الموضوع: ارجو المساعدة - الدخول للرجال فقط -

المشاركة الأصلية كتبت بواسطة popupp

اشكركم كلكم يا جماعه علي الردود
انا متباع الموضوع بس من الاكونت التاني
فرصة بقي النهاردة الجمعة
تعرفوا وانا بقرأ ردودكم حصل حاجتين في منتهي الغرابة
مراتي دخلت عليا اودة مكتبي وشافتني قاعد بتصفح المنتدي وهي عارفة اني عضو نشط علي نايل موتورز
ويدوبك خرجت من هنا ولقيت البنت دي بتتصل بي تخيلوا
طبعا انا وشي جاب الوان ومعرفتش اتصرف ازاي خصوصا ان معظم الردود بتقولي مردش عليها تاني ولا اكلمها وجرس التليفون بيرن
رحت عامل التليفون صامت
وراحت بعتالي رسالة اراهان اتخن راجل فيكم ميقدرش يستحمل الكلام الحلو اللي فيها
وطبعا مسحتها لان تليفوني بيخضع لتفتيش مستمر


الناس اللي هنا ردودهم تقريبا واحدة لان اصلا مفيش غير الحل ده اني ابعد عنها والمهم البيت والعيال وكل الكلام ده
بس محدش فيكم قالي وانااااااااااااا ايه مش بني ادم؟؟؟؟؟؟؟؟؟؟؟
مش لي مشاعر واحاسيس
ثم انا لو حاولت بس التلميح لها سواء اني علي علاقة ببنت تانية او انها تغير معاملتها لي حتبقي سنة سودا عليا وعلي العيال

يا جماعه ده انا لما طلبت منها تغير لون شعرها قعدت 3 شهور علي ما غيرته وكأني بقلها حنغير جنسيتنا
ثم انها عصبية جدا ولا تتحمل اي نقاش من اي نوع حتي مصروف البيت لا تتحمل في اي نقصان لاي سبب اي كان ولا يجوز لي الاعتراض او حتي المناقشة
انا برتاح اوي وانا في الشغل او وانا في اودة مكتبي وهي تقريبا منعزلة عن باقي الشقة عشان اعرف اشتغل فيها بعيد عن وش العيال وصوت التلفزيون
فبحس اني مرتاح طول ما انا بعيد عن البيت بكل اللي فيه - عدا اولادي -

حتي لو بعدت عن البنت دي برده مش حبقي مرتاح وهو ده غرضي اصلا اني اكون مرتاح بس

كل الردود اللي جاتلي علي الخاص بشكرها جدا جدا حقيقي انتم اصدقاء فعلا

يا جماعه اللي ايده في المياه مش زي اللي ايده في النار
انا عايز ابعد عنها وعن اي بنت تانية بس عايز حياتي تبقي فيها لمسة حنية بس فقط لاغير
هو انا كدا بطلب طلب صعب وحرام؟؟؟؟؟؟؟؟؟؟
اسف للاطالة وعلي فكرة انا متابع الموضوع من الاكونت الاصلي بتاعي
واشكركم من كل قلبي

كلامك بيقول ويوحي انك مش هتسيب البنت دي وسايب كل المزات الي اعطاهالك ربنا وماسك في حاجة واحده
اقدر اقلك انك انسان جاحد للنعمة والله جاحد للنعمة
ربنا رزقق بالمال
ورزقق بالاولاد
ورزقق بالصحة
ورزقق بالزوجة
ونعم كثرة غيرك محروم منها
ومع دلك تتمني ان تاخذ من الدنيا كل شي كل شي ولا تحرم من شيء
هنيئا لك تمتع بالدنيا كيفما تشاء فهي دار فناء ومتعها في زوال ومسيرك هتموت ان عاجلا او اجلا وتقابل الرحمان وتسال وتحاسب عن انتهاك الاعراض مع ان عندك اللحم الحلال لكنك مصر تاكل اللحم الحرام
عموما الدنيا دار ابتلاء يعني يبتليك الله باي شي وينظر في امرك هل ستصبر ام ستعطي الاخرة ظهرك وترضي بمتع الدنيا
ويقول الله عز وجل وما يلقاها إلا الذين صبروا * وما يلقاها إلا ذو حظ عظيم
ويقول الله عز وجل( أم حسبتم أن تدخلوا الجنة ولما يعلم الله الذين جاهدوا منكم ويعلم الصابرين )

انت عمرك ما تعبت فى السنين دى كلها اكيد تعبت على الاقل مرة واكيد مراتك كانت حنينة عليك مستحيل اصدق انها عمرها ما كانت رومنسية ابدا

المشاركة الأصلية كتبت بواسطة doctor_eid

السلام عليكم
الأخ الفاضل
اسمحلي بعد اذنك اكلمك ناشف شوية و يمكن ازودها معاك بس سامحني
حنية ايه اللي انت عايزها يا عم الحبّيب (بتشديد الباء الاولى). بقى بعد عشر سنين جواز و عيلين جاي تقولي مراتي مش حنينة و بتأكلني في بقي. ده على رأي مراتي اسمه فراغ و مراهقة متأخرة.
اولا بالنسبة لمراتك فهي شايلاك انت و ولادك بقالها عشر سنين و ان كانت بتشتكي من المصروف فده حال كل الستات و بعدين هي بتصرفه على مين ثم ان حتى زوجة سيدنا عمر بن الخطاب (على ما اذكر) اشتكت من ضيق الحال في احد الأوقات. و بعدين انت كمان واخد جنب في البيت وقافل حجرتك عليك يعني انت اللي عازل نفسك عنها. طيب اذا كانت هي مابتحسش بحنيتك هتحسسك بحنيتها ازاي. ده غير ان بعد خدمتك انت و ولادك طول اليوم يبقى الف كتر خيرها اذا كان عندها نفس تقولك تصبح على خير قبل ما تنام. و اذا كنت انت مش مقدر مجهودها ده و بتتهمها بعدم الحنية و تروح تدور عليها بره فاسمحلي انت راجل ناكر الجميل.

احب اقولك اني متجوز من 15 سنة و عندي 3 اولاد. و دكتور و مركز و عربية و كل حاجة. و لكن عمري ما سمحت لتفكيري انه يلعب بعيد و ده لأني باخاف ربنا و كمان باحب مراتي و هي بتحبني رغم ان الحياة فيها ما فيها من مشاكل و شد و جذب. لأن البداية انك تتنازل او تتساهل، و انت بنفسك معترف انك اللي ابتديت بالتنازل و اديتلها المساحة اللي تدخل فيها في حياتك.
و احب اذكرك بالرسول لما شاف في المعراج رجالا يتركون اللحم الطيب و يأكلون اللحم النتن(شايف بلاغة الوصف:"النتن")
كمان احب اقولك ان ماحدش ابدا يقدر ياخد كل حاجة. و انت دلوقتي على مفترق طرق: يا اما مراتك و بيتك و عيالك و سمعتك و شرفك و ووووو
....... يا اما البنت دي و الحب و الحنية شوية ثم الضياع و الخيبة و الحسرة وووووو
اذا ربنا قواك و اخدت الطريق الأول فأنت الفائز حتى لو بدون حب و حنية. و ياما بيوت مقفلة على اسرارها و ماشية من غير حب و لا حنية و لا نيلة و انما علشان مراعاة ربنا و العشرة و العيال و حاجات تانية كتير كلها مشروعة و محترمة.
كمان انت مراتك تقدر تاخد منها كل اللي انت عايزه بألف طريقة و طريقة ... بالحب جايز بالمسايسة جايز بتكبير الدماغ احيانا جايز و حتى بالغصب في بعض الأحيان جايز.ده لأنها مراتك، بتاعتك، حلالك
و يا بختك بقى لو عرفت تلف دماغ مراتك و تاخد منها الحنية اللي انت عايزها. تبقى كسبت من كل ناحية

اما لو اخترت الطريق التاني فتبقى غلطان جدا جدا لو كنت فاكر انك انت السواق. يا حبيبي فيه ناس محترفين الحاجات دي و دول ما بيسألوش النصيحة من حد اما حيث انك سألت فتبقى غلبان زي حالاتنا بس حبيت تعمل برم على كبر. و على كده تأكد انك التابع و ليس المتبوع و البنت دي قادرة انها تلعب بيك و بعشرة زيك في نفس الوقت.
اتذكر الآن واحد زميلي كان ابن ناس و متربي و مافيش اخلاق بعد كده و كنا لسه شباب و واحدة مطلقة و معاها عيل لعبت عليه و بيه و كان هيلبس في الحيط رسمي. بس ربنا قدرنا اننا نوقفه عند حده و كمان عملنا مع البنت دي واجب ادب كويس.
و بعدين اذكرك بايام الخطوبة شوف خطيبتك (مراتك حاليا) كانت بتقابلك لابسة ازاي و بتقولك ايه و انت كمان كنت بتبقى شكلك ازاي و بتقول ايه
اما دلوقتي الحوار بقي : --الغدا جاهز -- اهو عندك عالسفرة
و تقوللي ما بتدينيش حنية
الناس اللي بيقولولك اتجوز البنت دي انا كمان باقولك لو جدع اتجوزها . ان ما كنتش تلاقي المعاملة اتغيرت و طلبات الفلوس و الخناق كل يوم و التاني و حاجات تانية م تتقالش و هتلاقي كل اللي كنت بتحلم بيه طلع سراب يحسبه الظمآن ماء. و ياسلام لو حملت تبقي وقتك طين و تخش في مشاكل مع الإتنين ده بخلاف انك مش ممكن تأتمنها على شرفك لأنك لا مؤاخذة عرفتها من الشارع

معلش طولت و يمكن زودتها شوية بس لمصلحتك

في النهاية تخلص من البنت دي ازاي. انك تكلمها و تنهي الموضوع بس لازم يكون بسماجة و برود و قلة ادب كمان لو لزم الأمر و تحسسها انك مستغني على الآخر و اوعى تحن و تظهر اي مشاعر من نوع مش بايدي و الظروف اقوى مني و الكلام ده لأنها لو حست منك بكده مش هتسيبك تفلت من ايدها

ربنا يسترنا جميعا دنيا و آخرة

عجبني رد حضرتك جدا يادكتور عيد صياغه ممتازه للافكار وخبره حياتيه تنم عن الكثير
والقناعه بالحلال كنز لايفنى
دمت بصحه

للاسف مريت بنفس تجربتك تقريبا .. وبدون تفاصيل بغيضة الى نفسى ومش عايز افتكرها عايز اقولك ان هذه التجربة هاتعمل فيك حاجة من الاتنين .... اما تكسرك واما تقويك
وانا الحمد لله قوتنى ولحقت نفسى بعد ضياع كبير و احساس بالذل و المعصية والبعد عن تربيتى ودينى وربنا عوضنى خير لانى تركت هذا الامر لوجه الله اولا واخير مش مجتمع ولا بيت ولازوجة ....
فضع الله نصب عينيك ... ومن ترك شئ لله عوضه عنه بافضل منه وهاتحب مراتك جدا بعد ما تتوب توبة نصوحة

المشاركة الأصلية كتبت بواسطة popupp

لماذا كل هذه القسوة في الردود الاخيرة؟؟؟؟؟؟؟
انا حسيت اني فعلا كنت سكران ومحتاج دش باااااااااااارد عشان افوق

بس انا مش قادر يا جماعه ولكن كلامكم خلاني مصر علي ترك البنت دي لان واضح اني لو استمريت معاها حتبقي نهاية مأساوية

بس كل شوية بتتصل مش عارف اعمل ايه ومراتي بدأت تشك لان النهاردة الجمعة وانا مخرجتش من البيت وهي سامعة جرس الموبايل كل شوية يرن وانا مش برد علي غير العادة

وبعد ما عملت التليفون صامت انا اللي بقيت ابص في التليفون كل شوية عشان اشوفها اتصلت ولا لأ

مش عارف ايه اللي انا فيه ده؟

يا رب قويني

انت كدا اخدت خطوه ايجابيه
ربنا معاك و يثبتك
اتأكد انك لو فضلت مكلمتهاش اسبوع مستمر
هتنساها بنسبه كبيره جدا
وترجع تقول سورى فى اللفظ "ايه الهبل اللى كنت هودى نفسى فيه دا "
انا فاهم موضوع افتقادك للحنيه دا
بس مفيش حد بياخد كل حاجه
وانت الحمد لله عند حاجات كتير غيرك مش لاقى 1 على 10000 منها
حاول تتكلم مع مراتك بطريقه جديه شويه فى الموضوع دا بدون اى كسوف
وهى لازم تتغير عشانك
حاول تسافر معاها لوحدكم اى حته 10 ايام
اكيد كل شىء هيبقى تمام

والله والله الموضوع في أيدك وبسيط جدا
جواز ماأعتقدش أن الموضوع ده في دماغك ولو في دماغك تبقي بترمي نفسك في التهلكة.
أتصل بيها وفهمها بصوت هادي جدا وواثق في نفس الوقت أنك مش هاتقدر تغضب ربنا وتستمر في علاقة معاها ولا هاتقدر تضحي بعيالك ألي هما كل حياتك وأنهي علي كدة وبمنتهي البساطة.
وأستعين بالصلاة والقرأن تبعد عنك الشيطان وتقوي عزيمتك وهاتنجح أن شاء الله.................وأنهي من أتجاه وفي نفس الوقت أشغل نفسك وتفكيرك في أزاي هاتظبط بيتك في الأتجاه الصح والأيجابي وأكيد هاتنسي مايغضب ربك.........تحياتي.

أه وحنية أيه ياباشا أنت أكيد قصدك (تمثيلية) لأنك قلت بنفسك أن الموضوع مصلحة وفلوس مش كدة!!!!!!!!!