الموضوع: هعترفلكم بحاجة بس محدش يتريق عليه

انا شايف ان الموضوع في حاجات زيادة عن اللزوم
على رأي الاعضاء اللي قالوا عن المعلقة المفروض بعد المعلقة الاولى يبقى تاخد اعدام والله يرحمها.
او موضوع المخدة اللي اول مرة اعرفه بصراحة
بجد الموضوع دا بعد كدا ممكن يعملك مشاكل مع اقرب الناس ليكي (جوزك او اولادك بنت اختك او اخوكي)
تخيلي ابن اخوكي او اختك وهو بيموت فيكي . ووهو بياكل وحب يأكلك بمعلقته الخاصة الي بياكل بيها ومصر على كدا (الاطفال اليومين دول عنيدة هههههههه). هتعملي ايه.؟؟؟؟؟؟؟؟؟؟
انا شايف ان بعد الجواز هيحصل تغيير.

طيب لما حضرتك بتقرفي من اي شيء مستعمل يبقا معنى كدا مش هتمسكي اي فلوس في ايدك لأنها كان في ميكانيكي ماسكها قبلك وسباك وطباخ ونجار وكل الناس
هع
هع


بس بصراحه بجد يادكتور لازم تغيري نفسك شوية لسبب
هو الناس زمان قبل ظهور ادوات التعقيم ودراسه البكتريا والفطريات والكائنات الميكروسكوبيه والكلام ده كانوا بيموتوا من الأمراض بالكمية الي موجوده الوقتي؟

والله لو عملنا احصائيات لعدد الوفيات في مصر وعدد المصابين والمرضى في مستشفيات مصر هنلاقيها العصر ده اكتر من اي عصر
يبقا فين المنظفات والتطهير والكلام ده كله؟

سبب سلامة البشر هو ان ربنا يكون كتب لهم السلامة من كل سوء
الرسول عليه افضل صلاة واتم تسليم كان عرق جبينه مسك ( يعني بارفان بلغتنا) وكان بيمشي بين الأطفال يمسح على شعرهم ويلاعبهم فكانت كل أم تعرف ان ولدها كان مع الرسول من ريحة البارفان في شعره ولا خلاف لدينا كشعب مسلم انه أطهر الخلق هو نبينا صلى الله عليه وسلم وهو الي علمنا ان النظافة من الايمان
هل ده بقا معناه انه كان بيقرف لو سلم على حد تاني؟ او بيقرف لو شرب في كوب؟


وبعدين حضرتك في كليه طب مش المفروض برده ان عندكوا سكاشن تشريح وبتتفرجوا على عينات من أعضاء الجسم وحاجات كدا انا لما بشوفها عند اخويا الصغير بقوله الحمدلله اني في هندسه وبتعامل مع الالكترونيات بلا قرررررررررررف ,,, يبقا انتي لما يدخلك الناس التعبانين المرضى الي محتاجين مساعده هتسيبي الوظيفه ولا تتعامي مع الموقف وتحاولي تضغطي على نفسك شويه في موضوع القرف ده


كمان لاحظي ان 90% من البشر بيعتبروا ان لو حد قرفان من حاجه قدامهم دي تبقا إهانه ليهم ويفهم انه انسان مش نظيف وكله قذاره وطبعًا ده شيء مش كويس أبدًا


انا مره كنت راكب مواصلات زمان فالسواق جاب حاجات من سوبر ماركت كدا بسكوت وشيكولا وكدا
فقالي اتفضل قلت لا لا شكرا علشان انا كنت تعبان ومش عايز اي شيكولاه نهائي
قالي ياعم احنا ناس نظيفه برده متخافش يعني !!
فانا في وقتها على طول اخدتها منه وقلت له عيب الي بتقوله ده انا مش اقصد اقول انك مش نظيف والكلام ده احنا كلنا ولاد ام واحده واب واحد بس انا الي تعبان وعموما هاخدها اديها لحد من اخواتي الصغيرين

أتمنى حضرتك تقدري تتغلبي على المشكله دي لأنك هتفضلي دايما حاسه ان كل حاجه حواليكي مش نظيفه وهتتعبي جامد في مواقف كتير وانا مقدر انه موضوع صعب ,,, وربنا يساعدك يارب وتبقي دكتورة بتساعدي كل الناس

بس على فكرة علشان ابقا قلت الحق
في مواقف من الي انتي بتقوليها اصلا الناس الي غيرك هما الي سخيفين اوي فيها
زي الي بتقولك هاتي بوق
ماهو ده مش حاجه حلوه يعني ايه هات بوق دي؟
ويعني ايه واحد صاحب ياكل بمعلقتي ماهو دي حاجات برده فيها غلاسه من بعض الناس :D
ده كلام مخالف لابسط قواعد النظافه

فحضرتك مش مطالبه تلغي كل قواعد النظافه انتي بس تكوني معقوله يعني ميكونش في وسواس النظافه القهري المتعب ده

لأن مفيش اي حاجه في العالم 100% Perfect