الموضوع: دراسة لاتخاذ قرار شراء الرينو لوجان 2011 ارجو التعاون .

المشاركة الأصلية كتبت بواسطة shbahaa

السلام عليكم ورحمة الله وبركاته...

شكرا لحضرتك علي اهتمامك وباقي الاعزاء الذين تفضلوا بالمشاركات الكريمة فقط اسمح لي اعلق تحت ملاحظات حضرتك باللون الازرق ويستمر النقاش المفيد للصالح العام للجميع

اسعار قطع الغيار في التوكيل غالية وغير متوافرة ولايوجد قطع غيار خارج التوكيل ولا استيراد مستعمل

• بالنسبة لي الحمد لله لسه ما احتجتش لحاجه فا بالنسبة لي ما عنديش رد عليها بس من الملاحظ ان العربية انتشرت وفيه ناس كتير بدأت تجيب عنواين محلات قطع غيار.
• اتمني وربنا يحفظنا جميعاويحفظ سياراتنا ولانحتلج لاي قطع غيار
  
• سخونة دواسة البنزين والزنة الواضحة المنتقلة من الموتور الي الي الاقدام الملامسة للدواسة
• بصراحة انا ما حسيتش بالموضوع ده نهائي ويمكن ما ركزتش فيه وده عيب انك تقعد تق{ا عن المشاكل كتير انك حا تبقى مركز زيادة مع العيوب بحيث انك حتى لو العيب مش موجود الواحد ممكن يتوهم انه موجود.
• موضوع السخونة 2 اعرفهم اكدوا وجوده بسبب فتحة المواسير الساخنة وتحتاج لعازل حراري وممكن التوكيل يعالج المشكلة دي ويمكن يكون تلافاها في 2011 الله اعلم اتمني
  
• صوت الموتور خشن وعالي نسبيا
• الكلام ده فعلا كان موجود اول ما اشتريت العربية بس اختفى تماما مع الاستعمال..
• منطقي صوت الموتور يهدا مع العربية من الزيرو بعد شوية استعمال وتغيير زيت الموتور لتوع كويس حصل معايا عن تجربة في ماتركس 2005
  
• عدم امكانية فتح تنك البنزين والشنطة من داخل السيارة
• بالنسبة لتانك البنزين دي حاجه يعني فيها مصلحة شوية انك عشان تفتحه لازم تطفي العربية وده اللي بعض محطات البنزين بتطلبه منك وانت داخل المحطه اثناء التموين.. فا مش مشكلة قوي انك تطفي العربية وتدي للراجل المفتاح.. مش متعبة يعني... اما بالنسبة للشطنه فهي كده كده بتقفل مع السنتر بتاع العربية فا يعني انت لو فتحت السنتر اللي واقف بره حا يقدر يفتح الشنطه بمجرد الضغط على الزرار بتاعها من بره فا تعتبر يعني انت برده متحكم فيها من جوة العربية مع السنتر.
• معقول ممكن التكيف مع الوضع كده ماهو احنا في عربياتنا القديمة لم يكن ذلك موجود وكانت الامور ماشية
  
• عضة في نقلة المارشدير في الفتيس
• الكلام ده ما ظهرش معايا صراحة.
• ممكن علاجه يمكن اللي ظهر معاهم الفتيس محتاج صيانة او تزويد زيت او اي ضبط ميكانيكي
  
• دواسة البنزين ممكن تعلق (تضغط عليها ولا ترجع مكانها ثانية)
• الكلام ده ما ظهرش معايا صراحة ولو فيه حاجه زي كده يبقى اكيد ممكن من الدواسات اللي محطوطه ولا حاجه لان صعبة قوي انها تحصل عشان التصميم تحت الدواسة صعب جدا انها تحصل.
• 
  ممكن علاجه يمكن اللي ظهر معاهم محتاج صيانة او تشحيم الدواسةاو اي ضبط ميكانيكي
• يلزم ضغط دواسة الدبرياج لاخرها ليتم النقل واثناء النقل صوت عالي وتكسير عند التعشيق للتروس.
• بالنسبة للضغط على الدواسة دي مسألة تعود اما صوت عالي والكلام ده مش موجود اطلاقا.
• اكيد مسالة تعود ولو انها مرهفة شوية للقدم اليسري
  
• باور الدركسيون تقيل (كأنهاهاف باور )
• مش تقيل لدرجة الهاف باور يعني انا شايفه معقول.
• انا سقتها بنفسي وكان تقيل فرق كبير عن الالنترا والبيجو 308 اللي هما باور كهرباء وعن اللانسر والكورولا اللي باور ناعم جدا وخفيف وكل العربيات دي سقتها .
  
• ارتفاع الشنطة وصعوبة ركن السيارة (وهل هذا العيب مؤثر علي الرؤية في المشي للسيارة)
• الشنطه فعلا مرتفعه واحيانا بيكون صعب الركن لكن باستخدام المرايات الجانبية في الركنة بتقدر انك تركن مفيش مشاكل لكن العيب ده مش بيأثر على الرؤية في المشي ولا حاجه خالص... وفيه بعض الناس في المنتدى هنا اقترحوا انك تركب بارك سينسور وده حا يحل لك مشكلة الركنة نهائيا..
• مش متخيل مركنتش عربيات شنطتها عالية اوي الا الكورولا 2007 وكنت بتعامل بشكل معقول جدا الموضوع ده بالنسبة لي مع اللوجان محتاج تجربة ركن واشوف اقول لكم
  
• صوت تكتكة صاجه فرن الشكمان والعربية ساخنة عند تبطيل المحرك
• الكلام ده ما ظهرش معايا صراحة.
• ممكن علاجه يمكن اللي ظهر معاهم محتاج صيانة اوربط افيز العلبة او اي ضبط ميكانيكي
  
• سعر اعادة البيع ضعيف (ملهاش سوق في المستعمل بحالة الجديد)
• انا وجهة نظري ان سعرها حا يكون كويس خاصة مع انتشار العربية لان الانتشار هو ده اللي بيخلي سعر اعادة البيع عالي لانه بيكون دليل على نجاح العربية.
• اكيد لو انتشرت كتير هيحصل تحسن ملحوظ لاسعار قطع الغيار وسعر اعادة البيع لكن زي ماقلت ثالث موديل 2009 2010 و2011 ولسة مش عايزة تنتشر
  
• صناعةروماني وتقفيل مغربي وصاجها بيطبق بسهولة شفت كذا سيارة لوجان صاج مطبقوالعمر الافتراضي للروماني وصناعة السيارات والمكونات الروماني معروفةتكنولوجيا قديمة وتجربة النوفا داتشيا القديمة اللي نزلت تاكسيات من اكثرمن 10 سنين في السوق المصري لم تكن مرضية ابدا
• مش حاقدر افيدك في النقطة دي لاني ما جربتش الحمد لله الموضوع ده.. بس اللي اقدر اقوله ان كل العربيات الجديدة دلوقتي تقريبا صاجها بقى ضعيف..
• وزنها كمان خفيف وتكنولوجيا سيارات اوربا الشرقية زي البولونيز الفديم والاليكو والنوفا داتشيا والاسكودا القديم فيفوريت طابعها معروف تكنولوجيا قديمة وتجربة النوفا داتشيا القديمة اللي نزلت تاكسيات من اكثرمن 10 سنين في السوق المصري لم تكن مرضية ابدا
  

• مكان الكلاكس في دراع الاشارة وصعوبة استعماله في ملف او اثناء تشغيل الفلاشر وصوته السئ والمزعج جدا زي السيارات الاجرة.
• الموضوع ده مسألة تعود وانا مش شايف ان فيه صعوبة في التعامل معاه اطلاقا.. وموضوع الصوت المزعج ده برده مسألة زوق.. واحيانا عندنا هنا في مصر بتحتاج ان انت تركب زمارة عربية نقل عشان اللي قدامك يسمع ويتحرك.
• اكيد تعود بس لو بتركب معاها عربيات تانية تنزل من اللوجان لاي عربية تاني تكون متلخبط شوية
  
• مكان ازرار الزجاج الكهربائي بعيد عن الابواب وفي مكان صعب التعامل معه خصوصا الزجاج الخلفي
• اماكن فتح الزجاج هي نفسها اللي موجودة برده في عربيات سيتروين ( C3 ) تحديدا يعني اعتقد الفرنسي كله كده والله اعلم..
• مش مشكلة خالص دي انا قلت عادي
  
• السي دي الاوديو بدون ام بي ثري mp3
• ممكن برده الموضوع ده ما يفرقش مع حد خاصة لو انت مش من النوع اللي بتسمع اغاني ولا حاجه .. اما ابسط حاجه ممكن تعملها تجيب FM Transmitter وتحطه على الولاعة و تشتري دماغك.
• انا بقول كده مش مشكلة مع اف ام الولاعة اوحتي عمل اسطوانات اوديو ويعوض ده الصوت المحترم والاربع سماعات
  
• وجود فرق بين فتحة الباب والسقف لايوجد جلد حماية يعرض السيارة لدخول اتربة واوراق الشجر.
• الكلام ده صعب انه يكون موجود لان لو كده يبقى التكييف عمره ما حا يشتغل عدل
• ممكن الخراطيم او الجلد ردئ شوية ولايمنع نزول اتربو او ورق شجر عند غتح الابواب
  
• لايوجد بلاستيك فوق الزجاج يركب عليه المساحات الامامية.
• مش فاهم النقطه دي صراحة ايه المقصود بيها ..
• لو نظرت لاسفل الزجاج الامامي لاي سيارة يوجد فبر مركب عليه المساحات غير موجود هنا في اللوجان
  
• مفتاح تغيير ارتفاع المصابيح الامامية وايرشداد مثل فرامل الدراجات وليس موتور
• انا مش عارف حا تفرق في ايه...؟؟ المهم الوظيفة.. وانا شايف انها وظيفة ممتازة جدا وبتنفع جدا خاصة في السفر.. وده حاجة بتغنيك نوعا ما عن الفوجات..
• مش مشكلة عادي بس مختلفة بس عن كل السيارات
  
• المناورات والغرز علي السرعات العالية بتعوم بشدة علي السرعات فوق 120
• هي مش بتعوم .. هو اللي اقدر اقوله لك ان العربية خفيفة شوية بمعني ان لو عربية نقل كبيرة ماشية بسرعه عالية ولا حاجه الهواء بتاعها بيبقى جامد شوية فا تحس ان عربيتك حد زقها بس بتقدر ببساطه جدا انك تتحكم في عربيتك.. يعني انت لو ما عملتش اي رد فعل للحركة دي حا تلاقي العربية ولا كأن حصلها اي حاجه...
• وزنها الخفيف اقل من الف كجم ممكن هو السبب ولما بتبقي مركب 3 او 4 محمل بتثبت اكتر علي الارض بدون لعب وممكن عشات ارتفاعها السقف عالي شوية
  
• تكييف متوسط الاداء والبرودة.
• انا لا اتفق على هذه النقطه لان التكيف بجد انا احيانا بسقع منه واوطيه جدا واحيانا كمان اطفيه شوية... بس هو في نقطة بسيطه حصلت ويمكن تكون هي دي المشكلة .. انا كان عندي التكيف في الاول بيشتغل ويفصل لوحده خاصة في الحر... بدون ما يوصل لدرجة التبريد اللي تخليه يفصل وكنت بحس بالموضوع ده قوي وانت ماشي لان بيفرق في سحب العربية اول ما يشتغل يخلي العربية تتأخر شوية واول ما يفصل الاقي العربية جريت مني والكلام ده تحديدا كان بيحصل في الحر والصبح بس لكن بليل ما كانتش بتحصل.. فا اول ما وصلت لصيانة ال 5000 قلت لهم على الموضوع ده قالي دي حاجه بسيطة وحا نظبتها وفعلا الموضوع ده اتظبط من التوكيل... والتكيف بقى تلاجه والعربية بقيت ماشية تمام.. فا لو فيه عندك اي مشكلة في التكيف بلغ بس عنها وانت داخل على اي صيانة..
• هو الاوربي اقل من الياباني والكوري عن تجربة في الفيكترا والبيجو بالقارنة بالياباني فرق كبير

اتمنى اني يكون كلامي ده في فايدة للناس بناء على تجربتي الشخصية... وشكرا..
اكيد فائدة عظيمة وجزاك الله خيرا

المشاركة الأصلية كتبت بواسطة zkralla

؟؟؟؟؟؟؟؟؟؟؟

ده انا زهقت من كتر اللوجان فى الشارع !! و للعلم العربية ثباتها مقارنة بقى بكل العربيات اللى فى فئتها او حتى اغلى زى النيو تكسنت .. اللوجان ثبات اكتر بكتييييييير جداً

www.nilemotors.net
لا يوجد توربيدو (البلاستيك الأسود) خلف الكابوت تحت المساحات (كما بالصورة):