مشكله عند دوران العربية مش عارفلها حل

**Fadl** · 17-09-2010 06:22 PM

انا اول ما اشتريت العربية لادا 2107 مود 2003 كانت العربية بتبطل ف أول ما تدورها علي السلانسيه و وقت ما تبطل لمبه الزيت و لمبه البطارية تنور

قمت وديتها عند ميكانيكي قاللي المكنة كويسه و محتاجه بس طقم شنبر و حبه حاجات كدا و بعدها العربية قعدت يومين تلين و كانت بتبطل برده ...أروح للميكانيكي يقوللي لسه تظبيطه و أعليلك الكهربا و كدا

المهم دلوقت نفس المشكله لسه...العربية خاصه و هي بارده عشان أدورها لازم اسندها بنزين و انا بشغلها و حتي لو سخنه برده لازم اسند ببنزين
رحت للبيه الميكانيكي قال الكاربيرتير يتحل و نجيب طقم جوانات!!!!

المشكله فين?و أعمل إيه?هل دينامو !!هل مارش??هل بطاريه??هل زيت??ولا إيه بالظبط!!!

**Adham** · 17-09-2010 06:33 PM

طبيعي ان لما العربية تبطل لمبة الدينامو و الزيت ينوروا

برضة هما بينوروا لما تفتح الكونتاكت قبل ما تدي مارش و تدور

و بالتالي لما العربية بتبطل بيبقى الكونتاكت مفتوح و طبيعي انهم منورين

اللي مش طبيعي ان حاجة منهم تنور و العربية دايرة

لو لمبة الزيت نورت او ماطفتش اول الدوارة و خدت شوية وقت يبقى طلمبة الزيت تالفة او العربية جايبة سبيكة

و لو لمبة الدينامو منورة اثناء ما العربية دايرة يبقى الدينامو بايظ او فيوز الدينامو قطع او الكتاوت قاطع او سير الدينامو اتقطع و هنا بطل فورا علشان لو السير اتقطع يبقى العربية حاتسخن جداً لأن طلمبة المياة بتبقى (غالباً) على نفس السير

موضوع ان العربية اول الدوارة بترتل او تبطل و لازم تديها بنزين دة عادي جدا في العربيات الكابراتير القديمة

و الحل هو انك تشد الشفاط (التشوك) قبل الدوارة

و رأي خاص غير الميكانيكي بتاعك لاني حاسس من كلامك انة بيشتغلك

**Fadl** · 18-09-2010 08:17 AM

اولا بجد جزاك الله خيرا"باشمهندس أدهم"علي شرحك الوافي
ثانيا انا طبعا جديد في السواقه و العربيات فمعلش لازم تستحملوا ضعف معلوماتي

انا بس حابب اسأل يعني إيه كتاوت و يعني إيه أشد الشفاط او التشوك مع التدوير و يعني إيه عربية جاويبه سبيكه و هل السبيكه دي حاجه غاليه ولا إيه?

و علي فكره لمبه الدينامو بترعش و العربيه ع الأول و بطيئه و العربيه تكركر كدا و أول ما أسندها بنزين تطفي

و لتاني مره متشكر جدا و آسف ع الإطاله

**Adham** · 18-09-2010 08:23 AM

دة كدة عيب كاربراتير

خللي الميكانيكي بتاعك يفك الكاربراتير و يركن العربية جنب الورشة في حتة كويسة و تاخد الكاربراتير في شنطة و تنزل بية ورشة الحاج ابراهيم في شبرا عند الدوران في شارع صغير امام سينما شبرا بالاس

حاياخد منة يومين شغل و ترجع تستلمة و تاخدة للميكانيكي بتاعك يركبة و يقفلة زي ماهوة مايلعبش فية و انساة بعد كدة العربية حاتضبط معاك و تفوق في السحب و تبقى تمام

بس تعمل زي ماقلتلك و تاخد الكاربراتير بنفسك تودية شبرا

و اوعي تسيبة للميكانيكي و يقولك انة حايودية

يا اما حاينفخة بالهواء و يغسلة و يقولك وديتة و جبتة

حايويدية لاي حد قريب منة يهمبك فية اي حاجة و يقولك انة برضة عملة في شبرا

علشان كدة تودية بنفسك اضمن

_____________________________

الكتاوت هوة ريلاي تقوية للكهرباء او كتاوت الدينامو بيبقى زي سويتش يفصل الشحن عن البطارية لما تتشحن و يوصل لما تنقص شحن يعني بيتحكم في مستوى الشحن للبطارية

السبيكة دي حاجة في قلب الموتور من جوة و بتتغير لما تعمل للموتور عمرة و بس, السبيكة ممكن ب 100 او 150 جنية عندك , فية عربيات السبيكة الاصلي بتاعتها غالية و توصل 400 جنية و اكتر بس المشكلة مش في تمنها المشكلة في تغييرها تغييرها

دي لازم شغلانة كبيرة و غالبا الموتور لازم يروح يتخرط مع تغييرها برضة (خراطة كرنك) و لما تعمل عمرة يبقى كمان شنابر و صبابات او فريزة للقواعد و جوانات و شغلانة يعني تصرف 1500 جنية مثلا

التشوك دة بيبقى زرار بيتشد زي الدراع اللي بيفتح الكبوت كدة

تلاقية جنب الدركسيون من تحت شوية

و تشدة قبل ما تدور الصبح

و تسيب العربية دايرة 3 دقايق و هوة مشدود و العربية واقفة (تسخين) و بعدين ترجعه مكانة و تمشي

و ماتستعملوش و انت ماشي لانة حايشرق العربية و يخنقها

**tomm** · 18-09-2010 09:58 AM

solenoid valve هو جزء كهروميكانيكى اسمة السوقى بلف السلنسية بيركب مباشرة على الكربيراتير او بيتوصل بالكربيراتير بواسطة خراطيم واصلة الى عداد الاقتصاد فى الوقود الموجود فى التبلوة و الغرض من هذا البلف هو تنظيم خلط الوقود والهواء فى سرعة المحرك البطيئة وذلك تخفيض التلوث راجع علية و غيرة ان لزم الامر .