الموضوع: محتاج مساعده اهل الخبره في الدنيا بتاعتنا دي :(

المشاركة الأصلية كتبت بواسطة cars sniper

المسألة مش مسألة مظاهر
الانسان دايما يحب يتطور للافضل
من سنة تقريبا كنت هابدأ علاقة جدية مع واحدة اعرفها (فى2 طب)...بس عشان اتجنب موقف زى اللى حصل مع زميلنا..اول ماسألت على التفاصيل الشخصية سألتها عن والدها...وللاسف شغلانته مكانتش عجبانى مع انها شغلانة شريفة والبنت كانت عجبانى جداااااا...بس فكرت فى ولادى بعد كدة لما يروحوا لجدهم هايبصوله ازاى ولما يقارنوه بعيلتى هايقولوا عليه ايه...وده كان سبب انهاء العلاقة قبل بدايتها و دى غلطة زميلنا من البداية انه تعمق فى العلاقة من غير مايعمل حساب المستقبل

والله انا مش عارف اقول ايه...بس حاول مثلا تقولها ان والدك ووالدتك عايزين يجوزك واحدة بالعافية ومنشفين دماغهم وحالفين عليا لو ماوافقتش لا انا ابنهم ولا يعرفونى وانك عايز تكسب بِرّهم وماتغضبهومش ...وممكن تيجى من عند ربنا وهى اللى تقول مش عايزاك عشان مالكش كلمة وبتمشى ورا كلام والدك ووالدتك
مش لازم الكلام دة بالنص...بس حاول تمشى على الفكرة دى..انك تخليها هى اللى ترفضك عشان عيب خطير اكتشفته فيك
وربنا يقدم اللى فيه الخير

اعتقد معدش فيه وقت اني اخليها تكتشف فيا عيوب
هيا عارفه كل العيوب
ولما بقولها حاجه زي كده
اني مش هتغير او ان هو دا طبعي
بتقلي تخيل اني عارفه وموافقه؟او تخيل اني مش بحب كده بس مقدرش استغني عنك؟؟

المشاركة الأصلية كتبت بواسطة a7med_pharma

طبعا تسيب البنت
وهتزعل كام شهر أو كام سنة ..وهتنسا

لكن لو ماسيتهاش
هتزعل أبوك منك طول العمر..وتخيل والدك مش راضي عنك!!!

,,,,,,,,,,,,,,,,,,,,,,,,,,,,,,,,,,,,,,,,,,,,,,
ولو على الحجة إلي هتقولها لها
بسيطة مش هتغلب
ممكن تجيبهالها وش كده ..قولها والدي عاوز يجوزني (مثلا) لبنت عمي
وحلف عليا

..............................................
وعاوز أقولك حاجة مش عارف لو هتقبلها مني ولا لأ
معظم البنات بتدور على المستوى الإجتماعي الأول ..قبل الولد نفسه
يعني
أنا مريت بكام تجربة ..وكلهم بيأكدوا الحقيقة دي
البنت عاوزة تتجوز ..وبتدور على الأفضل(وده حقها)
لكن مش من حقها إنها تستخدم إسلوب (مسرحية الحب)على الولد..علشان تخليه يتجوزها

وربنا أعلم بما في الصدور
وطبعا الكلام ده مش على البنات كلها

وربنا معاك

شكرا جدا يا دكتور احمد
وياريت تبقي زي ما انت بتقول
مكنتش هزعل عليها ولا هخااف ولا ضميري هيأنبني
لكن للاسف انا متأكد من النقطه دي
دعواتك

المشاركة الأصلية كتبت بواسطة kamalsalem

تسمع نصيحة من واحد فضل على خلاف مع ابوه 3 شهور عشان بس يروح يتقدم لأهل البنت؟

البنت (مراتي دلوقتي الف حمد وشكر ليك يا الله يا حبيبي) من عيلة محترمة وابوها فضل انه يخرج من الجيش عميد على انه يطلع لواء بس بطريقة غير شريفة

ابويا كان شايف اني لسه صغير.. وقاللي اهدى على نفسك انت لسه متخرج.. وبعدين لما صممت قاللي مش هاروح اخطب وواخد معايا واحد مش راجل... يعني ايه... يعني اثبت انك اهل للجواز

اشتغلت اي حاجة جت ف سكتي... جبت الفلوس بالحلال من اي طريق.. والله ما كان بيشوفني في البيت.. وانا قلت ياااا رب مش عايز غير حلالك وصليت استخارة وقلت لو وقت الجواز دلوقتي هتجوز... والحمد لله اتجوزت (لو عايز تفاصيل اقولك انا عملت ايه) لكن في حاجة تحطها حلقة ف ودنك يا أخي الكريم

من يوم ما اتولدت عمر ما اهلي قالولي كلمة وطلعت غلط

الانسان اللي بقاله حوالي 50 سنه بيحارب في الدنيا ده اكيد شاف كل حاجة تتشاف... وصدقني كنت بقسى عليه واقوله انت مش عايز الخير ليا ليه.. كان بيسكت ويبتسم.. واعرف بعدها انه هو الصح وانا اللي غلط... مفيش واحدة في الدنيا دي هتحبك من غير مقابل... لكن ابوك الوحيد اللي نفسه يشوفك في الجنة وهو لأ...

لأسباب كتير.. انا وابويا مش قريبين من بعض.. وربنا يرحمني لو كان غضبان عليا وانا مش عارف... متغلطش غلطتي

انت بتقول خايف على مشاعر البنت؟ يبقى انت عندك استعداد تفك منها... اكسب اهلك... لكن لو شايف انه دي البنت اللي هتنام وتصحى كل يوم تشوفها هي واهلها بقية عمرك.. حارب طوب الارض عشانها بس افتكر انه ابوك قالك لأ عشان متزعلش منه بعد كده ولا تزعل من الي هتشوفه قدام عشان انا متأكد انه ابوك صح

كلام حضرتك جميل وبيصحي فيا حاجات كتير لكن برجع واقول اني مش هقدر اعمل كده من خلال معرفتي بوالدي
دا غير اني مش حمل احارب كمان سنه و فالاخر يبقي نفس الوضع ساعتها هكون اذيتها اكتر واكتر واكتر
حضرتك فاهمني اكيد