امبارح وبما انه كان يوم اجازة طلع في دماغي اغير مياه حوض سمك الزينة بتاعي
وبما اني ماغيرتوش من الشتاء ونتيجة تكون الطحالب قررت اني اغيرة كله
وكنت عامل حسابي العملية ماتخدش اكتر من ساعة عشان نقص الاوكسجين وتغيير درجة حرارة المية بيموت السمك وبعد ما فضيت ونضفت ولسه هاملى الحوض هووب المية قطعت هووب اتاري الماسورة العمومية بتاعت العمارة اتكسرت والناس بتصلح فيها لمدة 4 ساعات
هووب ثلاثة ارباع السمك مات مع محاولة التنفس الصناعي الفشلة
وبما اني بكتئب لما الحوض بيفضى خاصة مع اقتراح العديد من الاصدقاء اني اربي فيه كتاكيت اهو حاجة افيد من السمك خاصة مع محاولات بيدو وكنزي المستمرة للنيل منه
صدعتكم بمقدمة طويلة عريضة مالهاش لازمة
خدت بعض وقبل ما اروح لوادتي النهاردة نزلت سوق السيدة عائشة لتجارة حيوانات الزينة واسماك الزينة لانه ارخص بكتير من استهبال المحلات
وانا واقف ومندمج وببص على الاحواض وانقي السمك اللي انا عايزة واختار اللي صحته كويسة
لفت نظري واحد ماشي بكيس كبير في مية وبيلف على كل بياع شوية ياخد منه سمكة او اتنين
وجه الدور على البياع اللي واقف انا عنده وبيقولة باللفظ (حتتين سمك للنقطة)
وهووب لقيت سمكتين طارو من الحوض دخلو الكيس الكبير
مع اني ناصح وصايع قديم مفهمتش كويس وبحسبة واحد بيلم سمك ينقط بيها واحد في فرحه(شوفتوا السذاجة)
فلفت نظري وجود انواع غير متجانسة في نفس الكيس(الكبير) والانواع دي كفيلة بافتراس بعضها البعض لو اتحطوا سويا
فقلت لصاحب الكيس دول كدة هايقطعوا بعض فبصلي بصة ان مالكش دعوة
فالبياع غمزني فسكت وبعد مامشي بقول للبياع ايه الهبل ده
قاللي اصل ده البية الظابط الجديد بيعمل حوض سمك لخطيبتة وده السمك اللي هايكون في الحوض
والحوض نفسة طلع بنفس الطريقة وكل معداتة
وطبعا الامر ما يخلاش من قفص عصافير لاخت خطيبتة وبغبغان لام خطيبتة لان جوزها اصيب بالخرس المنزلي من بدري وحاجات من دي
بجد بجد بقيت ماشي بكلم نفسي والناس بتقول عليا مجنون
حتى سمك الزينة يا بلد