الموضوع: أنا في دوامة ملهاش نهاية

أنا هحكي علي قصة خاصة بي..هي مش قصة.هي دوامة.مش عارف هطلع منها بسلام إزاي وإمتي..أنا هحكي من البداية.. بسم الله..

- وأنا طالب صغير في ثانوية عامة ( من 8 سنوات )..إرتبط ببنت معايا في نفس المدرسة..وكنا مع بعض في الدروس الخصوصية.وكان بينا علاقة إرتباط محترمة وقوية جدا..والدتي ليها صديقة ( ربنا ينتقم منها ) عندها بنت ( ربنا ينتقم منها أيضا )..البنت دي كانت صديقة للبنت اللي أنا مرتبط بيها..بس طبعا مكانتش تعرف إني مرتبط بيها..المهم في يوم من الأيام الصداقة اللي بين البنتين باظت نتيجة إختلاف بينهم علي حاجة معينة..والست صديقة أمي دي ( ربنا ينتقم منها ) قدرت تخلي والدتي تكره البنت اللي أنا مرتبط بيها..وطبعا والدتي أصلا مكانتش تعرف إني مرتبط بيها..لحد ما حصلت المشكلة..وهي إن والدي ووالدتي عرفوا إني مرتبط بالبنت دي اللي المفروض إن أمي كرهاها ونجحت في إنها تكره والدي فيها علي الرغم من إنه كان بيحترمها جدا.وكان بيقول عليها بنت زي الألف...ومن ساعتها ( من 8 سنوات ) من بداية إرتباطي بيها,والدي ووالدتي عاوزيني أسيب البنت دي..وحصل مشاكل عندي في البيت وخناقات مستمرة بسبب الموضوع ده لفترة مثلا 4 سنين.لحد ما فهمتهم إني سيبت البنت وعلاقتي بيها إنتهت وهي في الحقيقة مستمرة..

- البنت دي محترمة لأبعد الحدود..أخلاق وتدين ووضع إجتماعي ممتاز..أخواتها 3 بنات..واحدة بتشتغل في الهيئة العامة للبترول ومتزوجة من دكتور قلب..وواحدة دكتورة في الرمد..وواحدة خريجة كلية تجارة ومخطوبة لمهندس كيميائي..ووالدها دكتور في جامعة الرياض في السعودية.وودالدتها ست بيت.

- أنا مرتبط بالبنت دي من 8 سنين..وإرتباطنا ببعض مستحيل ينتهي..ووالدة البنت وإخواتها عندهم علم وبيحترموني جدا ونفسهم موضوعنا يتم عي خير..والدها مكنش يعرف لحد ما عرف من شهر فقط وطالب إنه يقابلني.وهو حاليا نازل أجازة من شغله والمفروض إنه يرجع تاني بعد العيد..ولو مقابلتوش قبل سفره يبقي الموضوغ منتهي..يعني المطلوب مني دلوقتي إني أفاتح والدي في الموضوع وأخد موافقته وبعدين أقابل الراجل..وطبعا ده أمر إن مكانش مستحيل فهو صعب جدا..لأن الإعتبار اللي عندي إن ولا والدي ولا والدتي حبين البنت دي...والإتنين صعبين جدا في التفاهم ومش عارف أعمل إييه..أفاتح والدي إزاي.ويا تري هيكون رد فعله إيه..ويا تري في إحتمال إنه يوافق ولا لا..والمشكلة التانية في والدتي اللي عاوزة تجوزني لبنت صاحبتها ( ربنا ينتقم منها هي وأمها لأن هما دول سبب مشكلتي من البداية )..أنا مش عارف أعمل إيه..أتصرف إزاي.

أنا فضلت في الجامعة 6 سنين.وحاليا ماش في 24 سنة..يعني سني مش صغير علي الدكتاتورية دي.أنا اللي في سني عرفوا بنات وخطبوهم وقربوا يتجوزوهم من غير مشاكل..مش عارف ليه حصل معايا كده..مش عارف أتصرف إزاي..ومش لاقي حاجة أقولها غير حسبي الله ونعم الوكيل وفوضت أمري إلي الله..أنا آسف جدا علي الإطالة..بس كنت عاوز أفضفض