الموضوع: قسم بروتون هل ممكن يرجع تانى ؟ سؤال بأه صعب اوى يا بروتوناوية

المشاركة الأصلية كتبت بواسطة مصطفى_صديق

باشمهندس أحمد..............معلش أنا هاصدمك شوية بالرد بتاعى

أحييك على صبرك ومثابرتك .....ولكن

أنا بسأل نفسى سؤال دايما.....هل الموضوع يستاهل ده كله؟

أنا رغم حبى للسيارة ....بس عمرى مافكرت انى اخبى عيب فيها ولا ماقولش على تجربة سيئة معاها.....بس الفكرة أن فى عدم الأستيعاب ولا التصديق من زملاء كتير ان العربية مفيهاش مشاكل مع ناس تانية...وكتير......واى كلام غير ذلك يبقى غير صحيح

لازم جميع الاعضاء يعترفوا بالمشاكل الغير موجودة ...والا.....كلنا عارفين هايبقوا ايه

هايبقى حبهم الشديد للعربية خلاهم يتهاونوا فى ذكر المساوئ والعيوب....ويقولوا للناس المميزات بس........... على الرغم من ان القسم بقت كل المواضيع اللى فيه مشاكل ....وبقينا فرجة للاقسام التانية

نرجع للسؤال

هل الموضوع يستاهل؟

الاجابة .....بكل بساطة......لا

ليه لا....وبكل بساطة

لان الجين تو .....عربية....مكونة من الحديد والبلاستيك ...الخ ...الخ........ولو اصبح هذا الكائن (الجماد) سبب لتعرضى لعدم الاحترام من بعيد او قريب من شخص يجلس خلف شاشة الكمبيوتر بغض النظر عن عمره أو مركزه .......هاتكون الاجابة بكل بساطة...لأ ...الموضوع مش مستاهل

يمكن انا من كتر القصص اللى كتبتها على العربية بعض الزملاء افتكرو إنى فعلا مجنون بالعربية او كده....بالعكس...القصص دى كلها كانت كلها ليكو انتو.....من خلال العربية.....يمكن تضحكوا شوية....تستمتعوا شوية....تنسوا همومكو شوية....ده كان الهدف ......لكن للاسف الموضوع اتفهم غلط

انا على الرغم انى بشتغل فى مجال الكمبيوتر .....لكنى مكنتش من هواة المنتديات.....وعمرى مادخلت فى منتدى ولا رديت على حد فى موضوع ولا دخلت فى نقاش مع حد

لكن اللى شدنى للمنتدى هنا...إن الروح اللى كانت موجودة....كانت روح صافية ...محترمة....هادفة

كان فى رسالة.....وبردة من خلال العربية....رسالة فعل الخير ومساعدة المحتاج

وهو ده الفراغ الحالى....مفيش رسالة.....فاصبح الموضوع بالنسبالى مش مستاهل

اذا كان الناس اللى بتساعد.....بتتهم انهم بيخبو المشاكل لانهم بيحبو العربية اوى ومتعصبين ليها....

وباقى الناس بتعمل مواضيع عن المشاكل ( التافهة) اللى لو كلف نفسة ودور فى المواضيع شوية هايلاقيلها حلول....او حتى نزل صلحها فى اى حتة

وبعد كده....شكرا.....طب قول حل المشكلة.....لأ..طب نزل موضوع فيد بيه زمايلك

لعاية مالوضع بقى ايه......مش محتاج اقوله...لانكم شايفينه....

لحين عودة هدف أسمى....ورسالة.....واتجاه عام محترم يسيطر على القسم من غالبية اعضاءه...فا أنا مش مستعد أخش فى جدل مستمر ومحاولات عقيمة مع عقول مش عايزة تقتنع انى مش بخبى عيوب...ولا بشتغل فى توكيل....(الشغل فى التوكيل مش عيب ولا حرام....بس كنت هاقول) و لاباخد حاجة من حد....ولا حبى للعربية هايخلينى اكدب واغش واضلل


للأسف فى بعض الزملاء طلع معاهم مشاكل متشابهة.....وحدث مشاكل مع التوكيل.....ومش بكدبهم ولا باتهمهم بأى شئ.......لكن معركتهم مع التوكيل اتنقلت من التوكيل والقنوات الشرعية .....الى نايل موتورز....واخذوا على عاتقهم....للاسف.....تشويه سمعة السيارة تحت مسمى الامانة والنصح الواجب......وبطرق تتجاوز فى معظم الاحيان الالتزام بحدود الادب فى الحوار والنقاش....نسوا فى نفس الوقت انه من الامانة فى النصح انى مكبرش المشكلة ومحطهاش فى حجم اكبر من حجمها....ونسو أيضا ان احترام الغير ينبع من احترام النفس

مش مستاهل......انا بحب ومعجب بحتة حديد اه.....بس هى فى الاخر حتة حديد....

أنا اسف للكلام ده....بس ده واقع....وانا مش من النوع المتشائم.....بس من النوع الواقعى.....الجين تو انتشرت....ودى ....ضريبة الانتشار.....عقليات مختلفة.....اهداف مختلفة....اساليب محتلفة


كل سنة وانتم طيبين

انا عارف انك زعلان من الوضع بس كله هيتصلح ان شاء الله

المشاركة الأصلية كتبت بواسطة afr80

أنا كمان معاكوا، و نفسي المنتدى يرجع زي زمان، انا فى المنتدى من ساعت ما اشتريت العربية من شهر مارس، و والله العظيم ده اول منتدى اتفاعل معاه، و الاعضاء اللي فى القسم هنا ان حبتهم من غير ما اشوفهم و خصوصا ايمن، و ان شاء الله هتعرف عليهم كلهم زي ما اتعرفت على ايمن، انا مش عارف الناس من كتر ما اختفت الناس الجدعة و الشهمة من الدنيا مش مصدقين ان في حد بيعمل حاجة لوجه الله، و الله ان صممت فى زيرتي لمصر اللي فاتت ان اتعرف عليه شخصيا، و هو جالي من مدينة نصر لغاية 6 اكتوبر (مشوار طويل و رخم و انتم ادرى مني بالزحمة و الحر فى مصر عملين ازاي)، ده واحد جدع والله جدع و ابن ناس و ربنا يبارك لوالديه اللي رببوه التربيه دي فى زمن لم يعد فيه مكان للجدعنة و عمل الخير و بيعمل الخير من غير مقابل و بتغلط فيه كمان، و انا بحب القسم اوي و ان شاء الله هعمل اي حاجة علشان يرجع احسن من الاول، اللي يلاقي كنز زي الناس اللعملت القسم ده ميفرطش فيه ابدا، و بالنسبة للناس اللي سابت المنتدى ارجعو و اتممو ما بدؤته، و تخيلو ان ده بتكم و ان فى مجموعة دخله تخربه، هتسبوه واللا هتدفعو عنه و تحفظو عليه، فى مقوله بتقول "معرفة الناس كنوز" و انتم كنز بغض النظر عن المشاكل اللي فى العربية، ما العربية لو مافيهاش مشاكل عملولها ضمان و توكيل ليه، الناس الجدعة عملة ندره فى زمن قل فيه نوعية الناس دي، شوفو هتعملو ايه و انا معاكم ان شاء الله.

مع تحياتي للبروتونيه

أحمد رشوان

الحقيقة حضرتك جبت من الاخر ايدك معانا يا باشا

المشاركة الأصلية كتبت بواسطة mana_81

it's not a problem that there is no knowledge , the main problem that you haven't any knowledge about this car, just hearing bad gossip from different people not enough to judge or to be fair with this car,
and if you want to rate this car , you have to do statistics ( follow this link to see how this car has good rate ---- proton gen-2 expert car review verdict - bbc top gear )

i’m so astonished how can we hate car in the same time we have it (sound is good )

and think positive , what is the benefit will anyone gain if he said car is sooooo good or not except he tried
nothing else

الصراحة كلام حضرتك جامد جدا جدا نفسى اترجمه

والحقيقه يكفى الجين 2 شرفا انها بتتباع فى انجلترا و لها ترتيب كويس جدا فى وسط العمالقه الكبار فى حين عربيات مغرقة السوق عندنا هنا واغلى من الجين 2 و مش عارفة تدخل السوق هناك اصلا او ترتيبها اقل .

شكرا لمشاركة حضرتك وياريت متبخاش بمشاركاتك معانا ان شاء الله

المشاركة الأصلية كتبت بواسطة tutankhamoun

أستاذ أحمد فتحي .... تحياتي العطرة الجميلة لك و لكل الأعضاء المحترمة ....
و إن شاء الله القسم يرجع تاني زي الأول طالما فيه أسرة محترمة أفرادها ناس زيك و زي أسرة بروتون .

هو التيار كان ماشئ أيجابي أيجابي أيجابي ......... و بعدين تم مقاطعته بمشاركة سلبية ...
الشكوى عمرها ما تكون مشاركة سلبية ............ الأسلوب و العرض و الأتهامات للناس أحيانا هي اللي بتخلي الشئ الأيجابي سلبي ...

طيب أنا فهمت ليه كدا ......



أول موضوع متثبت في المنتدى فيه مميزات و عيوب السيارة بالكامل ( سيارة موديل 2006 ملك للعضو المحترم المختفي الحسيني)

بقية كلامك في أتهامات تانية و ده غير مقبول و مش هارد عليه ....

بس واضح أن التاريخ محدش بيتعلم منه و هاقتبس جزء من كلام الأستاذ أحمد



واضح أن أنت عندك مشكلة في العربية ........... عادي ممكن تحصل و محدش يقدر يكب حد و ياما ناس عرضت مشاكلها و دخلنا نفكر معاهم لحل في العربية و ياما الواحد تعب و عملت أتصالات تليفونية علشان يساعد الناس
محدش حجر على حق حد في اظهار مشكلته و محاولة الوصول لحل .

و الأدهى بقى أيمن
أيمن اللي ساكن في أخر الدنيا و بيكلم الناس في تليفونه و بينزل من بيتهم للتوكيل مرات كثيرة و على حسابه علشان يساعد الناس

و مع ذلك ........ لما عمل حادثة عربيته قعدت في التوكيل مدة كبيرة و كأنه بني آدم أقل من العادي و الراجل عمره ما أشتكى و عمره ما شتم حد و عمره ما أتهم حد بأي شئ .
لأن كل شئ له حدود ( يعني السلبيات لها حدود و الأيجابيات لها حدود )

أنا معرفش حجم مشكلتك و معرفش أزاي حاول والدك (مالك السيارة ) أنه يحلها ......
و لكن كل هذا لا يعطيك الحق في أتهام أي حد أنه بيدافع عن العربية لمجرد الدفاع و بيستميت و بيكذب على الناس و بيخبي مشاكلها

على فكرة حاجة تانية محدش يعرفها خالص
أنا أمتلكت عربيتين جين 2 و الأثنين مفيهومش الهوا و الحمد لله ..........
يعني أنا واحد من الناس بتكلم عن تجربة طويلة مع العربية كماركة و مع الموديل نفسه و من سنة 2007 لغاية النهاردة .

كان لازم أرد لأن الكلام أستفزني لأني حسيت أني واحد من الناس المتهمين بالكذب و التضليل .

يلا يا شباب بروتون

عايزين أيونات موجبة تلف المنتدى و القسم و عايزين نطرد أي أيونات سالبة

اللي عنده مشكلة و عايز يعرضها ده هو أساس وجود المنتدى هو عرض المشكلة علشان نلاقي حل لها


زمان مرة واحد صاحبي قالي عايز أشتري كمبيوتر ( كان اللاب توب مش منتشر ) الكلام ده سنة 1997 .....
المهم نزلنا مع بعض و أنتقانا بعض القطع علشان أركبها للراجل ....

المهم في شركة الكمبيوتر البائع كان عايز يبيع لصاحبي سي دي روم من ماركة من معينة كانت وسط و بتبوظ بسرعة و طبعا كان عايز يخلص منها .
المهم أنا صممت أني أشتري لصاحبي ماركة أفضل و كانت أغلى بقليل .
و بعدين مفيش أسبوع و السي دي روم باظ ..........
لقيته بيقولي أنت السبب الراجل بتاع الشركة كان عايز يديني حاجة أحسن ( طبعا صاحبي ده الكمبيوتر بالنسبة له زي علم الطاقة الذرية لي ) ..... قلتله خلاص هاغيرهالك على حسابي و انا أخد البايظة أتصرف فيها ....( أنا قلت أشوف الضمان )

لما صاحبي نزل لوحده يسأل من ورايا ......... كل الناس قالتله أن الماركة أللي أنت أشتريتها هي الأفضل و لكن حظك وقع في قطعة معيبة ...... و في النهاية تم تصليحها في الضمان ....... رفضوا التغيير !!

من ساعتها قلت مش هاقترح على حد حاجة علشان فيه ناس عقولها تصورلها أن الأقتراح ده لو مكنش ناجح بنسبة 100 % يبقى صاحب الأقتراح هو المسئول و هو اللي لازم يتحمل قراراه ...
مع أني ساعتها أقترحت على صاحبي يشتري بسبب خبرتي و بسبب أني مجرب و فاهم الحتة دي كويس .

و صاحبي بعد ما فهم الموضوع كويس ...... أعتذرلي و قالي آسف و كتر خيرك اللي ضيعت وقتك معايا و جمعتلي الكمبيوتر و كمان ببلاش و كمان فوق ده كله كنت خايف على فلوسي و بتنصحني .... و مع ذلك أتهمتك و أتنرفزت لما السي دي روم باظ ...

كلنا ممكن نغلط في الحكم على الأشياء و على الناس
و لكن خيرنا ....................................... من يُصحح نفسه و يقعد يفكر ..... ما يمكن أنا اللي حظي وحش .... و بتحصل في كل الماركات و في كل الأشياء ....

يلا عايزين فكر ايجابي و نطر الفكر السلبي
نعرض مشاكلنا ( عرض المشكلة شئ أيجابي ) و لكن بدون ما نتهم حد و بدون ما نغلط في حد .

والله ده شرف ليا يا باشا مشاركتك معانا فى موضوعى ولتانى مرة

الصراحة يا استاذ توت مع انى لم اتشرف بمقابلة حضرتك لغاية دلوقت بس مشاركات حضرتك القيمة بتخلينا نحس انك معانا على طول .

انا معاك يا استاذ توت وان شاء الله مستنيين مواضيعك اللى دايما كانت فى الجون ومشاركاتك اللى خلت ناس كتير اوى تشترى العربية اعجابا بيها وبشخص حضرتك الكريم .

بجد حضرتك قيمة كبيرة معانا ولا يمكن فقدها واكيد هنخسر كتير لو حضرتك والناس اللى زيك بعدوا عن القسم

ومعاك فى نشر كل القيم الايجابية وطرد كل السلبيات

تحياتى

المشاركة الأصلية كتبت بواسطة مصطفى_صديق

ممكن أكون لسه مضايق من الوضع.....بس انتو صح.....وأنا غلط....... طالما فيه ناس زييكو لسه هنا.....يبقى لسة فى أمل ان روح القسم ترجع تانى واحسن من الاول كمان

معاكوو ان شاء الله نرجع عيلة واحدة.....

يا باشمهندس حضرتك ما ينفعش تسيبنا

ولا اسلط عليك بتوع الرحاب2 والموضوع يخلص كمان 6 سنين هاهاهاهاها

مستنين مواضيعك يا باشا

المشاركة الأصلية كتبت بواسطة eng. Rafy samy

موضوع رائع وأراء بنائة
قد يكون هذا الموضوع هو بدء الرجوع للعهد الذهبي لبروتون
اشكركم جميعا على روحكم الإجابية.

تقبلوا تحياتي جميعاً وفي انتظار التغيير " معاً سنغير "

باشمهندس رفيق

انا عارف ان حضرتك من الغيورين على القسم والحقيقة كلنا مستنيين مواضيع حضرتك اللى اكتر من مفيدة وان شاء الله الاسلوب القديم فى الحوار بيك وبينا هيختفى ان شاء الله

المشاركة الأصلية كتبت بواسطة waleedfesal

الله ينور عليك يا باشمهندس احمد
الموضوع عايز تكاتف كل الناس اللى بتحب العربيه
مش بس القدام
لا
والناس الجديده برضه
لازم الكل يشارك بافكاره وخبراته لتعم الفائده
ويا ريت لو فى مقابله جديده نتفق عليها
وتكون قريب ان شاء الله

مستنين مشاركاتك ومواضيعك يا باشا وانا معاكم فى اى مقابلة ان شاء الله

باشمهندس احمد

انا اول لما شفت الموضوع قعدت اقراه مره و اتنين و تلاته و كنت هرد و ردي ان الفسم هيرجع تاني و كان هراهن علي الناس الحلوه المحترمه اللي بتعرف تدير حوار هادي يستفيد منه كل الاطراف

ولكن قلت ان الناس ديه هترد و ترجع و رجعها هيكون احسن دليل علي ان بروتون اجدع ناس

لما Eng. Rafy Samy
ا/ خالد
هيثم
توت عنخ امون
mido_soliman
Tarek Gen 2
m.3abdel3al
M.almaghraby
أبومريم
مصطفى_صديق

يرجعوا و يتكلموا و تعليقاتهم الجميله ترجع تاني يبقي بروتون اجدع ناس و سمحوني في الترتيب او لو كنت نسيت حد

بس انا ليا نقطتين عاوز اتكلم فيهم

الاوله ان اي حد و انا اولهم بيكون عنده مشكله مع العربيه و او مع التوكيل بيحس ان العربيه اوحش عربيه و التوكيل ملوش اي لزمه و يا سلام لو سمع ان واحد كمان عنده نفس المشكله يتخيل انه عيب صناعه و التوكيل بيدحك علي الناس

العربيه مش بتتباع في مصر بس و لكن غي اماكن كتير في العالم لما اكون انا منحوس او معملتي وحشه مع الناس و اتخنقت مع التوكيل او حد من الاعضاء و العربيه مش عجباني بعها يا اخي و استريح

زي ما الناس كلها قالت العربيه ليها مميزات و عيوب و معروفه بالكامل و التوكيل كمان و في نفس الوقت العربيه كقيمه ماليه صفقة هيله باجماع معظم الاعضاء

ثانيا المنتدي ساحت نقاش و عرض وجهات نظر " بكل احترام" و خبرات و لما اتعارض مع حد من الزملاء اعرض وجهت نظري بقوه بدون التهجم علي وجهة النظر الاخره

واحد يا اخي شايف انه يقارن الجين2 بالمرسيدس احترمه و اقدره خصوصا لو المقارنه موضوعيه هو حر عاوز اوضح و جهة نظري الخاصه ماش

انما اصله بصلي شد معايه خيطني الكلام ده بره المنتدي الاحترام المتبادل اساس العلاقه بين الناس في المنتدي

اسف لو كنت اذكر اسماء و لكن اعتقد ان اصحابه هيقدروا ويفهموا قصدي

محمد عبد العال شاب اصغر مني بعشر سنين و علقتي بيه جوه و بره المنتدي اكثر من رائعهو مش انا لوحدي و كمان ابو مريم
فعلا محمد شاب محترم و خالوق و موضوعاته و ردوده الناس كلها بتحبها "خصوصا لما يعمل دكتور ربني يستر"

و مأدرش مأذكرشي إيمن اخ مش صديق و مش ليه انا لوحدي "بالمناسبه ادعوله عشان الجيش" انا لو فيه اي حاجه اقدر اعملهاله الله اعلام مش هستني يطلبه لانه مش هيطلبها اصلان ايمن مش بس بيراعيني و يسعدني في العربيه الراجل في كل مناسبه تلاقيه موجود و بيساعد

يا اخي ده الواد سلمان ابني و هنا احمد و باسل مدحت و العيال كلها عرفاه و بتحبه من كتر ما بيشفوه و يجبلهم لعب و هدايه ولله لو قعد اتكلم من هنا لحد اتنخابات مجلس الشعب "ده اخري " مش هكفيه حقه


كفايه كده نيجي للتطبيق

اولا المنتدي لنقل الخبرات و التجارب و عرض وجهات النظر

اي خروج عن النص برجاء عدم الرد او التعليق و كائنه ما كان

ثانيا الموضوعات الجيده فين يا توت و ان شاء الله كمان هنرتب شويت حاجات جديده و مفيده للملاك الجداد

ثالثا يا ريت نشوف الناس كلها في اقرب مقابله و نتكلم براحتني


اكيد فيه امال يا ابو حميد و ان شاء الله و هتشوف