الموضوع: انا كرهت الجولف وندمت اني جبتها

السلام عليكم يا شباب

انا كنت بعشق حاجه اسمها جولف 2 وكنت اتمنى اركبها والحمد لله ربنا كرمني وجبت عربية جولف 2 موديل 1986 1800 سي سي انجشكن

من ساعة ما اخدتها وهي فاتحه بقها بقالها معايا اسبوعين ومش عارف اركبها

اول ما استلمتها من صاحبها ومشيت بيها سلك البنزين اتقطع
وبعدين صاحبها مديهالي وقالي ان كهربة الموتور عاوزة تتظبط وحسسني ان الموضوع بسيط ، كانت بتكركر وبتنتش والار بي ام عالي بيبقى عند 10 وبيقعد يعلى ويوطى

وديتها للميكانيكي قالي الايرفلوميتر (الافوميتر) حد لعب فيه ولازم يتغير، وفيه بوابة بنزين المسمار اللي هيرجلش منه متطبب وشكله متشال فلازم تتغير علشان يظبط منها

وقالي انشاء الله هتتظبط

سبتهاله قعدت عنده 4 ايام ورجعت اخدها قالي انا غيرتلك ايدل واير فلوميتر وبوابة ورشاشات علشان طلعت بتسرب وتيل قدام وشدلي الفرامل وقالي خد العربية جربها بس فيه حساس هواء بدورلك عليه ، قالي وانت بتدور فيه فيشه هتركبها وبعد ما تدور تشيل الفيشة هتلاقي العربية صوتها وطي والار بي ام هيوطى وفعلا بقا عند خمسة

انا خدت العربية لقيتها فعلا فاقت وبقت تجري اكتر الحمد لله، رحت وانا مروح من ميدان لبنان حطيت فيها صفيحة بنزين 92

روحت لشبرا الخيمة وصحيت الصبح روحت مدينة نصر ورجعت الصفيحة كانت خلصت ، وكنت شغلت العداد علشان احسب بتعمل كام كيلو في الصفيحة العداد كان قاري 68 كيلو متر

انا حاسس انها مش بتاكل بنزين بس لاء دي غول بنزين ومش هلاحق عليها ، دا خراب بيوت

غير انها كانت بتدور بعد فترة وبتبطل وانا ماشي ، وفجأة قطعت بنزين قعدنا نلف وندور ونبص عالطلمبتين ونبص على دايرة البنزين وبعدين لقينا فيشة جنب فلتر البنزين من تحت مهزوزة

رحت مكلم الميكانيكا قالي هتهالي وديتهاله وبقالها يومين عنده

انا صارف لحد دلوقتي 1500 جنية والعربية مش عايزة تتظبط

الميكانيكي ده اسمه سيد فكر في ميدان لبنان هو بتاع فولكس وجولف، والراجل كلامه كويس ومحترم وبحس انه واثق من نفسه

بس انا فلست والله وداخل عالعيد مديون ومفيش في بيتي غير 200 جنية

انا فعلا كرهت الجولف، يارتني ما جبتها، وحسبي الله ونعم الوكيل في اللي بعهالي

معلش طولت عليكوا، ولو حد عنده معلومة تفيدني ياريت ميبخلش عليا بيها

شكرا

مدحت شوقي

انا فاهم انة لسة مغير رشاشات من بوست حضرتك

بس هل تثق انة مركب رشاشات فعلا و جديدة

كلام الاخ اللي بيشكك في ذمة الميكانيكي يخلينا نشك انة يكون حاطط فيها رشاشات قديمة و بتسيل, ان بعض الظن أثم

بس حضرتك غلطان

انا عمري ما اسيب العربية عند ميكانيكي و هو كمان اللي يشتري حاجتها, لأنة لازم يعمل مصالح, انا باشتري الحاجة و اقف اشوفها و هي بتتركب والافضل كمان لو تاخد القديمة و ترميها بمعرفتك علشان مايلبسش فيها حد تاني

بس لو مافيش هباب اسود في الشكمان يبقى فية تسريب بنزين من التنك او الوصلات