الموضوع: لما حد يكون مشترك dsl و يعيد توزيعه على باقى الجيران هل يسأل قانونيا ؟

المشاركة الأصلية كتبت بواسطة makka

عندك حق والله
بس رأى حضرتك متزعلش منى سطحى جدا
المفروض عشان اتفرج على الكورة اشترك فى الجزيرة ودا بكام؟ وعشان ادخل على النت اجيب خط نت ودا بكام؟ دول لوحدهم مش اقل من 500 جنيه فى الشهر لاقل اشتراكات طيب انا لما تبقى عندى الحاجات دى وهى معلش بقت مهمة ب50 جنيه بس اخدهم ولا لا؟
كان مرتبى 750 جنيه ومتجوز فى بيتى مفيش ايجار وبشتغل محاسب فى شركة ادوية وعندى طفلة ظبطهملى كده؟ طيب انا اتعرضت لازمة صحية خلتنى اسيب شغلى لفترة ولما جيت ادور على شغل جديد لقيتنى هبدأ بـ400 جنيه وانا عندى 30 سنه ومتجوز ومخلف أو اروح اشتغل مندوب بـ1000 جنيه واقعد الف طول النهار فى الحر واروح بيتى نص الليل اتدلق على السرير اخرج من بيتى الصبح وبنتى نايمة واروح البيت بالليل وبنتى نايمه ومشفهاش غير يوم الجمعه ولاقى مراتى بتقولى انا عايزه اروح عندنا طيب يا بنتى روحى بس مش هقدر اجى معاكى انا هقعد مع ماما وبابا واخواتى هوصلك وبالليل هخدك دى تبقى عيشه؟؟
هل ينفع ادفع 500 جنيه لتصحيح أوضاع اشتراكاتى؟! ولا بلاش نت وابطل اتفرج على كورة هو ممكن حضرتك يكون دخلك حلو ومعقول لما تدفع 1000 جنيه قيمة اشتراكات مش هيهزوك بس 500 جنيه كتير عليا كل شهر ومتنساش حضرتك تشيل الملصقات اللى على سيارتك عشان دا مخالف للقانون وكمان مترميش ورقه فى الشارع عشان دا مخالف للقانون

+1

كلامك على عينى وعلى راسى من فوق السرقة سرقة بس السؤال اللى بيطرح نفسه جهاز الكمبيوتر اللى انت بتكلمنى من عليه شارى نسخة الويندوز بتاعته؟ طيب شارى الافلام والاغانى اللى عليه شارى البرامج اللى عليه؟ يا عزيزى كلنا لصوص بشكل او بآخر وحضرتك بتقول انك عايش بفلوسك وحاطط صابعك فى عين التخين انا بقى عايش بستر ربنا وحاطط صوابعى العشرة فى عين التخين والرفيع.

ياسيدى الفاضل انا مش ملاك
اكيد بحكم انى عايش فى البلد دى باغلط
بدفع رشوة عشان ماخدش مخالفة بيحصل مش بأول لا
بس بابأه عارف انى غلطان بس انا مضطر بس مفيش اى اضطرار فى النت المفتوح و الجزيرة المفتوحة