كلمة ونص-20-3-2008

**sab3aawy** · 20-03-2008 12:49 PM

اثناء انحشارى بسيارتى (ريجاتا 85 نبيتى) فى زحام حى المهندسين بالأمس وفى لحظة توقف تام للحركة انشغلت خلالها فى التفكير فيما سأكتبه فى "كلمة ونص" اليوم حدث موقف اراه غريبا الى حدما، فخلفى على اليمين كان يوجد فارس من ابطال تسليم الوجبات الجاهزة يعتلى صهوة جواده من طراز الباجاج الهندى،حاول العبور من المساحة الضيقة جدا الموجودة بينى وبين السيارة المركونة على اليمين بجوارى، وبعد ان وصل الى منتصف المسافة وجد اعاقة ضخمة لمسيرته تتمثل فى مرآة سيارتى اليمنى (لسة مركبها من اسبوع بعد ما البواب كسر لى السابقة اثناء معركة الغسيل) ، نظر للمرآة للحظة ، ثم بمنتهى البرود-وبدون كلمة واحدة-راح قافل المراية بتاعتى وهو ينظر الى نظرة خاوية من داخل خوذتة المعدنية، انا بصراحة معرفتش انطق لاننى اصابنى ذهول لحظى من هذا القدر من الإقتحام والبجاحة، لكن على ما فقت ونزلت من السيارة لأفتح المراية المغلقة كان الفارس قد طار على حصانه النارى

كلما تصورت اننى رأيت سقف البجاحة فى بلدنا اكتشف ان هناك افاق جديدة للبجاحة يتم الوصول اليها يوميا

**Xpert** · 20-03-2008 12:55 PM

انت لسه شوفت حاجه ... اللي جاي احلي ...

SS · 20-03-2008 01:02 PM

معلش يا استاذ سبعاوى بس للاسف بقيت البجاحة سمة اساسية عندنا يعنى المشكلة مش اننا بنعمل الغلط بس لأ ده بنعمله بكل وقاحة و برود وكأنه حق مكتسب.. و ربنا يتوب علينا من العالم ديه.

**PRO-DRIVE** · 20-03-2008 01:28 PM

لوووووووووووووووووووووووو وول

قوول الحمد لله انو مكسرهاش ههههه

ربنا يعنينا :)

**cpt_shawky** · 20-03-2008 01:30 PM

المشاركة الأصلية كتبت بواسطة sab3aawy

وهو ينظر الى نظرة خاوية من داخل خوذتة المعدنية،

:D:D:D:D:D:D:D:D:D:D:D:D

**tutankhamoun** · 20-03-2008 01:32 PM

يتحول الشعب المصري تدريجيا و خصوصا سكان القاهرة الكبرى
إلى شعب عديم الإحساس ......... بجح .......... بارد ......... تلم ........ منعدم الضمير ........ و كل ما تتخيله من صفات سيئة

و تنسحب الصفات الحميدة من مجتمع المصريين تدريجيا كأنها ملت من حالة البرود و البجاحة التي يتمتع بها الناس

و كل شئ أصبح عادي جدا و ممكن واحد يحك سيارتك و يجري زي البقرة و لا كأن شئ حدث

-------------
و الحمد لله إن المرايا سليمة و مكسرهاش على رأي أخونا بورت ;)

**memo_hefnawy** · 20-03-2008 02:14 PM

والله يا سبع أنا الأيام إللى فاتت دى حاسس إنى مع الضغوط اليومية المتاولبة فى الشغل و الحياه و الشارع بدأت أشعر إنى هاتحول لوحش ذى أى متخلف فى الشارع

بدأت أحس إن مع العصبية و الضغط الكثير الواحد بيخرج عن شعورة كثير أوى

طوول اليوم فى الشغل تليفونات و إيميلات و طلبات تنهمر من كل مكان فوق راس الواحد و كل حد عايز شغله يخلص فى التو و الحال تنزل من الشغل تلاقى بقر راكبين عربيات و كلاب ضاله تعبر الطريق (همه مش كلاب بس بيقلدوا الكلاب فى طريقة العبور) و فرسان راكبين فيسبات (الطيارين) و غيلان راكبين مينى باصات و باصات كبيره و مساطيل راكبين تاكسيات و قول ذى ما تحب على الملاكى للصبح و الميكروباص

طبعا أنا بواجه كل ده بعد متوسط من 10 - 12 ساعه شغل أمام شاشة المحروق الكومبيوتر و مع رنين التليفونات المتواصل مع ركبة يمين بتنقح عليك من السواقة مع صداع من زحمة و ضغط الشغل

بدأت أحس إنى بتحول لوحش ممكن يدوس أى حد يرخم عليه فى الطريق إنت عارفنى بطبعى مش بستحمل الإستهبال بتاع الناس أو البرود و مش بطيق حد ياخد حارتى منى بالعافية أو بطريقة رمى البوز أو الزلومه فمع التغيرات دى بقيت سواقتى ذات طابع عنيف أكثر و هجومى أكثر - آه مش برخم على حد بس بقيت حاسس إنى علاطول عصبى ممكن أنزل أرمى واحد من فوق الكوبرى لو زنق عليا ممكن أتخانق من أقل حاجة ممكن ممكن ممكن أى حاجة

بجد الحياه بقت تقرف ما بين المهندسيين لمدينة نصر

**ابو سيف** · 20-03-2008 02:18 PM

طيب دة كان طيار محترم جدا انه قفل المرايه

انت زعلان يعني علشان مقالكش قبل ما يقفلها؟؟؟ دة انتو حاجة غريبه اوي .... الراجل كتير خيره لما بص للمرايه اختارلك الصح و قفلها بدل ما كان يكسرها

انت عارف لو كنت نزلت زعقتله؟؟... كان ممكن يرد عليك بمنتهى البجاحة و يقولك مش بدل ما تتكسر؟؟:) و دة حقه المكتسب الراجل عايز يوصل الاكل سخن للزبون :)

و في الاخر بعد كل اللى بنشوفه من الطيارين يا ريتهم بيجوا بدري و لا بيجيبوا الاكل سخن بصحيح :d :d

الا هوا صحيح سموهم طيارين ليه؟؟ :d

على فكرة يا باشمهندس سبعاوي انت معتقد ان الاخ دة كان ممكن يعمل ايه كويس و محترم عشان انت تحس انه عمل الواجب فعله؟؟؟ انه يستأذنك و يستنى لما تسمحله و يقفلها و يكون بأسلوب مهذب طبعا؟؟؟؟
لو هوا كدة فعلا يبقا انسى ......
احب اقولك انه يستحيل اصلا يجي في دماغ هذه الفئه الموضوع دة و صدقني قد تكون الاكثر حظا و سعادة في جمهوريه مصر العربيه لو بس كان قبل ما يقفلها و يمشي يقولك انا هقفلها و يقفلها على طول دون النظر على رد فعلك او انه يقفلها و يبتسملك بكل بلادة و تناحه و يمشي بردو :)

و يجعله عامر

**Ayman_Abdullah** · 23-03-2008 05:00 PM

هههههه
ياعم سبعاوى فعلا والله ده حصل معايا من كام يوم نفس الموقف
بس الصراحة انا مكنش فارق معايا لأنى مبستعملهاش أصلا:d:d

**محمد ابراهيم 1** · 24-03-2008 12:55 AM

المجتمعات غير الديموقراطيه والتى يشعر الناس فيها أنهم غرباء ولا يأخذون حقوقهم يضعف لديهم إحساس المواطنه والذى بدوره يسبب حاله من عدم الإكتراث نتيجه إنفصال الناس عن المشاركه السياسيه وصنع القرار
فعندما تذهب للإدلاء بصوتك ويتم منعك من الدخول أو تزور الإنتخابات فيتولد لديك شعور تلقائى بالكراهيه تجاه هذا الوطن

يغذى ذلك الشعور ما نراه من تقدم وحريه وقدره على محاسبه المسئولين فى الدول الاخرى ونلاحظ اهتمام المصريين بالإنتخابات فى دوله اسرائيل وذلك لإحساسهم أنها دوله حره يأتى الرئيس فيها بأصوات الشعب
وأعتقد ان المصريين عندما يحصلون على حريتهم سوف تجد شعبا آخر بتصرفات راقيه

الموضوع: كلمة ونص-20-3-2008

LinkBack

أدوات الموضوع

عرض

كلمة ونص-20-3-2008 - انشر الموضوع فى :

-

-

-

-

-

المواضيع المتشابهه

(:@:)كلمة ونص 16-4-2008

(:@:) كلمة ونص 8-4-2008

(:@:) كلمة ونص-24-3-2008

(:@:) كلمة ونص-22-3-2008

(:@:) كلمة ونص-18-3- 2008

الكلمات الدلالية لهذا الموضوع

المفضلات

المفضلات

ضوابط المشاركة