الموضوع: الرجالة راحوا فين

المشاركة الأصلية كتبت بواسطة samcar

لا معلش - لا حتحترم صبى نقاش ولا صبى قهوجى - خلينا صادقين مع نفسنا - انت لو ركب جنبك فى مواصله او فى مكان عام صبى زبال حتكلمه عادى وباحترام ولا حتبقى بتلم هدومك منه لاتتوسخ
للاسف احنا فى مصر بنحترم البدله مش اللى جواها - وجرب بنفسك تروح مكان بلبس عادى بلاش مبهدل - ولبس تانى غالى ومعاه نضاره ماركه وشوف المعامله - اللى اشتغل ورا الرقاصه دى دور على اقل الحرام - ومش معنى كده انهم محترمين - بس هو قال لنفسه اهو احسن من الشحاته او السرقه او الهجره على مركب مخروم
وعلى فكره اللى زى امينه دى ممكن تحمى العيال دى وتحسسهم ان لهم ضهر - واللى بيقول ان الرتب خرجوا وسابوا القاعه - انا شفت بقى رتب اتقل وفى نادى عسكرى واداره النادى هى اللى كانت جايبه سعد الصغير 0 وكان سكران طينه ومعاه فرقه زى دى - والبهوات الرتب هزوا وسطهم عادى جدا

انا كان نفسى بدل ماتلوم على الشباب تلوم على اللى زى دى وزى سعد ده - اللى علشان صوتهم المعفن يتوه فى الزحمه بيجيبوا الصبيان دول يغطوا عليهم وينشروا حاجه اسمها - الهرج الجماعى - علشان قال الواد او البت المطربه شعلل الفرح
معلش انت لاجربت الفقر ولا العوز- بدل ما تلوم على الشباب ده - فكر ازاى البلد تتغير علشان ما نشوفش المناظر دى

هى المنظومة كلها غلط

المصريون الان يعانون من نقص شديد مادى و دينى

يعنى من الاخلاق مفيش فلوس و لا تدين ولا اخلاق

اسمحولي بعد اذن الجميع ارد على موضوع انتشر بشكل (( مستفز جدااااا ))
و لاول مره هستخدم اللون الاسود في كتابتي, و اللي بستخدمه بس في حالات الوفاه

هو ايه موضوع الرجاله فين..؟؟؟ و الرجاله ماتوا في الحرب, و الكلام السخيف ده

هو في ايه يا جماعه...؟؟؟ مش حاسين ان الكلام ده (( عييييييييييب ))
ياللي بتتكلموا عن العيب..؟؟؟

الرجاله اللي بتقولوا انهم ماتوا دول, و هما فييين... يبقى منهم اب لكل واحد فينا,
عم لاي واحد, خال... اخ.... زوج.... رئيسك في الشغل... شيوخ...
علماء... مفكرين... دكاتره.. مهندسين... ظباط... محاسبين... محاميين..
.................................................. .....
و الليسته كبييييره و تضم كل الرجاله بمختلف علاقتنا و صلتنا بيهم...

اي واحده بتقول الرجاله ماتوا.. و مافيش رجاله... تقبلي الكلام ده على
والدك؟؟؟؟ على اخوكي؟؟؟ على عمك؟؟؟ على خالك..؟؟؟ على زوجك؟؟؟

ولا الكلام ده يشمل كل الناس دي...؟؟؟ و ساعتها هتبقى مصيبه كبيره قوي بقى


الناس اللي زعلانه من شوية العيال اللي بترقص دي... انت تعرف ظروفه؟؟؟؟

الكلام سهل قوي من ورا الكي بورد في التكييف كده و عايش في رفاهيه,
لكن انزل للناس دي, و حاول تعرف هما ليه كده, و ايه اللي وصلهم لكده
و انت تعرف و تفهم ليه وصل بيهم الحال انهم يعملوا شئ ضد طبيعتهم
كرجاله و شباب المفروض انهم يكونوا مؤثرين بشكل ايجابي في مجتمعنا

انا مش مؤيد ليهم, و لا بقول انهم صح و رجاله زي الفل... لأ طبعاً

هما زفت و هباب و اي كلام تحبوا تقولوه... لكن بلاش نحكم و احنا
عايشين في الوهم... يعني بردو لازم نفهم ان ده (( الواااااااااااقع ))

هيعيش منين لو ماعهوش شهاده و لغه و كمبيوتر..؟؟؟؟

ده المهندس و المحاسب و غيرهم مابيشتغلوووش لو ماعمهش لغه و كمبيوتر

ده انا مهندس و معايا لغه, و بشتغل على الكمبيوتر بكل الاشكال
و على كل البرامج الهندسيه... و يوم مافكرت اسيب شركة
ابويا اللي هي مقاولات و استشارات هندسيه, و اشتغل بره لاثبات الذات,
كل الشركات قالتلي اسفين, اصل احنا عندنا ناس عايزين نمشيهم لاننا
مش قادرين ندفع لهم مرتبات اصلا... و شركاااااااات كبيره زي عامر جروب
و دره, و دار الهندسه, acg و غيرهم....
و شركات بره مصر كمان, لكن متاثرين بالازمه لحد دلوقتي

ده غير اللي رفض لاني مش رايح بواسطه, و انا مش عاجز اصلا اجيب واسطه
لكن كنت عايز اعرف هل ممكن انسان قدراته و مؤهلاته و شخصيته يشغلوه
لو من غير واسطه, و لا خلاص عليه العوض و كله بقى بواسطه.. و عرفت الرد

يا اما ترضى و تشتغل بمرتب يخلص يوم 15 في الشهر, و تصرف من جيبك
او من جيب ابوك, و ترجع تاخد المصروف تاني...!!!!!!!

فطبيعي جدااا احترمت نفسي, و رجعت تاني اشتغل مع ابويا, اللي اصلا
انا ماتبطرتش عليه, لكن عايز اثبت ذاتي بنفسي, و عندي طموح عايز اوصله..
و هو تفهم رغبتي تماماً, و قاللي ليه لأ, جرب و اسعى ورا طموحك..
فللاسف فكرت اشتغل بره... و انا عارف ان مافيش فرص عمل اصلا
لكن قلت لنفسي انت بردو عندك سنوات خبره, و لغه, و كمبيوتر.. ايه تاني؟؟؟
جرب حظك و ان شاء الله هتلاقي فرصه كويسه... و يارتني ماجربت
لان الموضوع ده خلاني و صلت لمرحله صعبه جداا و اكتئاب لمدة 3 شهور

كنت برمي الـcv في كل شركه زي اعلانات حضر موت اللي بتتوزع في الشارع

انتوا مش عايشين في الواقع, و عيب ان ناس محترمه و مثقفه تقول الكلام ده

اي مجتمع في العالم مهما كان دينه او لغته او ثقافته..............
فيه المهندس و الدكتور و الظابط و المحاسب و المحامي و الاعلامي
و العامل و القهوجي و الحلاق و ساعي البريد و السايس و الزبال.........

و بردو فيه تاجر المخدرات و الحرامي و القاتل و المزور و المرتشي
و الرقاصه و بائع الخمور و الغير شريفه (عفواً) و ..............

هي الدنيا كده, و اللي مش فاهمها كده يبقى عنده مشكله و محتاج يحلها مع نفسه

ربنا خلقنا طبقات و مستويات و شعوب و اجناس و ديانات مختلفه

و الاختلاف ده رحمه من عند الله, و لا يمكن كان يبىقى كل العالم شرفاء
و لا يمكن يكون كله ناس سيئه و خطائين...

و هو اصلا ليه في ثواب و عقاب...؟؟؟ ليه في حسنه و سيئه؟؟؟؟

احنا ليه بنلعب دور مش بتاعنا و هو الحكم على الناس و احنا اصلا عندنا
كتيييييييير محتاج يتصلح, ده لو كنا صرحا مع نفسنا من الاساس..!!

كل اللي نقدر عليه, و اللي نقدر نقدمه هو النصيحه ( بالحسنى ),
مش الهجوم و التقليل من بني آدم قد يكون عند الله افضل مني و من اي حد

من كان منكم بلا خطيئه فاليرجمها بحجر... ( يا رب نفهم )

النخوه موجوده... الجدعنه موجوده... الشهامه موجوده... الغيره موجوده

يعني الرجاله موجودين في كل مكان, و اللي عايش في وسط للاسف
فيه انصاف رجال, و بيشوف الناس دي كل يوم, دي مش مشكلتنا,
و مش من حق حد التعميم او حتى يسأل هي الرجاله فين..؟؟؟ موجودين والله

بس اللي مايشوفش من الغربال, يبقى.................

الرجاله المحترمه فى الموضوع قالوا كل الكلام زى ما قولت قبل كدا بس للاسف الناس الى قاعده ورا التكييف مش حاسه بالناس الى بتاكل من صناديق الزباله وبتنام فى المقابر وسط الميتين ولو قابلوا رقاصه ولا سيده مجتمع راميه ولادها فى البيت ميعرفوش بعض وجايبلهم مربيات ومقضيها حقوق مرأه فى النوادى والهلس دا وبتعمل كل حاجه الا انها تكون ام وزوجه صالحه...
صدقونى لو قابلوا الناس دى يا سلاااااااااام سلامات وصور واحترام وتقدير وتبجيل....
ودى تانى مره اسمع فيها عباره " معدش فى رجاله" تانى مره اسمعها خلال يومين بجد ....
وانا اساسا دمى محروق لسه من الموضوع القديم والله مش عايز ارد على الموضوع دا عشان انا مش عايز اسيب المنتدى دا واتوقف ...
وسيبك يا بشمهندس غازى من نصيحتك بقولك ان الكلام دا عيب وبيشمل الازواج والاقارب للاسف قالوا على ازاواجهم احسن رجاله فى الدنيا والباقى معدش فى رجاله اكيد فى رجاله مستوردين فى البلد بقى....
لاحول ولا قوه الا بالله والله انا زعلان وانا بكتب الكلام دا ومتوقعتش ناس بالمستوى العلمى والثقافى دا يطلع منهم كلام زى دا....ربنا يهدينا جميعا

باشمهندس غازي قال ووفى .. مليون ثانكس يا هندسة :)
أسهل حاجة التعديل والاستعلاء على مخاليق ربنا .. مافيش أي احترام لمجهود ومعاناة البني آدمين .. وربنا ما يحكم على حد بأي حاجة وحشة