طبعاً و قبل اي شئ الف مبروك, و ربنا يديك خيرها و يكفيك شرها...
اسمحلي اعلق على نقاط تقييمك للعربيه بحكم تجربتي الشخصيه...
1- التكييف كويس جداا, و الاداء هيتحسن اكتر بعد الـ5000 كم...
2- العفشه بالفعل ناشفه, لكن ماتقارنهاش بالافيو اكيد, جرب تركب سيراتو الشكل القديم
و انت تعرف لانهي مدى عفشة النيوسيراتو ناشفه و ده ليه اسباب طبعاً و هي...
- المساعد قصير
- نظام تعليق خلفي تورشن بيم
- الجنط الـ17 (لو انت Sx بجنط 17)
3- موتور النيوسيراتو قوي بشكل ملحوظ فعلاً, و لما تفتح الموتور هتلاقي سحب الـD
بقى زي الستيبترونيك و ممكن افضل كمان, و الاستجابه اسرع (و ده الوضع اللي كان عندي بعد التفتيح)...
4- احساسك بعدم ثبات العربيه على الدائري تحديداً ده بسبب الفواصل اللي فيه, و اللي بتخلي
العربيه تفقد توازنها نسبياً مع كل فاصل بسبب ارتفاع العجل الخلفي عن الارض و فقده للاحتكاك
بالاسفلت, و ده بسبب نظام التعليق بردو... على عكس المحور اللي بلا فواصل و بالتالي هتحس
العربيه قمة الثبات... بس على طريق سليم و ممهد و متسفلت بشكل محترم و مافيهوش مطبات هواء...
5- استهلاك البنزين المفروض يتحسن بعد الـ1000 كم بشويه, يعني ممكن على 2000 كم مثلا
تبدأ تحس باختلاف, و مش لازم تكون من ضمن الناس اللي عندها مشكله في الاستهلاك, لان انا
واحد من الناس ماكانش عندي مشكله في الاستهلاك, لكن في ناس كان عندها, و بالتالي الموضوع نسبي.
6- الـABS ممكن يبقى ميزه, و ممكن يبقى عيب, و على حسب استخدامك ليه ازاي... و بمعنى
ممكن جداا تكون في موقف مش محتاج فيه انك تفرمل جامد و (تفادي) في نفس الوقت, و بالتالي
انت مش محتاج الـABS, لكن محتاج فرامل عاديه علشان العربيه تقف, و بالتابعيه ماتدوسش على
بدال الفرامل للاخر, لكن كفايه نصف دوسه على البدال, و هتفي بالغرض بدون الحاجه لمرحلة الـABS
لكن في موقف تاني انت محتاج تفرمل جامد و تفادي عربيه او حاجه قصادك, و مع الفرمله جامد
انت مش عايز العربيه تفقد اتزانها او تعوم منك نتيجة الفرمله و توقف العجل تماماً, و هي دي تحديدا فائدة الـABS
انه بيمنع غلق التيل على الديسكات بشكل ثابت و بالتالي العربيه تزحف او تعوم لو هتفادي شئ يمين او شمال
لكن بيعمل زي نبضات او عملية غلق متقطعه على الديسكات بتسمحلك انك تعدل مسارك و في نفس
الوقت بتقلل من سرعتك بدون ما تفقد اتزانك او بدون ما العربيه تزحف... ده كل الموضوع
اللي وراك خبط فيك مش لانه ماعندوش ABS, لكن لان المسافه بينك و بينه كانت ماتسعفوش او
الفرامل عنده ضعيفه, او هو ماخدش باله..... الاسباب كتيييير بعيداً عن وجود الـABS من عدمه...
7- مش معاك اطلاقاً في موضوع الاكصدام ده... لان في ورا الاكصدام دعامات من الفولاذ بتمتص
الصدمات علشان ماتوصلش للصدر الامامي او الريدياتبر, و الاهم للركاب نفسهم, و ده على حساب الاكصدام...
لكن عن تجربه, الاكصدام قوي, و في وراه دعامه فولاذ, و كمان صاج العربيه قوي كعادة كيا عموماً
8- موضوع النور ده ممكن يكون مجرد هاجس, و ممكن يكون سليم, فالافضل تشييك عليه في التوكيل
9- الموضوع ده ماكانش بيحصل عندي, و الافضل بردو تشييك على كهربة العربيه في التوكيل
10- مختلف معاك في نقطة ان الخامات الداخليه ممتازه, لان خامات الشكل القديم افضل منها بكتير...
ربنا يباركلك فيها, و ألف مبروك على الصيانه و عقبال صيانة الـ100 ألف... تقبل تحياتي
المفضلات