الموضوع: سيراتو ولا تيدا ؟

يا جماعة هى خناقة وتعصب اعمى وخلاص
خالينا نرتقى فى الحوار دايما بعد اذنكم

انا حرد على بعض النقاط اللى ذكرت فى مشاركتكم

بخصوص الشكل والقباحة اللى بتقولوا عليه ده وان الناس معندهاش ذوق وهى بتختار
احب اقول فى الاول عيب الكلام ده اللى بينبع عن تعصب اعمى

اولا تصميم شكل التيدا منه برستيج اكتر منه جمال فى الشكل , تحس بالعربية ان عربية برستيج واقفة ومن جوة روعة فى التقفيل والتصميم الداخلى والخامات المستخدمة

ثانيا موضوع الفتيس ,هو طبعا ميزة ان يكون موجود عندك فتيس متطور وخصوصا لو ستبترونيك , ولكن اعتقد انه حيفيدك اكتر على السرعات المنخفضة , والحمد لله ان التيدا من غير الستبترونيك غول ووحش على السرعات المنخفضة وكمان فيها كيك دون عالى جدا واللى يركبها حيحس بيه جدا ,
لكن موضوع الثبات بردوا اللى بيتكلم من عدم واقع خبرة والله يسامحه لانه حيتحاسب على الكلام ده
ان التيدا ثبات رائع على الملفات 100 وكمان 110 ولكن بعد ال160 الثبات بيقل ولكن عزم الماتور بيجمع بسهولة لغاية 180 والثبات اللى بيقل ده نظرا لارتفاع سقف العربية , اللى بتاخد مقابل ليه راحة فى الصالون والدخول والخروج فى السيارة
ولو عايز ثبات حط جنط 17 ولكن حياثر على استهلاك البنزين والعفشة حتكون ناشفة جدا , وشوارعنا مينفعش فيها كدا
فكل حاجة وليها حساب , يعنى حاجة مقابل حاجة

ثالثا بخصوص قطع الغيار , اللى انا اعرفه واغلب الناس متفقة عليه ان لما تركب قطع غيار اصلية فى العربية سواء كورى او يابانى حسب العربية اللى معاك ايه , فبتحافظ عليها ,
فاغلب العربيات الكورى واليابانى اللى معدى تمنها 100 الف وبتتعامل مع توكيلها وبتجيب قطع غيارها الاصلية من التوكيل بيكون غالية
فميش حاجة رخيصة ابدا , فكل قطع الغيار الكورى الاصلى غالية , وكل قطع الغيار اليابانى بردوا الاصلى غالية
فمحدش يقولى ان السيراتو وان التيدا غالية , لان الاتنين جوة التوكل غاليين
وبره بردوا فى الحرفين ماليانة استيراد وماليانة مش اصلى وكل موجود وبالاسعار اللى انت عايزه , وكل ما بتجيب اصلى بتعيش اصلى
وكل ما بتستخسر فى العربية وتجيب تيل ب200 جنية حيجر عليك طنابير ووجع قلب وحياثر فى عمر قطع غيار عربيتك

رابعا بخصوص مشاكل فى العربية , الحمد لله تعالوا قسم نيسان وشوفوا هل فى مشاكل كبيرة فى التيدا ولالا , مش حتلاقوا ولا حس ولا خبر والحمد لله
ولافى مشاكل فى فتيس , ولا مشاكل فى عفشة , ولامشاكل فى استهلاك بنزين , ولا مشاكل فى خامات تقفيل ولا مشاكل فى اى حاجة الا حاجات قليلة جدا وبتتحل فى الصيانات, والمشكلة الوحيدة الثبات على السرعات العالية وقولتلكم عليها ليه والحمد لله الواحد بيمشى جنب الحيط والله الغنى على التهور والسرعة الجنونية ونادرا ما بتمشى 160 او فيما فوق فى شوارعنا
وزى ما قولنا قدام كدا بتاخد راحة فى الصالون وعربية ناعمة , وفى السرعات اللى عاوز يشد جامد بتسد معاه لان ماتورها قوى جدا بس فوق 160 يخلى باله
و فى مرة جبت من باب التجربة 180 والله ومشغل التكيف ومحستش الا لما كنت عاوز ازود عن كدا فالقيت التكيف مفتوح وطفيته
وزودت ولما ابتديت اعدى ال185 ولسه فى المدام عندى خافت من السرعة وانا كمان وقولت اعقل احسن

خامسا بخصوص الانتشار طبعا فى صالح السيراتوا ودى حاجة كويسة , بس كل حاجة فى العربية فى التيدا موجود فى الحرفين زى ما قولت وان ابتديت اشوف تيدا فى الشوارع دلوقتى عن زمان , والناس اقتنعوا بيها والحمد لله بغض النظر عن الشكل
وعن اعادة البيع الكل بيتباع , والكل بيخسر فى البيع , حتى اللى معاه سيراتو وده عرف فى السوق , الخربوش بنتلكك عليه وننزل فيه مبالغ , وعن كل سنة بتنزل وعن كل 10 الاف كيلو بتاثر بردوا , وهكذا , ولو محافظ على عربيتك وعلى صيانتها فى التوكيل او ايدك فيها حتتباع وان كان توك توك

ياريت ننقد من واقع خبرة فى تجربة العربية واللى جرب الاتنين ليه الافضلية فى الحديث
واللى مجربش وساق عربية منهم يقول اللى يعرفه عن سيارته فقط , عشان غير كدا يبقا تعصب اعمى وعمر كلامه ما حيكون مقنع
واللى عاوز يجرب التيدا انا تحت امره
والسيراتو عربية ممتازة وكنت على وشك شرائها وكنت حختار جنط 16 منها,لكن صلاة الاستخارة , وربنا هو اللى اكرمنى بالتيدا ,
العربية انا مرتاح معاها جدااااا , ولو دار بيه الزمن حجيب العربية تانى , ولو كان معايا اكتر كنت جبت الفلونس ولو كان معايا اكتر كنت جبت جيتا او جولف
وربنا يوفق الجميع
تقبلوا تحياتى اخوكم فى الله
احمد مصطفى