنت ازاي .. لان البنت طلعت كويسة جدا واخلاق اوي اوي وعرفت تخليهم يحبوهاواثبتت انها زوجة صالحة ومريحة ابنهم وبقت دلوقتي هي وابنها عندهم فوق الكل ..

انا ليه بقولك كل الكلام ده ..
عشان اقولك ان لو البنت كويسة فعلا واخلاق وبنت ناس ومستوى اجتماعي حلو وبتحبها يبقى حرام تسيبها .. اتمسك برأيك وصمم عليها وفاتح والدك واتكلم معاه ولو هي فعلا بنت كويسة صدقني هيحبوها والمواضيع كلها هتمشي ..

طبعا انا مع الاراء اللي قالتلك اوعي تزعل والدتك ولازم تكسب رضاها وبلاش تعاند معاها ... لكن ده في حالة انها شايفة البنت اخلاقها مش كويسة او مستواها مش تمام ومش هتعرف تربي ولادك وتحافظ على بيتك ..
لكن والله مدام البنت كويسة .. اوعى تفرط فيها وادعي ربنا يجمعكم على خير ويحنن قلب والدتك عليها ..

إنتي إدتيني دفعة بكلامك ده...ربنا يسعدك إنتي وخطيبك ويتمم لكم بكل خير إن شاء الله..

المشاركة الأصلية كتبت بواسطة mrghost

نصيحه متسيبش البنت دى وحاول على قد ماتقدر لانك لو سمعت كلامهم مره هتلاقيهم كده فى اى موضوع تانى
انا ليا واحد زميلى سمع كلام اهله وساب بنتين بعد ماكان يخطبهم ودلوقتى ندمان اشد الندم لانه سابهم من غير سبب وشايف انه مش هيعوضهم تانى
وربنا معاك ويكرمك طالما ناوى خير
حاول مثلا تضغط على والدتك وقولها انهك هتسافر وتسيب البلد لو ما اخترتش البنت اللى انت عاوزها
وقولهم ان دى حياتك وانت اللى تختار ومستعد لتحمل العواقب وربنا يوفقك لو الموضوع فيه خير ليك

متشكر جدا علي ردك وإدعيلي

المشاركة الأصلية كتبت بواسطة haneen83

خد الموضوع بالراحه لان احيانا الام و الاب بيصعب عليهم ان ابنهم ما يسمعش كلامهم أو انهم يلاقوه ملهوف على بنت

فالرفض يكبر فى دماغهم .. و متهيالى موضوع الجيش مش مشكله اهم حاجه يتقبلوا ارتباطك بالبنت ..

و طالما ان البنت مافيش عليها خلاف فى ادبها و تدينها و اهلها برضه يبقى اكيد اللى حصل ده مجرد سوء تفاهم

بس انت ابدأ الموضوع مع باباك و اساله عن رايه فى البنت و عيلتها .. لو قالك انه مش طايقهم اساله عن الاسباب و ناقشه فيها
لما توصلوا لحل فى رايه و يبدا يغير فكرته .. قوله انك لسه بتفكر فيها

و يا رب يا رب يجمعكم على خير فى بيت واحد و يجعلكم زوجين صالحين فى الدنيا و الاخره

آمين يا رب.متشكر جدا