الميكروباص وال bmw

**Frozen_Pain** · 22-09-2010 12:54 PM

بسم الله الرحمن الرحيم
السلام عليكم ورحمة الله وبركاته
اللهم صل على محمد وعلى آله وصحبه أجمعين

انا ساكن فى اكتوبر ورحت الشغل انهاردة بالمواصلات ركبت الميكروباص والسواق شكله اساسا كاره نفسه واحد بيقوله ممكن تنزلنى ميدان لبنان من تحت قاله لا من فوق ولو مش عاجبك انزل المهم الراجل نزل
بعدها بشوية عايزين فكة علشان الباقى السواق بيزعق طبعا ماليش دعوة مش معايا فكة لحد كده وزى الفل

المفروض ان الميكروباص من بعد ميدان جهينة بيمشى فى الحارة المخصصة ليه طبعا لما بيكون فيه امين شرطة غصب عنه بيمشى فى الحارة البطيىء لو مفيش بيفضل ماشى عادى لحد قبل كمين هايبر وهوب ينط فى البطىء،، المهم هو دخل فى البطىء ويادوبك عدى الكمين وعايز يطلع على الطريق السريع من مدخل مش مخرج للطريق ( يعنى المكان اللى خرج منه ده المفروض للى داخل البطىء بس) وطبعا لان الامين مش موجود كالعادة فعالملية كلها شوربة،،، وهو خارج بئا عربية بى ام 318 موديل 2009 جاى طيارة وبيدى كلاكس والسواق مصر برضه انه يطلع قدامه المهم بتاع البى ام كان هيرشق فينا لولا ستر ربنا

واتفرج يامعلم على الامبالاة بتاعت السواق واتفرج على الشتايم اللى اخدها من البى ام بالام والاب والصوابع والله بهدله شتايم وهما ماشين جنب بعض وسواق الميكروباص بيرد عليه ويقوله انا مش هرد عليك يا زبالة ،،، الصراحة منتهى قلة الادب

الجميل بئا فى ثانية تلاقى كل الركاب عملوا فيها محققين وقضاة وانت الغلطان وهو ازاى يمشى بسرعة وحكمت المحكمة وس وص وحركات بئا لحد ما الواحد ينزل وهما لسه بيتكلموا فى قضية مين غلطان

نزلت سلم البالون وركب ميكروباص تانى لحد نفق شيراتون القاهرة المهم واحد ركب وعاوز ينزل عند مستشفى الشرطة السواق نزله قدام الباب بالظبط الراجل قاله لا قدام شوية قالوا ياعم اهو الباب الراجل قاله خلاص ياعم ما اخدتش بالى هو انت عاوز تتخانق معايا وابتدوا بئا سيناريو الردح لبعض فى الشارع ونهارك ابيض وامشى ربنا يسهلك طريقك وبرضه اشتغلت لجنة التحقيق الدولية فى الميكروباص ولحد مانزلت وهم لسه بيحققوا من الغلطان

والله احنا وصلنا لمرحلة الواحد بقت تصعب عليه نفسه من اللى بيشوفه من قلة أدب فى الشارع وازاى حد يشتم وفى بنات فى العربية وتخدش حياء البنت وازاى تقبل انك تشتم حد بالاب والام

والله مش عارف اقول ايه

ربنا يرحمنا برحمته

**mohamed_selim** · 22-09-2010 01:05 PM

ليه رحت مواصلات ؟

**احمد المصرى** · 22-09-2010 01:10 PM

والله احنا وصلنا لمرحلة الواحد بقت تصعب عليه نفسه من اللى بيشوفه من قلة أدب فى الشارع وازاى حد يشتم وفى بنات فى العربية وتخدش حياء البنت وازاى تقبل انك تشتم حد بالاب والام

انا برضوا ساكن فى اكتوبر بجد المواصلات بقت حاجه تخنق والله الواحد بيقول الحمد لله الذى عافانا بجد ربنا يكون فى عون ال بيركب مواصلات

**Frozen_Pain** · 22-09-2010 01:25 PM

المشاركة الأصلية كتبت بواسطة احمد المصرى

والله احنا وصلنا لمرحلة الواحد بقت تصعب عليه نفسه من اللى بيشوفه من قلة أدب فى الشارع وازاى حد يشتم وفى بنات فى العربية وتخدش حياء البنت وازاى تقبل انك تشتم حد بالاب والام

انا برضوا ساكن فى اكتوبر بجد المواصلات بقت حاجه تخنق والله الواحد بيقول الحمد لله الذى عافانا بجد ربنا يكون فى عون ال بيركب مواصلات

أمين يارب

**Dr. Elsaadani** · 22-09-2010 01:49 PM

يكون فى عوننا كلنا مواصلات وسيارات

**mohamed_selim** · 22-09-2010 02:18 PM

المشاركة الأصلية كتبت بواسطة frozen_pain

أبدا يا سيدى أخويا عريس جديد وواخد العربية

السبب التانى وده الاهم ان عند الشغل مستحيل تلاقى ركنة للعربية

مبروك لاخوك :)
ماهو يا تستحمل سخافة المواصلات يا تستحمل قرف الركنه .. اختار
الحمدلله على كل شيئ

**amrnagy** · 22-09-2010 02:23 PM

المشاركة الأصلية كتبت بواسطة mohamed_selim

مبروك لاخوك :)
ماهو يا تستحمل سخافة المواصلات يا تستحمل قرف الركنه .. اختار
الحمدلله على كل شيئ

فعلا سواء مواصلات او سيارة خاصة الاتنين بقوا قرف

**Ghamrawy** · 22-09-2010 02:45 PM

سواء راكب مواصلات او راكب عربية او حتى ماشى على رجلك
حاتتقرف فى عيشتك
مافيش حاجة بقت بتتعمل بسلاسة و سهولة
كل حاجة بقت صعبة و السبب اخلاقيات الناس
الناس قامت على المخرج بتاع افلام حين ميسرة و كلمنى شكرا لما عمل افلام فيها نماذج من سواق الميكروباص ده
و للاسف برضه لو تبص حواليك فى الشارع حاتلاقى نماذج كتير من اللى فى الافلام دى