استلمت لادا 2107 مصرى تكييف وباور من 10 ايام..اليكم التقييم الشامل

**midonbtc** · 11-03-2008 10:36 PM

انا اشتريت لادا2107 مصرى ...عامل بيها حتى الان 600 كيلومتر
العربيه تكييف وباور ...ثمن العربيه 44 الف + 2500 باور +3000 الف تكييف
الثمن الاجمالى 49 الف ونص
اليكم القصه التاليه
اشتريت العربيه وفى تانى يووم من استلمها سمعت صوت وره عالى اوى وتكتكه جامده جدا المهم انا قلت يمكن دى تكهات او شكمان ..طلعت بيها تالت يوم على التوكيل وبعد انتظار اكتر من 4 ساعات ..((كل الناس اللى كانت عربيتهم داخله معايا مشيوا)) قلت اروح اسال المهندس ايه الاخبار قالى لأ حضرتك هتروح وتيجى بكره قلتله ((نعم انت بتقول ايه))قالى يافندم اهدى عربيتك فيها كسر فى طنبوره عمود الكرنك..طبعا انا سمعت كدا صعقت واتخنقت وقلتلهم مش ماشى ..المهم من هنا لهنا وبعد انتظار لاكتر من 3 ساعات اخرى عملوا العربيه والصوت انتهى وكله تمام...بعد كدا بيومين صمعت صوت صفاره عند الضغط على الفرامل روحت التوكيل قالولى غيرنالك التيل ووانا راجع بيها البيت رجع نفس الصوت تانى((وكانك ياابوزيد ماغزيت)) المهم انا طبعا تعبت من مشوار التوكيل قلت استنى لصيانه الالف لانى اكتشفت حاجه كمان
فتحه التكييف اللى على الشمال ضعيفه جدا قلت اوفر كل الملحوظات لصيانه الاف
العربيه بصفه عامه مش بطاله
استهلاك البنزين عالى شويه
20 لتر لكل
160 كيلو متر
انا مهتمتش انها فى التليين وجبت بيها 120 على الدائرى حاسس انها بتعوم شويه
الباور كويس جدا بس انا حاسس انه السبب شويه فى تعويم العربيه
اى سؤال انا فى الانتظار

**aif** · 11-03-2008 10:45 PM

الف مبروك ربنا يعطيك خيرها ويكفيك شرها
واصبر شوية لغاية لما تروح صيانة ال 1000 وخليك مركز اوي مع اي ملاحظة
وما تقرصش عليها في التليين
ربنا يملهالك بركة

**recentdesign** · 12-03-2008 11:12 AM

الف مبروك ربنا يباركلك فيها
هل تنصحنا نشتريها ولا ايه؟
وياريت لو تقدر تصورها من جوه ومن بره

**hfekry** · 12-03-2008 12:19 PM

المشاركة الأصلية كتبت بواسطة yasoxp

الف مبروك يامان وربنا يكفيك شرها انت تروح لاى صنيعى كويس وتعرف العربية فيها اه الاول علشان امانك على الطريق على الاقل وعلشان لما تروح التوكيل تكون عارف اه المفروض يتعمل ومحدش يشتغلك

100 % . وبلاش تقرص عليها فى قترة التليين
ربنا يديك خيرها ويكفيك شرها

**hamedo0** · 12-03-2008 12:31 PM

الف مبروك ربنا يعطيك خيرها ويكفيك شرها
هي دى التنفع في الشوارع مصر وبالاش تقرص عليها في الاول

**osama_alam** · 12-03-2008 01:00 PM

الف مبروك ربنا يديك خيرها ويكفيك شرها

معلش شوية اسئلة:
- هوه استهلاك البنزين العالي وانته مشغل التكيف ولا من غير تكيف؟؟
- ايه اخبار التكيف لو شغلته حاسه كويس ولا تعبان؟؟
- الباور اللي فيها زي العربيات التانية الباور (لو جربت عربيات تانية) ولا لأ؟
- انا اعتقد ان التعويم ده نتيجة حاجة مش مظبوطة , لأن اللي قريته قبل كده ان اللادا فيها تعويم فالدركسيون علشان نظامه القديم فلو اتغير بباور المفروض المشكلة ديه تتحل ولا الكلام ده مش صح؟؟

والف مبروك يا ريس